پاکستان میں ٹیسٹ مثبت آنے کی شرح 3.6 فی صد ہو گئی
پاکستان میں کرونا وائرس سے متاثر افراد کی کی نشان دہی کے لیے ہونے والے ٹیسٹس کی شرح 3.6 فی صد ہو گئی ہے۔
سرکاری اعداد و شمار کے مطابق ملک بھر میں گزشتہ 24 گھنٹوں میں وبا سے متاثرہ افراد کی نشان دہی کے لیے مزید 34 ہزار 754 ٹیسٹ کیے گئے۔ جن میں نشان دہی ہوئی کہ وبا سے مزید 1245 افراد متاثر ہوئے ہیں۔
یوں ٹیسٹ مثبت آنے کی شرح 3.6 فی صد بتائی گئی ہے۔
واضح رہے کہ وبا سے گزشتہ 24 گھنٹوں میں مزید 40 افراد ہلاک ہوئے ہیں۔
حکام کے مطابق ملک بھر میں 24 ہزار 139 افراد زیرِ علاج ہیں۔
'جرمنی میں وائرس کی نئی قسم تیزی سے پھیل رہی ہے'
جرمنی کے وزیرِ صحت جینس سپن نے کہا ہے کہ کرونا وائرس کی برطانیہ میں سامنے آنے والی قسم جرمنی میں تیزی سے پھیل رہی ہے۔ دو ہفتے پہلے کی شرح کے مقابلے میں اس کے کیسز چار گنا زیادہ سامنے آ رہے ہیں۔
برلن میں بدھ کو صحافیوں سے گفتگو کرتے ہوئے جینس سپن نے کہا کہ وائرس کی نئی قسم کے پھیلاؤ کی شرح نشان دہی کرتی ہے کہ ہر ہفتے اس کے کیسز کی شرح تقریباََ دگنی ہو جاتی ہے۔
انہوں نے خدشہ ظاہر کیا کہ جلد ہی یہ قسم جرمنی میں غالب آ جائے گی۔
انہوں نے کہا کہ جب ملک میں پابندیوں کو کم کرنا شروع کیا جائے گا تو جرمنی میں صحت کے حکام کو وائرس کی برطانوی قسم کے حوالے سے غیر معمولی طور پر محتاط رہنا ہوگا۔
انہوں نے توقع ظاہر کی کہ آئندہ دنوں میں جرمنی میں ویکسین کے پروگرام میں نمایاں طور پر تیزی آئے گی۔ ویکسین فراہم کرنے والے مراکز کارکردگی کا مظاہرہ کر رہے ہیں۔ آئندہ ہفتے کے آخر تک انہیں ویکسین کی ایک کروڑ اضافی خوراکیں فراہم کرنی ہیں۔
انہوں نے حفاظتی خدشات کے پیش نظر ویکسین لینے سے گریزاں افراد کو بھی یقین دہانی کرائی کہ جانچ کے سخت عمل کے بعد یورپی یونین کی طرف سے منظور کی جانے والی ویکسین محفوظ اور مؤثر ہے۔
بھارت: کرونا ویکسی نیشن مہم پر لوگوں کے خدشات
بھارت میں کرونا وائرس پر قابو پانے کے لیے اب تک 80 لاکھ سے زائد افراد کو ویکسین لگائی جا چکی ہے۔ نئی دہلی اگست تک 30 کروڑ افراد کو ویکسین لگانے کا ارادہ رکھتا ہے لیکن ملک میں ویکسین کے بارے میں شکوک و شبہات اس مہم کے لیے چیلنج بنے ہوئے ہیں۔ حکام ان چیلنجز سے کیسے نمٹ رہے ہیں؟ دیکھیے۔
امریکی فوج کے ہزاروں اہلکاروں کا کرونا ویکسین لگوانے سے انکار
امریکی فوج کے ہزاروں اہلکاروں نے کرونا ویکسین لگوانے سے انکار کر دیا ہے۔ البتہ افسران مسلسل اُنہیں ویکسین سے متعلق انٹرنیٹ پر موجود افواہوں پر دھیان نہ دینے کی ہدایت کر رہے ہیں۔
امریکی ایئر فورس کے میجر جنرل جیف ٹیلیفیرو نے بدھ کو کانگریس کو بریفنگ کے دوران بتایا کہ ابتدائی اعداد و شمار کے مطابق فوج کے دو تہائی اہلکاروں نے ویکسین لینے پر رضا مندی ظاہر کی تھی جب کہ بعض اہلکاروں نے ویکسین لگوانے سے انکار کیا ہے۔
امریکہ فوج کی 'آرمی فورسز کمانڈ' کے سرجن بریگیڈیئر جنرل ایڈورڈ بیلی کا کہنا ہے کہ "ہم ویکسین سے متعلق اہلکاروں کو آگاہی دینے اور اُنہیں ویکسین لگوانے پر قائل کرنے کی کوشش کر رہے ہیں۔"
اُن کے بقول فوج کی بعض یونٹس میں 30 فی صد اہلکاروں نے ویکسین لگوانے پر رضا مندی ظاہر کی ہے جب کہ دیگر یونٹس میں یہ تعداد کہیں 50 فی صد اور کہیں 70 فی صد ہے۔
یاد رہے کہ آرمی فورسز کمانڈ امریکہ میں موجود 15 فوجی اڈوں کی نگران ہے جہاں لگ بھگ سات لاکھ 50 ہزار فوجی، ریزرو اہلکار اور نیشنل گارڈز موجود ہوتے ہیں۔