پاکستان میں کرونا سے مزید 23 ہلاکتیں، 1176 نئے کیس
پاکستان میں مجموعی طور پر کرونا وبا کی شدت میں بتدریج کمی آ رہی ہے۔ تاہم اتوار کو کرونا سے مزید 23 ہلاکتیں اور 1176 نئے کیس رپورٹ ہوئے ہیں۔
نیشنل کمانڈ اینڈ آپریشن سینٹر (این سی او سی) کے اعداد و شمار کے مطابق پاکستان میں اب تک پانچ لاکھ 79 ہزار سے زائد کرونا کیس رپورٹ ہو چکے ہیں۔
پاکستان میں وائرس سے اب تک 12 ہزار 860 اموات جب کہ پانچ لاکھ 45 ہزار سے زائد مریض صحت یاب ہو چکے ہیں۔
پاکستان میں اب بھی 1562 مریض مختلف اسپتالوں کے انتہائی نگہداشت وارڈز میں زیرِ علاج ہیں۔
امریکہ میں نسلی اقلیتیں کرونا ویکسین لینے کے لیے تیار کیوں نہیں؟
امریکہ میں کچھ نسلی اقلیتوں کو کرونا وائرس اور اس سے ہونے والی پیچیدگیوں کا خطرہ دوسرے شہریوں کی نسبت زیادہ ہے۔ ماہرین کی نظر میں ان طبقات کے لیے ویکسین لینا اور بھی اہم ہے۔ خطرہ زیادہ ہونے کے باوجود ان طبقات میں سے بہت سے لوگ کرونا ویکسین کیوں نہیں لینا چاہتے؟ دیکھیے صبا شاہ خان کی رپورٹ میں۔
امریکہ میں 'جانسن اینڈ جانسن' کرونا ویکسین کے استعمال کی بھی منظوری
امریکہ کی فوڈ اینڈ ڈرگ ایڈمنسٹریشن اتھارٹی (ایف ڈی اے) نے امریکی کمپنی 'جانسن اینڈ جانسن' کی تیار کردہ کرونا ویکسین کے استعمال کی بھی منظوری دے دی ہے جس کے بعد پیر سے مذکورہ ویکسین لگانے کا عمل شروع ہو جائے گا۔
'جانسن اینڈ جانسن' سے قبل امریکہ میں 'فائزر' اور 'موڈرنا' کمپنیز کی تیارکردہ کرونا ویکسین کا استعمال جاری ہے۔
تین براعظموں میں کی جانے والی تحقیق کے مطابق 'جانسن اینڈ جانسن' کی ویکسین لوگوں کو اسپتال میں داخلے سے بچانے، شدید بیمار ہونے اور وائرس سے ہلاکت کے خلاف 85 فی صد تک موؐثر ہے۔
تحقیق کے مطابق ویکسین ان ممالک میں بھی کار آمد ہو گی جہاں جنوبی افریقہ سے سامنے آنے والی کرونا وائرس کی نئی قسم پھیل رہی ہے۔
'جانسن اینڈ جانسن' کی تیار کردہ ویکسین کی ایک خوراک ہی وبا سے بچاؤ کے لیے کافی ہو گی اور طبی حکام اسی ویکسین کے انتظار میں تھے۔ تاکہ ویکسی نیشن مہم میں مزید تیزی لائی جا سکے۔
امریکہ کی جانز ہاپکنز یونیورسٹی کے مطابق امریکہ میں ہفتے تک دو کروڑ 85 لاکھ سے زائد افراد وبا سے متاثر اور لگ بھگ پانچ لاکھ 12 ہزار اموات ہو چکی ہیں۔
امریکی صدر جو بائیڈن نے ہفتے کو جاری کردہ بیان میں ویکسین کی منظوری کو ایک اچھی خبر قرار دیتے ہوئے امریکیوں پر زور دیا کیا کہ وہ وبا کے خلاف حفاظتی اقدامات کو نظر انداز نہ کریں۔
جو بائیڈن کا مزید کہنا تھا کہ وبا کے خلاف جاری جنگ ابھی خاتمے سے کافی دور ہے۔
کرونا وائرس کا ہر 10 میں سے ایک مریض تین ماہ کے بعد بھی بیمار ہے: عالمی ادارۂ صحت
عالمی ادارہ صحت کا کہنا ہے کہ کرونا وائرس کا ہر 10 میں سے ایک مریض تین ماہ گزرنے کے بعد ابھی تک بیمار ہے اور اس میں 12 ہفتے گزرنے کے بعد بھی بیماری کی علامات پائی جاتی ہیں، اس لئےحکام کو سنجیدگی سے ان کی حالت پر توجہ دینی چاہئیے۔
جمعرات کے روز ایک ورچوئل نیوز کانفرنس میں ڈبلیو ایچ او کے یورپ ڈویژن نے اپنی پالیسی بریف کے حوالے سے ایک مسودہ جاری کیا جس میں بتایا گیا تھا کہ کس طرح خطے کے ممالک ان مریضوں کو دیکھ رہے ہیں جن میں ابھی تک کووڈ نائینٹین کی طویل مدتی علامات پائی جاتی ہیں۔
ڈبلیو ایچ او کے یورپ کیلئے ڈائریکٹر ہینز کلاگ کا کہنا تھا کہ' لانگ کووڈ' میں ایسی علامات ظاہر ہوتی ہیں جن میں سخت تھکن کا احساس، سینے میں درد، سردرد، بھول جانا، ڈپریشن، سونگھنے کی حس ختم ہونا، بار بار بخار آنا، دست لگنا، اور کانوں میں آوازیں سنائی دینا وغیرہ شامل ہیں۔
پالیسی بریف میں کہا گیا ہے کہ ابھی تک حاصل ہونے والا ڈیٹا ظاہر کرتا ہے کہ کووڈ نائینٹین وبا کی لپیٹ میں آنے والے ہر چار میں سے ایک مریض میں، پہلے پہل علامات ظاہر ہونے کے ایک ماہ بعد بھی وہی علامات ظاہر ہو رہی ہیں، جب کہ ہر 10 میں ایک مریض میں 12 ہفتے کے بعد بھی علامات موجود ہیں۔