امریکہ میں لوگ کرونا ویکسین کیوں نہیں لگوانا چاہتے؟
امریکہ میں کرونا وائرس سے بچاؤ کے لیے ویکسینیشن کا عمل شروع ہوگیا ہے۔ ایک سروے کے مطابق تقریباً 60 فی صد امریکی ویکسین لینے میں دلچسپی رکھتے ہیں۔ لیکن ان میں سے بیشتر پہلے دوسروں پر اس کے اثرات دیکھنا چاہتے ہیں۔ ویکسین سے متعلق سب سے زیادہ عدم اعتماد امریکہ کی سیاہ فام کمیونٹی میں نظر آتا ہے۔
'پاکستان میں کرونا ویکسین سے متعلق بھی منفی پروپیگنڈے کا خدشہ ہے'
وزیراعظم پاکستان کے معاونِ خصوصی برائے صحت ڈاکٹر فیصل سلطان کہتے ہیں پاکستان میں بہت جلد کرونا وائرس سے بچاؤ کی ویکسین دستیاب ہو گی جو مرحلہ وار لوگوں کو لگائی جائے گی۔
وائس آف امریکہ کو دیے گئے خصوصی انٹرویو میں ڈاکٹر فیصل سلطان کا کہنا تھا کہ دیگر ادویات یا ویکسین کے منفی پروپیگنڈے کی طرح کرونا ویکسین کے بارے میں بھی پاکستان میں منفی پروپیگنڈا ہو سکتا ہے۔
ڈاکٹر فیصل سلطان نے بتایا کہ کرونا وائرس کی وبا اور اِس کے پھیلاؤ میں اتنے عوامل کارفرما ہیں کہ اس کے پھیلاؤ میں اُتار چڑھاؤ یا وبا کے عروج کا تعین سپر کمپیوٹر بھی نہیں کر سکتا۔
کرونا کی دوسری پر ڈاکٹر فیصل سلطان کا کہنا تھا کہ کچھ بھی وثوق سے نہیں کہا جا سکتا ہے کہ پاکستان میں کرونا وائرس کی دوسری لہر کا عروج کب تک آئے گا۔
ان کے بقول کرونا کا پھیلاؤ روکنے کے لیے اسکولوں کی بندش سمیت، شادی ہالز میں ان ڈور سرگرمیوں کی بندش جیسے اہم اقدامات کیے گئے۔ لہذٰا ان اقدامات سے لامحالہ وائرس کا پھیلاؤ روکنے میں مدد ملی۔
سیاہ فام امریکیوں کو کرونا ویکسین پر اعتماد کیوں نہیں؟
امریکہ میں سیاہ فام کمیونٹی کرونا وائرس سے بری طرح متاثر ہوئی ہے۔ 'سینٹر فور ڈیزیز کنٹرول' کے مطابق سفید فام شہریوں کے مقابلے میں سیاہ فام افراد میں کرونا وائرس سے ہلاکت کا امکان تین گنا زیادہ دیکھا گیا ہے۔ لیکن اکثر سیاہ فام کرونا ویکسین میں دلچسپی نہیں لے رہے؟ کیوں؟
'کرونا کی دوسری لہر کے باوجود پاکستان کی معاشی صورتِ حال مثبت رہی'
پاکستان نے رواں مالی سال کے پہلے پانچ ماہ کے دوران ساڑھے چار ارب ڈالر کے بیرونی قرض حاصل کیے ہیں۔ اس عرصے کے دوران حاصل کردہ زیادہ تر قرض چین سے موصول ہوئے جو کہ تجارتی بنیادوں پر لیے گئے ہیں۔
پاکستان نے حاصل کردہ ان نئے قرضوں کو پرانے قرض کی ادائیگی اور زرِمبادلہ کے ذخائر مستحکم رکھنے کے لیے استعمال کیا۔
وزارت اقتصادی امور کے ترجمان کے مطابق ملکی بیرونی آمدنی کی مد میں 4.5 ارب ڈالرز موصول ہوئے۔ جس میں گزشتہ سال کے اسی عرصہ کے مقابلے میں 45 فی صد اضافہ ہے۔
ترجمان نے کہا کہ کرونا کی دوسری لہر کے باوجود ملک کی معاشی صورتِ حال مثبت رہی اور ملک کے زرِمبادلہ کے ذخائر میں اضافہ دیکھنے میں آیا ہے۔
وزارتِ اقتصادی امور کے ڈیٹا سے پتا چلتا ہے کہ پانچ ماہ میں لیے گئے قرضوں کے ساتھ پاکستان تحریک انصاف کی حکومت (اگست 2018 سے) مجموعی طور پر 23 ارب 60 کروڑ ڈالر کے غیر ملکی قرضے حاصل کر چکی ہے۔