پاکستان میں کرونا سے اموات 18 ہزار سے متجاوز
پاکستان میں کرونا وائرس کی تیسری لہر کی شدت جاری ہے اور ملک میں مزید چار ہزار 414 افراد میں وائرس کی تشخیص ہوئی ہے۔
سرکاری اعداد و شمار کے مطابق ملک میں گزشتہ 24 گھنٹوں میں 45 ہزار 275 افراد کے کرونا ٹیسٹ کیے گئے جس میں مثبت کیسز کی شرح 9.74 فی صد رہی۔
ملک میں اتوار کو کرونا وائرس سے 113 ہلاکتیں بھی ہوئی۔ اس طرح مجموعی اموات کی تعداد 18 ہزار 70 ہوگئی ہے۔
پاکستان میں کرونا وائرس کے فعال کیسز 89 ہزار 661 ہیں جب کہ پانچ ہزار چار سو اڑتالیس مریض کی نگہداشت میں ہیں۔
بھارت میں مزید تین لاکھ 92 ہزار سے زائد کیس
بھارت میں کرونا بحران کی تباہ کاریاں بدستور جاری ہے جب کہ اسپتالوں میں گنجائش کی کمی کے علاوہ شمشان گھاٹوں اور قبرستانوں میں بھی جگہ کم پڑ رہی ہے۔
دنیا میں کرونا وبا کا ہاٹ اسپاٹ سمجھے جانے والے بھارت میں گزشتہ 24 گھنٹوں میں مزید تین لاکھ 92 ہزار سے زائد کیسز اور تین ہزار چھ سو 89 ہلاکتیں رپورٹ ہوئی ہیں۔
حکام کے مطابق ملک میں گزشتہ 10 روز سے مسلسل تین لاکھ سے زائد یومیہ کیسز رپورٹ ہو رہے ہیں۔ اتوار کو رپورٹ ہونے والے ان نئے کیسز کے بعد مجموعی کیسز کی تعداد ایک کروڑ 95 لاکھ 60 ہزار ہو گئی ہے۔
وائرس سے اب تک دو لاکھ 15 ہزار 542 لوگ ہلاک بھی ہوئے ہیں۔
کرونا کے پھیلاؤ کو روکنے کے لیے لگ بھگ 10 ریاستوں اور وفاقی اکائیوں نے پابندیاں لگا دی ہیں اور مشرقی ریاست اڑیسہ میں بھی دو ہفتوں کا لاک ڈاؤن لگا دیا گیا ہے۔
بھارت میں ریکارڈ چار لاکھ سے زائد یومیہ کیسز رپورٹ، مزید ساڑھے تین ہزار اموات
بھارت میں کرونا کے یومیہ کیسز میں اضافہ جاری ہے گزشتہ 24 گھنٹوں کے دوران مزید چار لاکھ سے زائد افراد میں وبا کی تشخیص ہوئی ہے۔
بھارت میں ہفتے کو چار لاکھ ایک ہزار 993 مزید افراد میں وبا کی تشخیص ہوئی جس کے بعد بھارت یومیہ رپورٹ کیے جانے والے کیسز میں دنیا بھر میں سر فہرست آ گیا ہے۔
جنوبی ایشیائی ملک بھارت میں مسلسل دسویں روز تین لاکھ سے زائد یومیہ کیسز رپورٹ کیے گئے ہیں۔
وزارتِ صحت کے اعداد و شمار کے مطابق گزشتہ 24 گھنٹوں میں وبا کے باعث مزید تین ہزار 523 اموات ہوئیں۔ بھارت میں اب تک وبا سے ہلاک ہونے والوں کی تعداد 2 لاکھ 11 ہزار سے تجاوز کر چکی ہے۔
بھارت میں اب تک کرونا کے ایک کروڑ 80 لاکھ سے زائد کیسز رپورٹ کیے جا چکے ہیں۔
دوسری طرف بھارت میں اٹھارہ سال سے زائد افراد کے لیے کرونا ویکسین لگائے جانے کے عمل کا آغاز کر دیا گیا ہے۔
فرانس میں وائرس کی بھارتی قسم کی تشخیص
یورپ کے ملک فرانس کے تین افراد میں کرونا وائرس کی بھارتی قسم کی تشخیص ہوئی ہے۔
وزارتِ صحت کا جمعے کو کہنا تھا کہ جنوبی ایشیائی ملک بھارت سے آنے والے ایک شخص میں کرونا وائرس کی تشخیص ہوئی ہے۔
وزارتِ صحت کے مطابق تینوں افراد کو قرنطینہ کر دیا گیا ہے۔ ان سے ملنے والے افراد کا پتا لگا لیا گیا ہے۔
سماجی رابطوں کی سائٹ ٹوئٹر پر شیئر کردہ وزیر صحت کے بیان کے مطابق بھارت سے فرانس پہنچنے والے شخص کو ایک ہوٹل میں قرنطینہ کیا گیا ہے۔
اس سے قبل جنوب مغربی فرانس سے تعلق رکھنے والی ایک خاتون میں بھارت کا سفر کرنے کے بعد وبا کی تشخیص ہوئی تھی۔
فرانس کی ہیلتھ ایجنسی کے سربراہ کا صحافیوں سے گفتگو میں کہنا تھا کہ تینوں افراد ٹھیک ہیں اور ان میں سے کوئی بھی انفیکشن سے شدید متاثر نہیں ہے۔
واضح رہے کہ تینوں افراد کی عمریں 55 سال سے کم ہیں۔