امریکہ میں کرونا کی تیسری ویکسین منگل سے دستیاب ہو گی
امریکہ میں کرونا وائرس کی تیسری ویکسین منگل سے ویکسی نیشن سینٹرز پر دستیاب ہو گی جب کہ حکام کیسز میں اضافے کے خدشات کا بھی اظہار کر رہے ہیں۔
امریکی ریگیولیٹرز نے دوا ساز کمپنی جانسن اینڈ جانسن کی تیار کردہ ویکسین کی ہنگامی بنیاد پر استعمال کی اجازت دی تھی۔ اس کمپنی کی لگ بھگ 40 لاکھ خوراکیں منگل سے مختلف ویکسی نیشن سینٹر پر دستیاب ہونے کی توقع ہے۔
امریکہ میں گزشتہ چند ہفتوں کے دوران کیسز میں اموات کی تعداد میں نمایاں کمی کے بعد ایک مرتبہ پھر اضافہ دیکھا جا چکا ہے۔
امریکہ میں کیسز میں اضافہ ایسے موقع پر ہو رہا ہے جب بیشتر ریاستیں پابندیوں میں نرمی کر رہی ہیں۔
امریکہ میں اب بھی کرونا سے یومیہ دو ہزار سے زیادہ اموات اور لگ بھگ 70 ہزار کیسز یومیہ رپورٹ ہو رہے ہیں۔
ماہرین کرونا کی نئی قسم کے کیسز رپورٹ ہونے پر بھی خدشات کا اظہار کر رہے ہیں۔
امریکہ میں بیماریوں کی روک تھام اور پیشگی معلومات اکٹھی کرنے کے ادارے سینٹر فار ڈیزیز کنٹرول اینڈ پریونشن سی ڈی سی کے ڈائریکٹر روشیل ویلنسکی کا کہنا ہے کہ کرونا وائرس کی روک تھام ممکن بنائی جا سکتی ہے تاہم پابندیوں میں نرمی کرنے کا یہ مناسب وقت نہیں۔
برطانیہ میں دو کروڑ افراد کو کرونا ویکسین لگا دی گئی
برطانوی حکام کے مطابق اب تک لگ بھگ دو کروڑ برطانوی شہریوں کو کرونا وائرس سے بچاؤ کی ویکسین کی پہلی خوراک لگائی جا چکی ہے۔ حکام کا دعویٰ ہے کہ یورپی ممالک کے مقابلے میں برطانیہ کی ویکسی نیشن مہم زیادہ تیز ہے۔
وزیرِ اعظم بورس جانسن نے اسے پوری قوم کی ایک بڑی کامیابی قرار دیا ہے۔ ایک بیان میں اُن کا کہنا تھا کہ طبی عملہ، رضاکار اور مسلح افواج کو اس کا کریڈٹ جاتا ہے۔
جانسن نے عوام پر زور دیا کہ جیسے ہی کال موصول ہو، عوام یہ ویکسین ضرور لگائیں کیوں کہ یہ کرونا سے لڑنے کا مؤثر ہتھیار ہے۔
برطانیہ میں اب تک کرونا سے ایک لاکھ 22 ہزار سے زائد اموات ہو چکی ہیں۔ ملک میں اب تک آٹھ لاکھ سے زائد افراد کو ویکیسن کی دوسری خوراک بھی لگ چکی ہے۔
برطانوی حکام لاک ڈاؤن کے تحت پابندیوں کو جون تک بتدریج ہٹانے کا ارادہ رکھتے ہیں۔
پاکستان میں کرونا سے مزید 36 ہلاکتیں، میرپور میں ایک ہفتے کا لاک ڈاؤن
پاکستان میں کرونا وائرس کے مزید 1392 کیس رپورٹ ہوئے ہیں جس کے بعد ملک بھر میں مجموعی طور پر رپورٹ ہونے والے کیسز کی مجموعی تعداد پانچ لاکھ 81 ہزار 365 ہو گئی ہے۔
نیشنل کمانڈ اینڈ آپریشن سینٹر (این سی او سی) کے مطابق ملک بھر میں اب تک کرونا کی تشخیص کے لیے 89 لاکھ سے زائد ٹیسٹ کیے جا چکے ہیں۔
ادھر بڑھتے ہوئے کیسز کے پیشِ نظر پاکستان کے زیرِ انتظام کشمیر کے شہر میر پور میں حکام نے ایک ہفتے کا لاک ڈاؤن لگا دیا ہے۔
مقامی میڈیا کے مطابق میر پور کے ڈپٹی کمشنر کے مطابق میر پور میں تمام تعلیمی ادارے اور پبلک ٹرانسپورٹ دو ہفتے تک بند رہے گی۔
شہر میں پیٹرول پمپس، کریانہ اسٹور اور دیگر ضروری اشیا کی دکانیں کھلی رہیں گی۔
شہر کے شادی ہالز بھی ایک ماہ تک بند رہیں گے۔
بھارت: کرونا ویکسی نیشن مہم کا دائرہ وسیع، مودی نے بھی ٹیکہ لگوا لیا
بھارت میں کرونا ویکسی نیشن کی مہم کا دائرہ وسیع ہو گیا ہے۔ ہیلتھ ورکز کے بعد اب ویکسین اُن معمر افراد کو دی جا رہی ہے جنہیں طبی پیچیدگیوں کا سامنا ہے۔
پیر کو بھارت کے وزیرِ اعظم نریندر مودی نے بھی کرونا ویکسین لگوا لی ہے۔
ویکسی نیشن مہم کے دوسرے مرحلے میں 60 سال سے زائد عمر اور 45 برس سے زیادہ عمر کے اُن افراد کو ویکسین دی جائے گی جو امراضِ قلب یا ذیابیطس کے شکار ہیں۔
مذکورہ دونوں بیماریوں کے شکار افراد کو کرونا کی صورت میں جان سے ہاتھ دھو بیٹھنے کا خدشہ زیادہ ہوتا ہے۔
بھارت کے سرکاری اسپتالوں میں کرونا ویکسین مفت فراہم کی جا رہی ہے جب کہ 10 ہزار سے زائد نجی اسپتالوں میں یہ ویکسین 250 روپے میں لگوائی جا سکتی ہے۔
ستر سالہ بھارتی وزیرِ اعظم نے پیر کو نئی دہلی کے آل انڈیا انسٹی ٹیوٹ آف میڈیکل سائنس میں ویکسین لگوانے کے بعد اپنے ایک ٹوئٹ میں کہا کہ ایک ساتھ مل کر بھارت کو کرونا سے پاک بنائیں۔