امریکہ میں کرونا کیسز ایک کروڑ 80 لاکھ سے متجاوز
کرونا وائرس سے سب سے زیادہ متاثرہ ملک امریکہ میں پیر کو کیسز کی مجموعی تعداد ایک کروڑ 80 لاکھ سے تجاوز کر گئی ہے جب کہ مہلک وائرس سے اب تک تین لاکھ 19 ہزار سے زائد امریکی جان کی بازی ہار چکے ہیں۔
امریکہ کی کئی ریاستوں نے وائرس کا پھیلاؤ روکنے کے لیے پابندیاں عائد کر رکھی ہیں جب کہ ملک میں شہریوں کو کرونا ویکسین لگانے کا عمل بھی جاری ہے۔
خبر رساں ادارے 'رائٹرز' کے مطابق امریکی ریاست کیلی فورنیا کے کچھ شہروں میں وائرس کے تیزی سے پھیلاؤ کے باعث اسپتالوں پر دباؤ بڑھ رہا ہے اور انتہائی نگہداشت کے وارڈز میں بیڈز بھی کم پڑ رہے ہیں۔
یونیورسٹی آف واشنگٹن کے ماہرین اس خدشے کا اظہار کر رہے ہیں کہ امریکہ میں جنوری میں کرونا وائرس سے اموات کی شرح میں مزید اضافہ ہو سکتا ہے اور مزید ایک لاکھ امریکی اس مہلک وائرس کے ہاتھوں جان کی بازی ہار سکتے ہیں۔
'رائٹرز' کے مطابق پیر تک امریکہ میں ایک لاکھ 13 ہزار سے زائد افراد اسپتالوں میں زیرِ علاج تھے۔
کرونا وائرس: چینی ویکسین کی پاکستان میں آزمائش جاری
امریکہ اور برطانیہ سمیت دنیا کے کئی ملکوں میں کرونا وائرس کی ویکسین لگانے کا عمل شروع ہو چکا ہے اور کئی ملکوں میں کچھ ممکنہ ویکسینز کی آزمائش جاری ہے۔ پاکستان میں بھی ایک ویکسین آزمائشی مرحلے میں ہے۔ چین سے آنے والی یہ ویکسین ہزاروں رضا کاروں کو لگائی جا چکی ہے۔ دیکھیے علی فرقان کی ڈیجیٹل رپورٹ۔
کرونا وائرس: امریکہ میں 'موڈرنا' کی ویکسین کی تقسیم بھی شروع
امریکہ میں حال ہی میں منظور کی جانے والی کرونا سے بچاؤ کی ایک اور ویکسین کی تقسیم کا آغاز کر دیا گیا ہے۔
اتوار کو امریکی دوا ساز کمپنی 'موڈرنا' کی تیار کی گئی ویکسین کی خوراکیں ملک بھر میں صحت کے مراکز میں پہنچانے کا سلسلہ شروع کر دیا گیا۔
حکام کا کہنا ہے کہ پیر کی صبح سے لوگوں کو ویکسین لگانے کا عمل شروع ہو جائے گا۔
'فائزر' کے بعد 'موڈرنا' دوسری کمپنی ہے جس کی ویکسین کو امریکی حکام نے کرونا وائرس کے وبائی مرض کے خلاف ہنگامی بنیادوں پر استعمال کی اجازت دی تھی۔
فائزر' کے برعکس 'موڈرنا' کی تیار کی گئی ویکسین کو نسبتاً کم درجہ حرارت میں رکھا جا ستا ہے۔ اس لیے حکام کا کہنا ہے کہ اسے لوگوں تک پہنچانے میں زیادہ مشکلات کا سامنا نہیں ہو گا۔
امریکہ دنیا میں کرونا وائرس سے سب سے زیادہ متاثر ہونے والا ملک ہے اور اب تک جانز ہاپکنز یونیورسٹی کے اعدادو شمار کے مطابق اس موذی مرض کے ایک کروڑ اور 76 لاکھ کیس سامنے آ چکے ہیں جب کہ تین لاکھ 16 ہزار امریکی ہلاک ہو چکے ہیں۔
امریکہ میں خوراک اور ادویات کے ادارے 'فوڈ اینڈ ڈرگ ایڈمنسٹریشن' (ایف ڈی اے) نے جمعے کو 'موڈرنا' کی بنائی گئی ویکسین کی منظوری دی تھی۔
ویکسین کی تقسیم کے انچارج جنرل گسٹو پرنا نے ان ایک درجن سے زائد ریاستوں کے گورنروں سے معذرت کی جنہیں پہلے مرحلے میں 'فائزر' کی تیار کی گئی ویکسین اُن کی توقعات سے کم تعداد میں مہیا کی گئیں۔
کرونا کی نئی شکل، یورپ اور مشرقِ وسطی کے کئی ممالک کی برطانیہ پر سفری پابندیاں
برطانیہ میں کرونا وائرس کی نئی قسم کے انکشاف کے بعد کئی یورپی اور مشرقِ وسطیٰ کے ممالک نے اس پر سفری پابندیاں عائد کر دی ہیں۔
صورتِ حال کا جائزہ لینے کے لیے برطانوی وزیر اعظم بورس جانسن نے پیر کو ہنگامی اجلاس طلب کر لیا ہے جس میں برطانیہ میں آمدورفت اور تجارتی سامان کی منتقلی سے متعلق اہم فیصلے متوقع ہیں۔
اتوار کو کئی یورپی ممالک بشمول فرانس، اٹلی، بیلجیم، نیدرلینڈ نے برطانیہ میں کرونا وائرس کی ایک اور نئی شکل اور اس کے تیزی سے پھیلنے کے شواہد ملنے پر سفری پابندیاں عائد کر دیں۔
اس کے بعد سعودی عرب، اسرائیل، کینیڈا اور کویت نے بھی اسی نوعیت کی پابندیاں عائد کر دی ہیں۔
عالمی ادارۂ صحت (ڈبلیو ایچ او) کا کہنا ہے کہ برطانیہ کے علاوہ وائرس کی اس نئی قسم کے نو کیسز ڈنمارک جب کہ ایک، ایک نیدر لینڈ اور آسٹریلیا میں رپورٹ ہوئے ہیں۔
برطانوی وزیرِ اعظم بورس جانسن کا کہنا ہے کہ وائرس کی نئی قسم 70 فی صد زیادہ تیزی سے ایک انسان سے دوسرے انسان میں منتقل ہونے کے شواہد ملے ہیں۔
اُن کا کہنا تھا کہ وہ حتمی طور پر کچھ نہیں کہہ سکتے کہ ویکسین اس وائرس کی اس نئی قسم کے خلاف بھی مؤثر ہو گی یا نہیں۔ تاہم سائنس دان اس کے ممکنہ اثرات کا جائزہ لے رہے ہیں۔