تائیوان نے بھارت سے آںے والے مسافروں پر پابندی لگا دی
تائیوان نے گزشتہ 14 روز کے دوران بھارت میں رہنے والے مسافروں کے ملک میں داخلے پر پابندی عائد کر دی ہے جس کا اطلاق منگل سے ہو گا۔
تائیوانی حکام کا کہنا ہے کہ یہ پابندی ملک میں وائرس کا پھیلاؤ روکنے کے لیے لگائی گئی ہے۔
خبر رساں ادارے 'رائٹرز' کے مطابق بھارت میں وائرس کے تیزی سے پھیلاؤ کا سبب بننے والا بھارتی ویرینٹ برطانیہ اور ایران سمیت دنیا کے 17 ممالک تک پھیلنے کا انکشاف ہوا ہے۔
آسٹریلیا پہلے ہی بھارت سے آنے والوں مسافروں کے داخلے پر پابندی عائد کر چکا ہے۔
بھارت میں گزشتہ کئی روز سے روزانہ تین لاکھ سے زائد یومیہ کیسز رپورٹ ہو رہے ہیں جب کہ اموات بھی مسلسل بڑھ رہی ہیں۔
دو کھلاڑیوں میں کرونا کی تشخیص، انڈین پریمیئر لیگ کا میچ منسوخ
بھارت میں کرونا وائرس کے بڑھتے ہوئے کیسز نے انڈین پریمیئر لیگ کو بھی اپنی لپیٹ میں لے لیا ہے جس میں بائیو سیکیور ببل کے باوجود دو کھلاڑیوں میں وائرس کی تصدیق ہوئی ہے۔
آئی پی ایل انتظامیہ کے مطابق آئی پی ایل فرنچائز کولکتہ نائٹ رائیڈرز کے دو کھلاڑیوں میں وائرس کی تصدیق ہوئی ہے جس کے بعد رائل چیلنجرز بنگلور کے ساتھ حیدرآباد میں آج شیڈول اس کا میچ منسوخ کر دیا گیا ہے۔
کولکتہ نائٹ رائیڈرز کی انتظامیہ کا کہنا ہے کہ اسکواڈ میں شامل دیگر کھلاڑیوں کے کرونا ٹیسٹ منفی آئے ہیں۔
بھارت میں کرونا کیسز میں ریکارڈ اضافے اور اموات کے بعد آئی پی ایل جاری رکھنے پر بعض حلقے تنقید بھی کر رہے تھے۔ تاہم انتظامیہ کا یہ موقف تھا کہ یہ تمام میچز بائیو سیکیور ببل یعنی کرونا سے بچاؤ کے لیے کیے گئے سخت انتظامات کے تحت کرائے جا رہے ہیں۔
پاکستان کو جون تک ویکسین کی ایک کروڑ نوے لاکھ خوراکیں مل جائیں گی: ڈاکٹر فیصل سلطان
وزیرِ اعظم پاکستان کے معاونِ خصوصی برائے صحت ڈاکٹر فیصل سلطان نے کہا ہے کہ پاکستان کو جون تک کرونا سے بچاؤ کی ویکسین کی ایک کروڑ نوے لاکھ خوراکیں موصول ہو جائیں گی۔
اسلام آباد میں صحافیوں سے گفتگو کرتے ہوئے ڈاکٹر فیصل سلطان کا کہنا تھا کہ پاکستان ویکسین کی تین کروڑ خوراکیں خریدنے کے معاہدے کر چکا ہے۔
ڈاکٹر فیصل سلطان کا کہنا تھا کہ چین کی تیارکردہ سنگل ڈوز 'کین سائنو' ویکسین بھی جلد لگانے کا سلسلہ شروع کیا جا رہا ہے۔
اُن کا کہنا تھا کہ نیشنل انسٹی ٹیوٹ آف ہیلتھ کے تحت 'کین سائنو' ویکسین کی ماہانہ 30 لاکھ خوراکیں تیار کی جائیں گی۔
اُن کا کہنا تھا کہ ہر روز ڈیڑھ لاکھ افراد کو ویکسین لگائی جا رہی ہے جب کہ یومیہ ویکسی نیشن کی تعداد تین لاکھ تک کرنے کی کوشش کی جا رہی ہے۔
چین میں کرونا ویکسین کی 27 کروڑ سے زائد خوراکیں لگا دی گئیں
چین کے قومی صحت کمیشن کا کہنا ہے کہ ملک میں کووڈ-19 ویکسین کی 27 کروڑ سے زائد خوراکیں لگا دی گئی ہیں۔
خبررساں ادارے 'رائٹرز' کے مطابق قومی صحت کمیشن کا اتوار کو کہنا تھا کہ ہفتے تک ملک بھر میں کرونا سے بچاؤ کے لیے 27 کروڑ 4 لاکھ 10 ہزار ویکیسن کی خوراکیں لگائی جا چکی ہیں۔
چین میں کرونا ویکسی نیشن میں تیزی کی گئی ہے تاہم اتنی بڑی تعداد میں آبادی کے سبب یہ اب بھی آبادی کے ہر 100 افراد کے تناسب کے حساب سے امریکہ سے پیچھے ہے۔
چین میں کرونا وبا کا زور ٹوٹ چکا ہے اور معمول کی سرگرمیاں بحال کر دی گئی ہیں۔