امریکہ: 116 ممالک سفر نہ کرنے والی ایڈوائزری لسٹ میں شامل
امریکی محکمۂ خارجہ نے رواں ہفتے مزید 116 ممالک کو سفر نہ کرنے والی ایڈوائزری لسٹ میں شامل کر لیا ہے۔
ان ممالک میں برطانیہ، کنیڈا، فرانس، اسرائیل، میکسیکو، جرمنی اور دیگر شامل ہیں۔ اس فہرست میں شامل ممالک کے بارے میں بتایا گیا ہے کہ وہاں تیزی سے وبا پھیل رہی ہے۔
اس سے قبل محکمۂ خارجہ کی سفر نہ کرنے والی ایڈوائزری میں 34 ممالک شامل تھے جنہیں سفر کے لیے غیر موزوں قرار دیا گیا تھا تاہم اب یہ تعداد 150 ہو گئی ہے۔
سفر کے لیے غیرموزوں قرار دیے جانے والے دیگر ممالک میں فن لینڈ، مصر، بیلجیئم، ترکی، اٹلی، سوئیڈن، سوئٹزرلینڈ اور اسپین بھی شامل ہیں۔
کچھ ممالک جیسے چین اور جاپان بدستور لیول تھری کیٹیگری میں شامل ہیں جس کا مطلب ان ملکوں کا سفر کرنے والے اپنے پروگرام پر نظرثانی کریں۔
جرمنی: کرونا پابندیوں کی خلاف ورزی پر 60 مظاہرین گرفتار
جرمن پارلیمنٹ کے باہر کرونا وائرس کی پابندیوں کی خلاف ورزی پر 60 مظاہرین کو حراست میں لے لیا گیا ہے۔
مظاہرین کرونا کی تیسری لہر کے پیش نظر چانسلر انجیلا مرکل کو سخت پابندیاں عائد کرنے کے اختیارات دینے سے متعلق بِل کے خلاف احتجاج کر رہے تھے۔
اس موقع پر پارلیمنٹ کے باہر پولیس اور مظاہرین کے درمیان جھڑپ بھی ہوئی جب کہ پولیس نے 60 افراد کو حراست میں لے لیا۔
پولیس ترجمان نے بتایا کہ مظاہرین نے ماسک نہیں پہنے ہوئے تھے اور وہ سماجی فاصلے کے اصولوں کی خلاف ورزی کر رہے تھے جس پر پولیس کا احتجاج ختم کرانا پڑا۔
کرونا کا نیا عالمی ریکارڈ، بھارت میں تین لاکھ سے زیادہ کیسز رپورٹ
بھارت میں گزشتہ چوبیس گھنٹوں کے دوران کرونا وائرس کے تین لاکھ 14 ہزار سے زیادہ کیسز رپورٹ ہوئے ہیں۔ ایک روز کے دوران سامنے آنے والے کیسز کی یہ تعداد نہ صرف بھارت بلکہ عالمی سطح پر یومیہ سب سے بڑی تعداد ہے۔
بھارت کو عالمی وبا کی دوسری لہر کا سامنا ہے جس کے دوران کیسز اور اموات کی شرح میں مسلسل اضافہ ہو رہا ہے۔
گزشتہ چوبیس گھنٹوں میں 2104 مریض ہلاک ہوئے ہیں جو ایک روز کے دوران ہلاکتوں کی ریکارڈ تعداد ہے۔
بھارت میں مسلسل آٹھویں روز دو لاکھ سے زیادہ کیسز سامنے آئے ہیں جب کہ کیسز کی مجموعی تعداد ایک کروڑ 59 لاکھ تک جا پہنچی ہے۔
یاد رہے کہ بھارت سے قبل امریکہ میں ایک روز کے دوران سب سے زیادہ کیسز رواں برس جنوری میں رپورٹ ہوئے تھے۔ کیسز کی یہ تعداد دو لاکھ 97 ہزار 430 تھِی۔
امریکی صدر بیرونِ ملک ویکسین کی ترسیل کے لیے پرعزم
امریکہ کے صدر جو بائیڈن نے کہا ہے کہ امریکہ کرونا وائرس کی ویکسین بیرونِ ملک فراہم کرنے سے متعلق کام کر رہا ہے۔
وائٹ ہاؤس میں صحافیوں سے گفتگو کرتے ہوئے بائیڈن نے کہا کہ "ہم دیگر ممالک کو ویکسین فراہم کرنے کے عمل میں ہیں جب کہ اس حوالے سے تھوڑا بہت کام مکمل کر لیا ہے۔"
امریکی صدر کا کہنا تھا کہ کچھ ایسی ویکسین ہیں جو ہم استعمال نہیں کر رہے لیکن انہیں دیگر ممالک کو ترسیل سے قبل ہمیں یہ فیصلہ کرنا ہے کہ ویکسین محفوظ ہے یا نہیں۔