کرونا وائرس نے ترقی کے اہداف کو دس سال پیچھے دھکیل دیا: اقوامِ متحدہ
کرونا بحران نے عالمی معیشت کو گزشتہ 90 سال کی بد ترین کساد بازاری میں دھکیل دیا ہے اور معاشروں کے غیر محفوظ طبقے اور کم ترقی یافتہ ممالک کے عوام کے بری طرح متاثر ہونے سے یکساں ترقی کا خواب مزید دھندلا پڑ گیا ہے۔
ساٹھ عالمی تنظیموں کی تیار کردہ تازہ ترین رپورٹ 'سسٹین ایبل ڈویلپمنٹ رپورٹ 2021' میں کہا گیا ہے کہ عالمی سطح پر اقتصادی سرگرمیوں کا رک جانا اور اس بحران سے مقابلے کے لیے دنیا کی امیر اور کم ترقی یافتہ ممالک کی صلاحیت میں پہلے سے موجود فرق ، یہ دو ایسے عوامل ہیں جنہوں نے اقتصادی امکانات کو مزید سخت ٹھیس پہنچائی ہے۔
رپورٹ مرتب کرنے والی ٹاسک فورس نے اقوام متحدہ کو بتایا ہے کہ عالمی وبا سے تقریباً ساڑھے گیارہ کروڑ ملازمتوں کے مواقع غائب ہو گئے ہیں جب کہ 12 کروڑ سے زائد افراد انتہائی غربت کے چنگل میں جا پھنسے ہیں۔
آصف زرداری نے ویکسین لگوا لی
کرونا بحران، ایشیائی امریکی طبی عملے کو بھی امتیازی رویوں کی شکایت
امریکہ میں صحت کے شعبے سے وابستہ ایشیائی امریکی عملے کو گزشتہ ایک سال کرونا کی وبا کے دوران نفرت پر مبنی حملوں کا سامنا کرنا پڑا ہے۔ کرونا وائرس کے بارے میں خیال کیا جاتا ہے کہ اس کا آغاز چین کے شہر ووہان سے ہوا تھا۔
ایشیائی امریکیوں کے حقوق کے لیے آواز بلند کرنے والے ادارے "اسٹاپ اے اے پی آئی ہیٹ" نے ایک رپورٹ جاری کی ہے جس کے مطابق گزشتہ برس مارچ سے رواں سال فروری کے دوران ایشیائی امریکیوں کے خلاف نفرت پر مبنی 3795 حملے کیے گئے۔
ان حملوں میں سے 500 واقعات رواں برس کے آغاز سے فروری کے آخر تک ریکارڈ کیے گئے۔
ایشیائی امریکی شہریوں کے خلاف گزشتہ ہفتے اٹلانٹا میں ہونے والے حملوں میں چھ ایشیائی خواتین ہلاک ہوئی تھیں۔
پاکستان میں دسمبر 2020 کے بعد ریکارڈ اموات
پاکستان میں گزشتہ چوبیس گھنٹوں کے دوران کرونا وائرس کے شکار مزید 100 مریض دم توڑ گئے ہیں۔ ایک روز کے دوران اموات کی یہ تعداد 23 دسمبر 2020 کے بعد سب سے زیادہ تعداد ہے۔
سرکاری اعداد و شمار کے مطابق پاکستان میں کرونا سے ہلاکتوں کی مجموعی تعداد 14 ہزار 356 تک پہنچ گئی ہے۔
عالمی وبا سے پاکستان میں مزید چار ہزار 84 مریض متاثر ہوئے ہیں جس کے بعد کیسز کی مجموعی تعداد چھ لاکھ 63 ہزار 200 ہو گئی ہے۔
حکام کا کہنا ہے کرونا کے شکار چھ لاکھ 278 مریض صحت یاب ہو چکے ہیں جب کہ ملک میں ایکٹو کیسز کی تعداد 45 ہزار سے زیادہ ہے۔
پاکستان میں گزشتہ چوبیس گھنٹوں میں 46 ہزار 269 افراد کے کرونا ٹیسٹ کیے گئے اور اب تک ایک کروڑ 15 لاکھ سے زیادہ کرونا ٹیسٹ کیے جا چکے ہیں۔