پاکستان میں پانچ ہزار سے زیادہ کیسز رپورٹ
پاکستان میں گزشتہ چوبیس گھنٹوں کے دوران کرونا وائرس کے پانچ ہزار 857 کیسز رپورٹ ہوئے ہیں جب کہ وبا کے شکار مزید 98 مریض دم توڑ گئے ہیں۔
سرکاری اعداد و شمار کے مطابق گزشتہ چوبیس گھنٹوں میں 57 ہزار 591 افراد کے کرونا ٹیسٹ کیے گئے جن میں مثبت کیسز کی شرح دس اعشاریہ ایک چھ فی صد رہی۔
پاکستان میں عالمی وبا سے اب تک 16 ہزار 698 افراد ہلاک اور سات لاکھ 78 ہزار سے زیادہ کیسز رپورٹ ہو چکے ہیں۔
کرونا کی برطانوی قسم کراچی پہنچ گئی
وزیرِ صحت سندھ عذرا پیچوہو نے کہا ہے کہ کرونا وائرس کی برطانوی قسم کراچی پہنچ گئی ہے اور اب تک جو ٹیسٹ ہوئے ہیں ان میں 50 فی صد کیسز میں یہ قسم پائی گئی ہے۔
بھارت: ریاست مہاراشٹرا میں ایک اسپتال میں آکسیجن لیک، 22 کرونا مریض ہلاک
بھارت میں کرونا بحران کے دوران اس وقت ایک بڑا حادثہ پیش آیا جب ریاست مہاراشٹرا کے شہر ناسک میں ایک اسپتال کے باہر آکسیجن ٹینکر کے لیک ہونے سے کرونا وائرس کے 22 مریض آکسیجن کی عدم دستیابی سے ہلاک ہو گئے۔
کلکٹر سورج مندھارے نے بھارت کے نشریاتی ادارے ’این ڈی ٹی وی‘ کو بتایا کہ ناسک میں ذاکر حسین میونسپل اسپتال میں یہ حادثہ پیش آیا ہے۔ حادثے کے وقت اسپتال میں 171 مریض تھے اور 31 مریضوں کو آکسیجن کی ضرورت تھی۔
ناسک میونسپل کارپوریشن کے کمشنر کیلاش جادھو نے میڈیا سے بات کرتے ہوئے کہا کہ ٹینکر لیک ہونے کی وجہ سے نصف گھنٹے تک آکسیجن کی سپلائی بند رہی جس کی وجہ سے وینٹی لیٹرز پر موجود مریضوں کی اموات ہوئیں۔
پاکستان میں جمعے سے نئی پابندیوں کا عندیہ
پاکستان کے وفاقی وزیر برائے منصوبہ بندی اسد عمر نے کہا ہے کہ نیشنل کمانڈ اینڈ آپریشن سینٹر نے کچھ نئے فیصلے کیے ہیں جس کے مطابق جمعے سے ملک میں نئی بندشوں کا آغاز کریں گے۔
اسلام آباد میں پریس کانفرنس کے دوران اسد عمر نے کہا کہ حکومتی کوششوں کے نتیجے میں کرونا کے پھیلاؤ کو قدرے کم کیا ہے لیکن رواں ہفتے کیسز اور اموات کی شرح میں اضافہ ہوا ہے جب کہ اسپتالوں میں مثبت کیسز کی وجہ سے دباؤ بھی بڑھا ہے۔
انہوں نے کہا کہ کرونا کیسز میں اضافے کی وجہ سے بڑے بڑے شہر بند کرنا پڑیں گے تاہم ابھی بڑے شہر بند نہیں کر رہے لیکن چند دن کی گنجائش باقی رہ گئی ہے۔
اسد عمر کے مطابق کراچی میں کیسز کی شرح 13 اور حیدر آباد میں 14 فی صد ہے۔ وفاقی حکومت صوبوں کی مدد کے لیے تیار ہے۔
وفاقی وزیر منصوبہ بندی نے عندیہ دیا کہ اگر وبا کے پھیلاؤ کو نہ روکا تو بڑے شہر بند کرنے کے سوا کوئی راستہ نہیں ہو گا۔