امریکہ میں اموات کی تعداد پانچ لاکھ 29 ہزار سے متجاوز
امریکہ میں کرونا وائرس سے اموات کی تعداد پانچ لاکھ 29 ہزار سے تجاوز کر گئی ہے۔
امریکہ کی 'جان ہاپکنز یونیورسٹی' کے اعداد و شمار کے مطابق گزشتہ 24 گھنٹوں میں ملک بھر میں وبا سے مزید 1564 افراد ہلاک ہوئے جس کے بعد اموات کی مجموعی تعداد پانچ لاکھ 29 ہزار 267 ہو گئی ہے۔
خیال رہے کہ امریکہ میں جنوری میں اموات کی شرح میں ریکارڈ اضافہ ہوا تھا اور 12 جنوری کو 4465 افراد کے وبا کے باعث ہلاک ہونے کی تصدیق کی گئی تھی جو کہ 24 گھنٹوں میں ہلاک ہونے والوں کی سب سے زیادہ تعداد تھی۔ فروری میں اموات کی شرح میں کمی آںا شروع ہوئی۔
بوسنیا کی ویکسین کے حصول کی کوشش، جرمنی سے مدد کی درخواست
بوسنیا اور ہرزیگووینا نے جرمنی سے عالمی ادارۂ صحت (ڈبلیو ایچ او) کے کوویکس پروگرام کے ذریعے کرونا وائرس کی ویکسین کی فراہمی تیز کرنے میں مدد کے لیے کہا ہے اور عالمی ادارہ صحت کے اس پروگرام پر مایوسی کا اظہار کیا ہے۔
جرمنی کے دارالحکومت برلن میں جرمن ہم منصب ہائیکو ماس کے ہمراہ مشترکہ پریس کانفرنس میں بوسنیا کے وزیرِ خارجہ بیسرا ترکووچ نے کہا کہ بوسنیا نے ویکسین کی عالمی سطح پر فراہمی کے منصوبے کوویکس کو ادائیگی بھی کی ہے۔ لیکن ابھی تک اس پروگرام کے تحت ویکسین کی فراہمی نہیں ہوئی۔
بیسرا ترکووچ نے کہا کہ ہمارے شہری بجا طور پر ناخوش ہیں اور اسی وجہ سے جرمن وزیرِ خارجہ سے اس مسئلے کے حل کے لیے یورپی کمیشن کے ساتھ ثالثی میں مدد کے لیے کہا ہے۔
اس موقع پر جرمن وزیرِ خارجہ ہائیکو ماس نے کہا کہ کوویکس کے تحت مئی کے آخر تک 140 ممالک کو ویکسین فراہم کی جائے گی ان میں بوسنیا بھی شامل ہےایک لاکھ 30 ہزار خوراکیں فراہم کی جائیں گی۔
ہائیکو ماس نے کہا کہ وہ سمجھتے ہیں کہ کوویکس کے تحت ویکسین کی فراہمی منتظر ممالک میں تیزی سے نہیں ہو رہی۔
انہوں نے یہ بھی کہا کہ کچھ ممالک سیاسی حمایت کے بدلے مختلف ممالک کو ویکسین فراہم کر رہے ہیں۔ انہوں نے مخصوص ممالک کے نام نہیں لیے۔
یوکرائن کے پاس ویکسین موجود، شہری لگوانے کے لیے تیار نہیں
یوکرائن کو کرونا ویکسین کی پہلی کھیپ تو موصول ہو گئی ہے لیکن اسے ویکسین لگوانے کے لیے رائے عامہ ہموار کرنے میں دشواری کا سامنا ہے۔
امریکی خبر رساں ادارے 'ایسوسی ایٹڈ پریس' کے مطابق یوکرائن میں ایک جانب کیسز میں اضافہ ہوا ہے تو دوسری جانب شہریوں میں ویکسین لگوانے میں مخالفت میں بھی اضافہ ہوا ہے۔
یوکرائن کے کیف انٹرنیشنل انسٹیٹیوٹ آف سوشیالوجی نے رواں ماہ ایک سروے کے اعداد و شمار جاری کیے تھے جس میں سامنے آیا تھا کہ 60 فی صد شہری ویکسین نہیں لگوانا چاہتے۔
قبل ازیں کیے گئے سروے میں 40 فی صد شہریوں نے ویکسین نہ لگوانے کا عندیہ دیا تھا۔
یوکرائن کو فروری کے آخر میں اسٹرازینیکا ویکسین کی پانچ لاکھ خوارکیں موصول ہوئی ہیں۔ اس کے بعد سے اب تک صرف 23 ہزار 500 افراد کو ہی ویکسین لگائی جا سکی ہے۔
واضح رہے کہ یوکرائن کی آبادی چار کروڑ 10 لاکھ سے زائد ہے جن میں سے 14 لاکھ افراد وبا سے متاثر ہوئے ہیں جب کہ لگ بھگ 28 ہزار اموات ہوئی ہیں۔
حکام کے مطابق کرونا وائرس کے مریضوں کا علاج کرنے والے طبی عملے میں سے صرف 40 فی صد ہی ویکسین لگوانے کے لیے رضا مند ہیں۔
پنجاب میں بڑی عمر کے 70 لاکھ شہریوں کو ویکسین لگانے کا ہدف
پاکستان کے آبادی کے لحاظ سے سب سے بڑے صوبے پنجاب میں کرونا ویکسی نیشن کی مہم میں دوسرے مرحلے میں 70 لاکھ افراد کو ویکسین لگانے کا ہدف مقرر کیا گیا ہے۔
واضح رہے کہ پاکستان کو اب تک چین سے ویکسین کی پانچ لاکھ خوراکیں تحفے میں ملی ہیں، جن میں سے پہلے مرحلے میں طبی عملے کو ویکسین لگائی جا چکی ہے۔
اس حوالے سے پنجاب کے سیکریٹری پرائمری اینڈ سیکنڈری ہیلتھ کیئر محمد عثمان نے بتایا کہ صوبے بھر میں ضلع اور تحصیل کی سطح پر 104 سینٹرز فعال ہیں۔ بزرگ شہریوں کی سہولت کے لیے ویکسی نیشن سینٹرز نمایاں مقامات پر بنائے گئے ہیں۔
ان کے بقول لاہور کے ایکسپو سینٹر میں 20 ویکسی نیشن کاؤنٹرز قائم ہیں۔ ضرورت پڑی تو کاؤنٹرز کی تعداد میں اضافہ کیا جائے گا۔
انہوں نے کہا کہ پنجاب بھر میں اب تک ڈیڑھ لاکھ سے زائد بزرگ شہری رجسٹرڈ ہو چکے ہیں۔