برطانیہ سے بیرونِ ملک سفر کرنے والوں پر پانچ ہزار پونڈ جرمانہ ہو گا
برطانیہ سے بیرونِ ملک غیر ضروری طور پر سفر کرنے والوں پر پانچ ہزار پونڈ جرمانہ ہو گا۔
برطانیہ میں کرونا وائرس کی روک تھام کے لیے کی جانے والی حالیہ قانون سازی کا اطلاق آئندہ ہفتے سے ہو گا جس کے نفاذ کے بعد بیرونِ ملک چھٹیاں گزارنے پر پابندی ہوگی۔
برطانیہ میں چھٹیوں کے سیزن کے آغاز سے قبل حکومت کی جانب سے لوگوں کو گھروں میں رہنے اور غیر ضروری طور پر بیرونِ ملک سفر سے گریز کی ہدایت کی جا رہی ہے۔
سالانہ تعطیلات سے قبل برطانیہ میں کرونا قانون کا اطلاق آئندہ ہفتے سے ہو گا جس کے نفاذ کے بعد شہری چھٹیاں گزارنے بیرون ملک نہیں جا سکیں گے اور یہ قانون جون کے اختتام تک نافذ رہے گا۔
وزیرِ اعظم بورس جانسن نے پیر کو خبردار کیا تھا کہ یورپ کو کرونا وائرس کی تیسری لہر کا سامنا ہے۔ تاہم برطانوی حکومت کا یہ بھی کہنا ہے کہ 17 مئی یا اس سے قبل ہی تعطیلات کی اجازت دی جا سکتی ہے۔
پاکستان میں مزید 72 اموات، تین ہزار سے زیادہ کیسز رپورٹ
پاکستان میں گزشتہ 24 گھنٹوں کے دوران کرونا وائرس کے شکار مزید 72 مریض دم توڑ گئے ہیں جب کہ تین ہزار 270 افراد میں وائرس کی تشخیص ہوئی ہے۔
پاکستان کو کرونا وائرس کی تیسری لہر کا سامنا ہے اور وبا پر قابو پانے کے لیے حکومت کی جانب سے پابندیوں میں اضافہ بھی کیا جا رہا ہے۔
سرکاری اعداد و شمار کے مطابق پاکستان میں عالمی وبا سے ہلاکتوں کی کل تعداد 13 ہزار 935 تک پہنچ گئی ہے جب کہ کیسز کی مجموعی تعداد چھ لاکھ 33 ہزار سے زیادہ ہے۔
حکام کا کہنا ہے کہ پانچ لاکھ 85 ہزار سے زیادہ مریض صحت یاب ہو چکے ہیں۔ البتہ 2485 مریضوں کی حالت تشویشناک ہے۔
'کروناویک ویکسین بچوں کے لیے بھی مؤثر ہے'
چین کی دوا ساز کمپنی سائنوویک نے کہا ہے کہ اس کی تیاری کردہ کرونا ویکسین 'کروناویک' محفوظ ہونے کے ساتھ ساتھ تین سے 17 سال کی عمر کے بچوں کے لیے مؤثر ہے۔
کمپنی کے میڈیکل ڈائریکٹر گینگ زینگ کے مطابق ویکسین کے کلینیکل ٹرائل 550 سے زائد افراد پر کیے گئے جس کے بعد نتیجہ اخذ کیا گیا ہے کہ یہ بچوں کے لیے بھی اسی طرح مفید ہے۔
انہوں نے بتایا کہ ٹرائل کے دوران دو بچوں میں تیز بخار کی شکایت نوٹ کی گئی جن کی عمریں تین اور چھ برس تھی جب کہ دیگر رضاکار بچوں میں معمول کی علامات دیکھی گئیں۔
مذکورہ ویکسین کو چین میں بالغوں کے لیے استعمال کیا جا رہا ہے جب کہ بچوں کو ویکسین دینے سے متعلق مزید کلینیکل ٹرائل کی ضرورت تھی۔
چین سمیت دنیا کے مختلف ملکوں میں سائنوویک ویکسین کی سات کروڑ سے زائڈ خوراکیں لگائی جا چکی ہیں۔
جرمنی: لاک ڈاؤن میں 18 اپریل تک توسیع
جرمنی نے لاک ڈاؤن میں مزید ایک ماہ کی توسیع کرتے ہوئے پابندیوں میں نئی سختیاں شامل کر لی ہیں۔
جرمن چانسلر انگلا مرکل نے منگل کو 16 ریاستوں کے گورنروں سے بذریعہ ویڈیو کال بات کرتے ہوئے کرونا وائرس کے پھیلاؤ پر بات چیت کی۔ بعدازاں جرمن چانسلر نے اعلان کیا کہ کیسز میں اضافے کو دیکھتے ہوئے لاک ڈاؤن 18 اپریل تک برقرار رہے گا۔
جرمنی میں عالمی وبا کی روک تھام کے سلسلے میں عائد کردہ لاک ڈاؤن کی مدت 28 مارچ کو مکمل ہونا تھی۔ لیکن حکومت نے نئی پابندیوں میں ایسٹر کے موقع پر بڑے اجتماعات پر پابندیاں بھی شامل کر لی ہیں۔
انگلا مرکل نے برلن میں صحافیوں سے گفتگو بھی کی اور کہا کہ ہمیں ایک نئی وبا کا سامنا ہے جو کرونا وائرس کی طرح کی ہے لیکن اس کے نقصانات اموات اور بڑھتے کیسز کی صورت میں کئی گنا زیادہ ہیں۔
یاد رہے کہ برطانیہ میں پائی جانے والی کرونا کی قسم جرمنی میں تیزی سے پھیل رہی ہے جس کی وجہ سے یومیہ کیسز میں بھی اضافہ ہو رہا ہے۔