پاکستان میں ٹیسٹ مثبت آنے کی شرح میں اضافہ
پاکستان میں کرونا وائرس کے ٹیسٹ مثبت آنے کی شرح 6.9 ہو گئی ہے۔
سرکاری اعداد و شمار کے مطابق پاکستان میں کرونا وائرس کے ٹیسٹ مثبت آنے کی شرح میں مسلسل اضافہ ہو رہا ہے۔ گزشتہ روز ملک بھر میں کیے گئے ٹیسٹس میں سے 7.01 مثبت آئے تھے جب کہ اس سے ایک دن قبل 6.31 فی صد ٹیسٹ مثبت رپورٹ ہوئے تھے۔
رواں ماہ ایک جانب ملک بھر میں کیے جانے والے ٹیسٹوں کی تعداد میں اضافہ ہو رہا ہے تو دوسری جانب ٹیسٹ مثبت آنے کی شرح بھی بڑھ گئی ہے۔
سرکاری اعداد و شمار کے مطابق پاکستان میں اکتوبر کے وسط تک ٹیسٹ مثبت آنے کی شرح 1.08 فی صد سے 2.2 فی صد کے درمیان تھی۔
'لوگوں کو کرونا سے متعلق صحیح معلومات نہیں مل رہیں'
کرونا وائرس کی ویکسینز سے بہت سی امیدیں وابستہ کی جا رہی ہیں۔ لیکن عالمی ادارۂ صحت نے خبردار کیا ہے کہ وائرس صرف ویکسین سے ختم نہیں ہو گا۔ اس صورتِ حال پر دیکھیے امریکی ریاست ٹیکساس کے 'ہیوسٹن میتھوڈسٹ اسپتال' کے ڈاکٹر فیصل مسعود کی وائس آف امریکہ کی ارم عباسی کے ساتھ گفتگو۔
پاکستان میں کرونا سے مزید دو ہزار آٹھ سو افراد متاثر
پاکستان میں گزشتہ 24 گھنٹوں میں کرونا وائرس سے مزید 2829 افراد متاثر ہوئے ہیں جس کے بعد متاثرہ افراد کی مجموعی تعداد 3 لاکھ 95 ہزار سے تجاوز کر گئی ہے۔
سرکاری اعداد و شمار کے مطابق وبا سے متاثر 3 لاکھ 40 ہزار کے لگ بھگ افراد صحت یاب ہو چکے ہیں جب کہ زیرِ علاج افراد کی تعداد میں مسلسل اضافہ ہو رہا ہے۔
اعداد و شمار کے مطابق ملک بھر میں زیرِ علاج افراد کی تعداد 47 ہزار 390 ہو چکی ہے۔ جب کہ زیرِ علاج افراد میں سے 2 ہزار 186 افراد انتہائی نگہداشت میں ہیں۔