ٹوکیو اولمپکس: غیر ملکی شائقین کی آمد پر پابندی کا اعلان
ٹوکیو اولمپکس کے منتظمین نے اعلان کیا ہے کہ کرونا وبا کے سبب رواں سال ہونے والے اولمپکس میں غیر ملکی شائقین کو آنے کی اجازت نہیں ہو گی۔
منتظم کمیٹی کے چیف ایگزیکٹو توشیرو موتو کا ہفتے کو صحافیوں سے گفتگو میں کہنا تھا کہ غیر ملکی شائقین کی جانب سے خریدے گئے چھ لاکھ ٹکٹس ری فنڈ کر دیے جائیں گے۔
توشیرو موتو کے مطابق پیرا اولمپکس کے لیے خریدے گئے تین لاکھ ٹکٹس کی رقوم بھی واپس کر دی جائیں گی۔ البتہ، انہوں نے یہ نہیں بتایا کہ اس مد میں کتنی رقم شائقین کو واپس کی جائے گی۔
اولمپک گیمز کو گزشتہ سال کرونا وبا کے سبب ملتوی کیا گیا تھا۔ جس کا انعقاد رواں سال 23 جولائی سے آٹھ اگست تک کیا جائے گا جب کہ پیرا اولمپک کے مقابلے 24 اگست سے پانچ ستمبر کے درمیان ہوں گے۔
چین ایک ہفتے میں ایک کروڑ افراد کی ویکسی نیشن
دنیا میں کرونا وبا سے سب سے پہلے متاثر ہونے والے ملک چین میں کرونا سے بچاؤ کی ویکسی نیشن مہم تیزی سے جاری ہے اور ایک ہفتے کے دوران ایک کروڑ چینی شہریوں کو ویکسین لگائی گئی ہے۔
دوسری جانب حکام کا کہنا ہے کہ وہ کرونا وبا کی صورتِ حال اور ویکسی نیشن مہم کو دیکھتے ہوئے مختلف ممالک کے لیے ویزہ پالیسی ترتیب دے رہے ہیں۔
چینی وزارتِ صحت کے ترجمان می فینگ کا کہنا ہے کہ ہفتے تک ملک بھر میں سات کروڑ 49 لاکھ 60 ہزار کو ویکسین لگا دی گئی ہے۔ چین دنیا میں ویکسی نیشن مہم شروع کرنے والا پہلا ملک تھا تاہم اس کے بعد ویکسی نیشن مہم شروع کرنے والے امریکہ اور اسرائیل میں شہریوں کو ویکسین لگانے کی شرح اب چین سے زیادہ ہے۔
محکمہ صحت کے ترجمان می فینگ نے ایک نیوز بریفنگ میں بتایا کہ ہفتے تک ویکسین کی سات کروڑ 49 لاکھ 60 ہزار خوراکیں لگائی جاچکی تھیں۔
چینی حکام کا کہنا ہے کہ اس سال کے وسط تک ایک ارب 40 کروڑ کی مجموعی آبادی کے 40 فی صد کو ویکسین لگا دی جائے گی۔
میامی کے ساحل پر لوگوں کا ہجوم روکنے کے لیے کرفیو
کرونا وبا کا پھیلاؤ روکنے کے لیے حکام نے ہفتے کو ریاست فلوریڈا کے شہر میامی کے ساحل پر کرفیو لگا دیا جس سے موسمِ بہار کی چھٹیاں منانے کے لیے ساحل کا رُخ کرنے والوں کو مایوسی کا سامنا کرنا پڑا۔
حکام کا کہنا ہے کہ ویک اینڈ پر بڑی تعداد میں لوگ میامی کے ساحل کا رُخ کر رہے تھے جس کی وجہ سے کرونا کے پھیلاؤ کے خدشات جنم لے رہے تھے۔
شہری انتظامیہ نے اعلان کیا ہے کہ یہ پابندی 72 گھنٹے تک برقرار رہے گی۔ پابندی کے تحت سیاحوں کے پرکشش مقام ساؤتھ بیچ کے ہوٹل اور ریستوران آٹھ بجے بند کر دیے جائیں گے جب کہ ساؤتھ بیچ کو ملانے والے تین بڑے پل بھی رات 10 بجے بند کر دیے جائیں گے۔
البتہ، مقامی افراد اور ریستورانوں پر کام کرنے والے افراد کو اس پابندی سے استثنٰی ہو گا۔
مقامی انتظامیہ کا کہنا ہے کہ اس سال میامی کے ساحل پر لوگوں کا رش گزشتہ سال کی نسبت زیادہ تھا جس کی وجہ کئی ریاستوں میں سرد موسم اور کرونا پاببدیاں ہیں۔ لہذٰا لوگ جوق در جوق میامی کا رُخ کر رہے ہیں۔
کرونا پابندیوں کے خلاف مختلف یورپی ملکوں میں مظاہرے، لندن میں درجنوں گرفتاریاں
کرونا وبا کے پیشِ نظر عائد کردہ پابندیوں کے خلاف ہفتے کو برطانیہ اور کئی یورپی ممالک میں شہری سڑکوں پر نکل آئے۔ برطانیہ اور جرمنی میں مظاہرین اور پولیس کے درمیان جھڑپیں بھی ہوئی ہیں۔
برطانیہ کے دارالحکومت لندن میں لوگوں کے جمع ہونے پر پابندی کے باوجود احتجاج کرنے پر پولیس نے درجنوں مظاہرین کو گرفتار کر لیا۔
کرونا وبا کی تیسری لہر کے دوران لاک ڈاؤن کے خلاف یورپ کے دیگر ممالک آسٹریا، بیلجیم، کروشیا، فن لینڈ، پولینڈ، رومانیہ، سوئیڈن اور سوئٹزر لینڈ میں بھی مظاہرے کیے گئے۔
کیسل میں مظاہروں میں 20 ہزار سے زائد مظاہرین نے شرکت کی اس دوران مظاہرین اور پولیس کے درمیان جھڑپیں بھی ہوئیں۔
کیسل کے مرکزی حصے میں مظاہرین نے عدالتی پابندی کے باوجود مظاہرہ کیا اور مظاہرین کی اکثریت نے کرونا وبا سے محفوظ رہنے کے لیے لازمی ماسک بھی نہیں پہنے تھے۔
جرمن ذرائع ابلاغ کے مطاابق کچھ مظاہرین نے پولیس افسران اور صحافیوں پر حملے بھی کیے۔
پولیس نے مظاہرین کو منتشر کرنے کے لیے واٹر کینن کا بھی استعمال کیا۔
یورپ کے کئی شہروں میں ہفتے کو کرونا پابندیوں کے خلاف احتجاج کی کال دی گئی تھی۔