بریٹ لی کا بھارت کے لیے ایک بٹ کوائن عطیہ کرنے کا اعلان
سابق آسٹریلوی فاسٹ بالر بریٹ لی نے بھارت میں آکسیجن کی خریداری کے لیے ایک بٹ کوائن عطیہ کرنے کا اعلان کیا ہے۔
بریٹ لی ان دنوں بھارت میں جاری انڈین پریمیئر لیگ میں کمنٹری کے فرائض انجام دے رہے ہیں۔ انہوں نے اپنے ایک ٹوئٹ میں کہا ہے کہ بھارت ان کا دوسرا گھر ہے اور وہ کرونا وائرس کے اس مشکل وقت میں بھارتی عوام کے ساتھ ہیں۔ ایک بٹ کوائن تقریباً چالیس لاکھ بھارتی روپوں کے برابر ہے۔
بریٹ لی دوسرے آسٹریلوی کرکٹر ہیں جنہوں نے بھارت کو آکسیجن کی خریداری کے لیے عطیہ دینے کا اعلان کیا ہے۔ اس سے قبل پیٹ کمنس نے 50 ہزار ڈالر دینے کا اعلان کیا تھا۔
کرونا وائرس کا پھیلاؤ پھر تیز: پاکستان کتنا تیار ہے؟
پاکستان میں کرونا وائرس کی تیسری لہر کے دوران یومیہ چار ہزار سے زیادہ کیسز رپورٹ ہو رہے ہیں۔ یومیہ ہلاکتوں کی تعداد بھی 100 سے بڑھ چکی ہے۔ پاکستان اس صورتِ حال سے نمٹنے کے لیے کیا کر رہا ہے؟ جانتے ہیں وزیرِ اعظم پاکستان کے مشیر برائے صحت ڈاکٹر فیصل سلطان سے۔
بھارت میں کرونا اموات کی تعداد سرکاری ریکارڈ سے کہیں زیادہ ہے: مبصرین
بھارت میں گزشتہ کئی روز سے کرونا کیسز کی یومیہ تعداد تین لاکھ سے اوپر آ رہی ہے۔ جب کہ وبا سے ہونے والی یومیہ اموات کی تعداد ڈھائی ہزار سے تین ہزار کے درمیان ہے۔
لیکن مبصرین کا کہنا ہے کہ کرونا سے ہونے والی اموات کی تعداد اس سے کہیں زیادہ ہے۔
ماہرین کے مطابق محکمۂ صحت کی جانب سے کرونا سے ہونے والی اموات کی جو تعداد بتائی جا رہی ہے وہ یقینی طور پر درست نہیں۔ اصل تعداد اس سے کہیں زیادہ ہے۔
ان کے مطابق ہمیں یہ نہیں معلوم کہ ان لوگوں کی تعداد کتنی ہے جو کرونا پازیٹیو ہونے کے باوجود بغیر ٹیسٹنگ کے انتقال کر گئے۔ یا جن کی ٹیسٹ رپورٹ اسپتالوں کی طرف سے عام نہیں کی گئی۔
پاکستان میں تعلیمی اداروں میں تمام امتحانات مؤخر
پاکستان کے وفاقی وزیرِ تعلیم شفقت محمود نے کہا ہے کہ کرونا وائرس کے پھیلاؤ کی وجہ سے ملک میں 15 جون تک کوئی تعلیمی امتحان منعقد نہیں ہو گا۔
منگل کو دارالحکومت اسلام آباد میں وزیرِ اعظم کے معاون خصوصی برائے صحت ڈاکٹر فیصل سلطان کے ہمراہ پریس کانفرنس سے خطاب کرتے ہوئے شفقت محمود نے کہا کہ اس دوران ہونے والے نویں سے بارہویں جماعت، اے اور او لیولز کے امتحانات ملتوی کردیے گئے ہیں اور اب یہ امتحانات اکتوبر اور نومبر میں ہوں گے۔
ان کا مزید کہنا تھا کہ او اور اے لیولز اور اے ایس کے امتحانات اکتوبر نومبر کے سائیکل میں ہوں گے۔ ان میں سے جو بچے پاکستان کی جامعات میں داخلہ لینا چاہتے ہیں ان کے لیے ہم نے یقینی بنایا کہ یونیورسٹی کے داخلے جنوری تک جاری رہیں۔
انہوں نے کہا کہ اس کے بعد مئی کے تیسرے ہفتے میں وبا کے پھیلاؤ کا جائزہ لے کر یہ فیصلہ کیا جائے گا کہ یہ امتحانات کب منعقد کیے جائیں۔
ڈاکٹر فیصل سلطان نے بتایا کہ آج انتہائی نگہداشت میں موجود مریضوں کی تعداد پانچ ہزار سے تجاوز کر گئی ہے اور وبا شروع ہونے کے بعد یہ ایسے مریضوں کی سب سے زیادہ تعداد ہے۔