بھارت: مرکزی حکومت کی ریاستوں کو ویکسی نیشن مہم میں تیزی کی ہدایت
بھارت کی مرکزی حکومت نے مقامی حکام کو ہدایت کی ہے کہ جن علاقوں میں کرونا وائرس کے کیسز کی تعداد میں اضافہ ہو رہا ہے وہاں ویکسی نیشن مہم میں تیزی لائی جائے۔
حکومت کا کہنا ہے کہ ان علاقوں میں نئی دہلی بھی شامل ہے جہاں کئی ہفتوں سے کیسز کی تعداد میں مسلسل اضافہ ہو رہا ہے۔
حکومت کے مطابق نئی دہلی، ہریانہ، آندھرا پردیش، اڑیسہ، ہماچل پردیش، اتراکھنڈ، گوا اور چندی گڑھ کی ریاستوں کے 60 اضلاع باعث تشویش ہیں۔
حکومت کے مطابق ’ان اضلاع میں ٹیسٹس کی تعداد میں کمی، ہفتہ وار مثبت کیسز کی شرح میں اضافہ اور کرونا وائرس کیسز کی کانٹیکٹ ٹریسنگ میں کمی دیکھنے کو مل رہی ہے۔
حکومت کا یہ بھی کہنا تھا کہ ان اضلاع سے ارد گرد کے اضلاع میں وائرس کے پھیلنے کا خدشہ ہے۔
بھارت امریکہ کے بعد دنیا بھر میں وائرس سے سب سے زیادہ متاثرہ ملک ہے جہاں اب تک ڈیڑھ لاکھ سے زائد افراد ہلاک ہو چکے ہیں۔
ملک میں جنوری کے وسط میں ویکسی نیشن مہم شروع ہوئی اور اب تک ایک کروڑ 20 لاکھ طبی عملے کے ارکان کو ویکسین لگائی جا چکی ہے۔
بھارت اپنی ایک ارب 35 لاکھ آبادی میں سے 30 کروڑ افراد کو اگست تک ویکسین دینے کا منصوبہ رکھتا ہے۔
امریکی والدین بچوں کی آن لائن تعلیم سے خوش کیوں نہیں؟
امریکہ میں تعلیمی اداروں کی بندش کو مارچ میں سال مکمل ہو رہا ہے۔ اب مختلف ریاستوں میں والدین اور اساتذہ اسکول دوبارہ کھولنے کا مطالبہ لیے احتجاج کر رہے ہیں۔ ان والدین کے تحفظات کیا ہیں اور بائیڈن انتظامیہ نے بند تعلیمی ادارے کھولنے کے لیے کیا حکمت عملی اختیار کی ہے؟ دیکھیے عمران جدون کی رپورٹ میں۔
کھلاڑیوں کے مزید کرونا ٹیسٹ مثبت آنے پر پی ایس ایل 6 ملتوی
پاکستان کرکٹ بورڈ (پی سی بی) نے جمعرات کو مزید تین کھلاڑیوں میں کرونا وائرس کی تشخیص کے بعد سپر لیگ کے چھٹے ایڈیشن کو غیر معینہ مدت تک کے لیے ملتوی کر دیا ہے۔
پی ایس ایل 6 میں شریک چھ کھلاڑیوں اور ایک سپورٹنگ اسٹاف کا کرونا ٹیسٹ مثبت آیا تھا۔ متاثرہ کھلاڑیوں میں غیر ملکی کھلاڑی بھی شامل ہیں۔
بائیو ببل کے باوجود کرونا کیسز میں اضافے کے باعث پی سی بی نے جمعرات کو ایونٹ ملتوی کرنے کا فیصلہ کیا۔ اس حوالے سے پی سی بی نے تمام فرنچائز مالکان کو ورچوئل اجلاس میں اعتماد میں بھی لیا ہے۔
بیس فروری سے شروع ہونے والے ایونٹ میں مجموعی طور پر 34 میچز کھیلے جانے تھے۔ تاہم ایونٹ میں اب تک صرف 14 میچز ہی کھیلے گئے تھے۔
بائیو سیکیور ببل میں رہنے کے باوجود پیر کو آسٹریلوی کرکٹر فواد احمد کا ٹیسٹ مثبت آنے کے بعد ہی ایونٹ کے مستقبل پر سوالات اٹھنے لگے تھے۔
بعدازاں منگل کو مزید دو غیر ملکی کھلاڑیوں اور ایک سپورٹنگ اسٹاف میں کرونا کی تشخیص ہوئی اور جمعرات کو پی سی بی نے اپنے ایک اعلامیے میں مزید تین کھلاڑیوں کے کرونا ٹیسٹ مثبت آنے کی تصدیق کی۔
پی سی بی کے مطابق کرونا کے نئے متاثرہ کھلاڑیوں میں بدھ کی شام کرونا کی علامات ظاہر ہوئی تھیں جن کے بعد اُن کا ٹیسٹ کیا گیا جو مثبت آیا۔