پاکستان میں صرف چار فی صد متاثرہ افراد زیرِ علاج
پاکستان میں وبا سے متاثرہ صرف چار فی صد افراد زیرِ علاج ہیں۔
سرکاری اعداد و شمار کے مطابق پاکستان میں گزشتہ 24 گھنٹوں میں وبا سے مزید 1272 متاثر ہونے کی تصدیق کی گئی ہے جس کے بعد متاثرہ افراد کی مجموعی تعداد پانچ لاکھ 67 ہزار 261 ہو گئی ہے۔ جن میں سے 12 ہزار 488 افراد ہلاک ہوئے ہیں جب کہ پانچ لاکھ 30 ہزار 597 صحت یاب ہو چکے ہیں۔
اعداد و شمار کے مطابق ملک بھر میں 24 ہزار 476 افراد زیرِ علاج ہیں جو مجموعی متاثرہ افراد کے 4.2 فی صد تعداد بنتی ہے۔
واضح رہے کہ ملک بھر میں وبا سے متاثرہ افراد کی نشان دہی کے لیے 85 لاکھ سے زائد ٹیسٹ کیے جا چکے ہیں۔
کرونا وائرس: کیا یورپ 'ویکسین پاسپورٹ' متعارف کرا سکتا ہے؟
ایسے میں جب یورپ میں ویکسین پاسپورٹ کے اجرا کے امکانات روشن ہو رہے ہیں، زیادہ تر یورپی ممالک نہ صرف سفر کرنے والوں کے لیے ویکسین لگوانے کا ثبوت پاس رکھنے کو لازمی قرار دینے کا سوچ رہے ہیں بلکہ اس پاسپورٹ کو بارز، ریستورانوں اور کنسرٹ ہالز کو بھی دوبارہ کھولنے میں مدد کے طور پر دیکھ رہے ہیں۔
برطانیہ کے وزیرِاعظم بورس جانسن سے جب سوال کیا گیا کہ آیا ویکسین پاسپورٹ متعارف کرائے جانے کا امکان ہے تو انہوں نے صحافیوں کو بتایا کہ بعض بین الاقوامی سفر کے لیے ویکسی نیشن کا ثبوت درکار ہو سکتا ہے۔
ان کا کہنا تھا کہ "صاف بات ہے کہ کچھ ممالک یہ اصرار کرنے جا رہے ہیں کہ جو مسافر ان کے ملک آ رہے ہیں، ان کے پاس ویکسی نیشن کا ثبوت موجود ہو۔ بالکل اسی طرح جیسے ماضی میں زرد بخار یا دیگر بیماریوں کے خلاف ویکسی نیشن کا ریکارڈ مانگا جاتا تھا۔"
یورپی حکومتیں اس بارے میں تقسیم رہی ہیں کہ آیا ویکسین پاسپورٹ کا نظام رائج کیا جائے یا نہیں لیکن سیاح اور مہمان داری (ہاسپیٹیلیٹی) کے شعبے اپنے کاروبار کی بحالی کے لیے بے چین ہیں۔ ان کا کہنا ہے کہ وہ ایک اور موسمِ گرما ضائع نہیں کر سکتے۔
پاکستان میں رواں ماہ زیرِ علاج افراد کی تعداد میں 25 فی صد کمی
پاکستان میں کرونا وائرس سے متاثرہ افراد کی تعداد میں گزشتہ 16 دن کے دوران 25 فی صد سے زائد کمی آئی ہے۔
سرکاری اعداد و شمار کے مطابق رواں ماہ کے آغاز میں ملک بھر میں زیرِ علاج افراد کی تعداد 33 ہزار 493 تھی۔ جب کہ گزشتہ روز زیرِ علاج افراد کی تعداد 25 ہزار تھی۔
یوں 16 دن میں پاکستان میں زیرِ علاج افراد کی شرح میں واضح کمی سامنے آئی ہے۔
اعداد و شمار کے مطابق گزشتہ 24 گھنٹوں میں وبا سے مزید 1165 افراد کے متاثر ہونے کی تصدیق ہوئی ہے۔ متاثرہ افراد کی نشان دہی کے لیے ملک بھر میں 33 ہزار سے زائد ٹیسٹ کیے گئے۔
'کرونا کے دور میں بیس سال کا ہونا آسان نہیں'
حالیہ اندازوں کے مطابق کالج اور یونیورسٹی کے طلبہ کو کرونا ویکسین سب سے آخر میں ملے گی۔
امریکہ میں وبائی امراض کے ماہر ڈاکٹر اینتھونی فاؤچی کے مطابق امریکہ میں کالج و یونیورسٹی کے طلبہ کو کرونا ویکسین شاید اپریل کے آخر میں جا کر لگے گی۔ ان میں ایسے طلبہ کو استثنیٰ حاصل ہو گا جن کا تعلق یا تو طبی شعبے سے ہو یا انہیں کینسر یا امیونو ڈیفیشنسی جیسا مرض لاحق ہو۔
امریکی ادارے نیشنل اکیڈیمکس اینڈ سائنسز، انجنئیرنگ اینڈ میڈیسنز کے لگائے گئے ایک تخمینے میں، جس میں دیکھا گیا کہ آبادی کے کس طبقے کو کب ویکسین دی جائے گی، نوجوانوں کو ترجیحی لسٹ میں سب سے آخر میں رکھا گیا ہے۔
اس تخمینے میں بڑی عمر کے افراد کو یا ایسے افراد جنہیں طبی پیچیدگیاں لاحق ہیں، ترجیحی فہرست میں سب سے پہلے رکھا گیا ہے۔
یہ تخمینہ امریکہ کے وبائی امراض کے ادارے سی ڈی سی کی ہدایت پر لگایا گیا اور اس پر عمل ریاست کی جانب سے کیا جائے گا۔
امریکہ میں طلبہ چاہتے ہیں کہ کالج کیمپس جلد از جلد کھل جائیں۔ تاکہ فرداً کلاس لی جا سکے۔ امریکہ میں اب تک 1900 سے زائد کالج و یونیورسٹیوں میں چار لاکھ سے زائد طلبہ کرونا وائرس سے متاثر ہو چکے ہیں جن میں سے 90 طلبہ کی موت بھی ہوئی ہے۔
ابھی تک کرونا وائرس کی ویکسین 65 برس سے زائد عمر کے افراد کو مل رہی ہے اور جب ویکسین کی خوراکیں دستیاب ہوں گی تو نوجوانوں کو بھی ویکسین دی جانے لگے گی۔