پاکستان میں کرونا وائرس سے مزید 34 اموات
پاکستان میں گزشتہ چوبیس گھنٹوں کے دوران کرونا وائرس کے شکار مزید 34 مریض دم توڑ گئے ہیں جب کہ 2700 سے زیادہ افراد میں وائرس کی تشخیص ہوئی ہے۔
پاکستان میں کرونا کیسز اور اموات کی تعداد میں مسلسل اضافہ ہو رہا ہے۔ حکام کے مطابق ایک روز کے دوران 2756 افراد کرونا کا شکار ہو گئے ہیں جس کے بعد ملک میں کیسز کی کل تعداد تین لاکھ 76 ہزار 929 ہو گئی ہے۔
عالمی وبا سے پاکستان میں اب تک سات ہزار 696 افراد ہلاک ہو چکے ہیں اور اب بھی ایک ہزار 677 مریضوں کی حالت تشویش ناک ہے۔
برطانیہ: ملک گیر لاک ڈاؤن دو دسمبر کو ختم کرنے کا اعلان
برطانیہ کے وزیر اعظم بورس جانسن کے دفتر سے جاری کردہ بیان میں کہا گیا ہے کہ کرونا وائرس کے بڑھتے کیسز کے پیش نظر نافذ کردہ لاک ڈاؤن دو دسمبر کو ختم کر دیا جائے گا۔ تاہم مقامی طور پر زیادہ کیسز والے علاقوں میں پابندیاں سخت کی جائے گی۔
وزیراعظم بورس جانسن نے رواں ماہ کے اوائل میں وبا کی بگڑتی صورتِ حال کو دیکھتے ہوئے لاک ڈاؤن لگانے کا اعلان کیا تھا۔ جس کی وجہ سے ان کی اپنی جماعت کے چند رہنما اور کاروباری شخصیات ناراض ہوئی تھیں۔
وزیراعظم کی ترجمان کا کہنا ہے کہ وزیراعظم اور ان کے مشیران واضح طور پر جانتے ہیں کہ وائرس ابھی بھی موجود ہے اور مقامی پابندیوں کے اطلاق کے بغیر وائرس ایک بار پھر قابو سے باہر ہو سکتا ہے۔
بیان میں مزید کہا گیا ہے کہ وزیراعظم پیر کو سردیوں کے لیے نئے پلان کا اعلان کریں گے۔
امریکہ میں کرونا کیسز ایک کروڑ 20 لاکھ سے بڑھ گئے
امریکہ میں کرونا وائرس کیسز کی تعداد میں تیزی سے اضافہ ہو رہا ہے اور گزشتہ 24 گھنٹوں کے دوران مزید ایک لاکھ 90 ہزار سے زائد کیس رپورٹ ہوئے ہیں۔
کرونا کے باعث امریکہ میں ہلاکتوں کی مجموعی تعداد دو لاکھ 54 ہزار سے بڑھ گئی ہے۔
خبر رساں ادارے 'رائٹرز' کے مطابق امریکہ میں 'تھینکس گیونگ' تہوار کی چھٹی کے موقع پر لاکھوں امریکی شہری اپنے عزیز و اقارب اور دوستوں سے ملنے جاتے ہیں جس کے باعث وائرس کے مزید پھیلاؤ کا خدشہ ظاہر کیا جا رہا ہے۔
طبی ماہرین کا کہنا ہے کہ امریکہ میں حالیہ چند روز کے دوران وائرس کے پھیلاؤ میں مزید تیزی آ رہی ہے اور محض چھ روز کے دوران 10 لاکھ سے زائد کیس رپورٹ ہوئے ہیں۔
امریکہ کی ٹرانسپورٹ سیکیورٹی ایڈمنسٹریشن کے مطابق جمعے کو امریکی ہوائی اڈوں سے لگ بھگ 10 لاکھ افراد نے اندرون ملک سفر کیا جس سے وائرس کے مزید پھیلاؤ کے خدشات بڑھ گئے ہیں۔
حکام کے بقول وبا کے آغاز کے بعد دوسری بار اتنی بڑی تعداد میں لوگوں نے اندرون ملک سفر کیا ہے۔ حالاں کہ حکام لوگوں کو خبردار کر رہے ہیں کہ وہ 'تھینکس گیونگ' تہوار کے موقع پر گھروں میں رہیں۔
پاکستان میں کرونا سے ایک ہی دن میں 59 ہلاکتیں، مزید 2665 کیس
پاکستان میں کرونا وائرس کی دوسری لہر میں شدت آ رہی ہے اور چار ماہ بعد ملک میں ایک ہی روز میں ہلاکتوں کی تعداد 50 سے بڑھ گئی ہے۔
نیشنل کمانڈ اینڈ آپریشن سینٹر (این سی او سی) کی جانب سے اتوار کو جاری کیے گئے اعداد و شمار کے مطابق ملک بھر میں کرونا کیسز کی مجموعی تعداد تین لاکھ 74 ہزار سے بڑھ گئی ہے جب کہ وائرس سے اب تک 7662 ہلاکتیں ہو چکی ہیں۔
گزشتہ 24 گھنٹوں کے دوران مجموعی طور پر 38 ہزار 963 ٹیسٹس کیے گئے۔
وفاقی وزیر منصوبہ بندی اسد عمر کا کہنا ہے کہ گزشتہ 15 روز کے دوران وینٹی لیٹر پر مریضوں کی تعداد میں 200 فی صد تک اضافہ دیکھا گیا ہے۔
ایک ٹوئٹ میں اُن کا کہنا تھا کہ پشاور اور ملتان میں 200 فی صد، کراچی میں 148 فی صد، لاہور میں 114 فی صد، اسلام آباد میں 65 فی صد اضافہ دیکھا گیا ہے۔
اُن کا کہنا تھا کہ ملتان اور اسلام آباد میں 70 فی صد وینٹی لیٹر اس وقت زیرِ استعمال ہیں۔