پاکستان میں ٹیسٹ مثبت آنے کی شرح 8.69 تک پہنچ گئی
پاکستان میں کرونا وائرس کے ٹیسٹ مثبت آنے کی شرح 8.69 تک پہنچ گئی ہے۔
سرکاری اعداد و شمار کے مطابق پاکستان میں گزشتہ 24 گھنٹوں میں مزید 40 ہزار 202 ٹیسٹ کیے گئے ہین۔ جس کے بعد ملک بھر میں کیے جانے والے ٹیسٹس کی تعداد 59 لاکھ 6 ہزار 146 ہو گئی ہے۔
حکومت کے مطابق پاکستان میں وبا کی تشخیص کے لیے کیے جانے والے ٹیسٹ کے مثبت آنے کی شرح میں مسلسل اضافہ ہو رہا ہے۔
اعداد و شمار کے مطابق اکتوبر کے وسط میں ملک بھر میں ٹیسٹ مثبت آنے کی شرح 2 فی صد سے کم تھی۔ جب کہ اب یہ شرح 8.69 تک پہنچ گئی ہے۔
امریکہ: مزید دو لاکھ کیسز رپورٹ، دو لاکھ 86 ہزار اموات
امریکہ میں کرونا وائرس سے گزشتہ 24 گھنٹوں میں ایک بار پھر دو لاکھ سے زائد افراد متاثر ہوئے ہیں۔
'جان ہاپکنز یونیورسٹی' کے اعداد و شمار کے مطابق امریکہ میں گزشتہ 24 گھنٹوں میں 2 لاکھ 15 ہزار 860 افراد متاثر ہوئے ہیں۔ گزشتہ دو روز میں متاثرہ افراد کی یومیہ تعداد 2 لاکھ سے کم رہی تھی۔ البتہ اس سے قبل مسلسل تین دن تک دو لاکھ سے زائد یومیہ کیسز رپورٹ ہوئے تھے۔
اعداد و شمار کے مطابق امریکہ میں وبا سے ایک کروڑ 51 لاکھ 74 ہزار افراد متاثر ہوئے ہیں۔ جن میں سے 58 لاکھ سے زائد افراد صحت یاب ہو چکے ہیں۔
'جان ہاپکنز یونیورسٹی' کے اعداد و شمار کے مطابق کے مطابق امریکہ میں گزشتہ 24 گھنٹوں میں 2546 افراد ہلاک ہوئے ہیں۔ جس کے بعد اموات کی مجموعی تعداد 2 لاکھ 86 ہزار سے تجاوز کر گئی ہے۔
انڈونیشیا میں انتخابات، عملے کے رنگ برنگے ملبوسات
انڈونیشیا میں کرونا وائرس کی عالمی وبا کے دوران انتخابات ہو رہے ہیں۔ اس دوران پولنگ اسٹیشنز پر عملے کے کچھ ارکان نے سپر ہیروز کا روپ دھارا ہوا تھا۔ کوئی کیپٹن امریکہ بنا ہوا تھا تو کوئی اسپائیڈر مین بن کر ووٹروں کو ہدایات دے رہا تھا۔