نیو یارک میں وسط فروری سے ریستوران مکمل طور پر کھولنے کا اعلان
نیو یارک میں دو ہفتے بعد ریستوران صارفین کو اِن ڈور کھانا فراہم کر سکیں گے۔
امریکہ کی ریاست نیو یارک کے گورنر اینڈریو کومو کا کہنا ہے کہ نیو یارک شہر کے معروف ریستورانوں میں ویلنٹائن ڈے سے اِن ڈور کھانا کھانے کی اجازت ہو گی۔
جمعے کو کیا گیا یہ اعلان امریکہ کی کسی بھی ریاست کی طرف سے کرونا وبا کی شدت میں ہونے والی کمی کو ظاہر کرتا ہے۔
ریستوران کھولنے سے متعلق منعقدہ تقریب سے خطاب میں گورنر اینڈریو کومو کا کہنا تھا کہ وہ کرونا وبا کی شدت میں اضافے سے متعلق آگاہ تھے۔ انہوں نے کامیابی اس کا مقابلہ کیا۔
امریکہ میں آبادی کے لحاظ سے سب سے بڑے شہر نیو یارک میں کرونا ویکسین کی کمی دیکھی جا رہی ہے جس کی وجہ سے گزشتہ ہفتے کئی افراد ویکسین لگوانے سے محروم رہے تھے۔
فرانس کا تیسری بار لاک ڈاؤن نہ کرنے کا فیصلہ
یورپ کے ملک فرانس نے کرونا وائرس کے سبب ملک بھر میں تیسرا لاک ڈاؤن نافذ نہ کرنے اور پابندیوں پر عمل درآمد میں سخت کرنے کا اعلان کیا ہے۔
فرانس کی سرحدوں پر دیگر ممالک سے آنے والوں کے لیے سخت اقدامات، کرفیو کی خلاف ورزی پر پولیس کی کارروائی اور گھروں سے کام کرنے کی پابندی کو پر عمل درآمد کرانے کا فیصلہ کیا گیا ہے۔
فرانس کے وزیرِ اعظم جین کیسٹیکس کا کہنا ہے کہ عوام کی صحت سے متعلق صورتِ حال ابھی بھی پریشان کن ہے۔ جب کہ فرانس میں وبا کے سبب ہونے والی ہلاکتوں کی تعداد 75 ہزار سے تجاوز کر چکی ہے۔
وزیرِ اعظم کا مزید کہنا تھا کہ وہ لاک ڈاؤن کے مضمرات سے آگاہ ہیں۔ انہوں نے گزشتہ چند دن کے اعداد و شمار دیکھیں ہیں جس کے بعد انہوں نے یہ فیصلہ کیا ہے کہ ابھی لاک ڈاؤن نافذ نہ کر کے ایک موقع لیا جا سکتا ہے۔
ان کا مزید کہنا تھا کہ دیگر ضروری سفر کے علاوہ اتوار سے یورپی یونین سے باہر کے ممالک سے فرانس آنے والوں پر مکمل پابندی ہو گی۔
خیال رہے کہ فرانس دنیا بھر میں وبا کے سبب ہونے والی ہلاکتوں کی تعداد کے حساب سے ساتویں نمبر پر ہے۔
پاکستان میں کرونا ویکسین سے متعلق غلط فہمیاں
پاکستان میں چینی کمپنی 'سائنو فارم' کی ویکسین کی پہلی کھیپ کی آمد جلد متوقع ہے۔ ملک بھر میں ویکسین کی آمد سے قبل منفی خیالات گردش کر رہے ہیں۔ گیلپ سروے کے مطابق پاکستانیوں کی بڑی تعداد کے خیال میں کرونا وائرس کے خطرات کو بڑھا چڑھا کر بیان کیا جا رہا ہے۔ دیکھیے نذر الاسلام کی رپورٹ میں۔
یورپین کمیشن: 18 سال سے زائد عمر کے افراد کے 'ایسٹرا زینیکا' ویکسین کی منظوری
یورپی کمیشن نے 18 سال سے زائد عمر کے افراد کے لیے ‘ایسٹرا زینیکا’ کی تیار کردہ کرونا ویکسین استعمال کرنے کی منظوری دے دی ہے۔
یہ منظوری یورپی کمیشن پر کی جانے والی تنقید کے بعد دی گئی ہے، ناقدین کی جانب سے کہا جا رہا تھا کہ کمیشن آبادی کو کرونا ویکسین لگانے سے متعلق مطلوبہ اقدامات نہیں کر رہا۔
یورپین میڈیسن ایجنسی (ای ایم اے) کے ماہرین نے مشترکہ طور پر کرونا ویکسین 18 سال یا اس سے زائد عمر کے افراد کے لیے استعمال کی منظوری جمعے کو دی ہے۔
'ایسٹرا زینیکا' کی تیار کردہ کرونا ویکسین تیسری ویکسین ہے جس کے استعمال کی منظوری دی گئی ہے۔ جب کہ اس سے قبل ‘فائزر’ اور ‘موڈرنا’ کی تیار کردہ ویکسین کی منظوری دی گئی تھی۔
ای ایم اے کا مزید کہنا ہے کہ 55 سال سے زائد عمر کے افراد میں اس ویکسین کے نتائج سے متعلق خاطر خواہ نتائج دستیاب نہیں ہیں۔ تاہم ایجنسی کے مطابق اسے امید ہے کہ ویکسین ان افراد میں بھی کار آمد ہو گی۔
خیال رہے کہ 'ایسٹرا زینیکا' کی ویکسین کی دو خوراکیں لگائی جائیں گی۔ جب کہ ویکسین کی دوسری خوراک پہلی خوراک کے چار سے 12 ہفتوں کے اندر لگوانی ہوگی۔