بھارت میں جاری کرونا بحران کے دنیا پر کیا اثرات ہوسکتے ہیں؟
بھارت میں کرونا کیسز میں تیزی سے اضافہ ہو رہا ہے اور عالمی ادارۂ صحت (ڈبلیو ایچ او) کا کہنا ہے کہ گزشتہ ہفتے دنیا بھر میں کرونا کے ریکارڈ ہونے والے مجموعی کیسز میں سے 46 فی صد بھارت میں رپورٹ ہوئے تھے۔
خبر رساں ادارے 'رائٹرز' کے مطابق عالمی ادارۂ صحت کی کرونا وبا کے بارے میں جاری کردہ ہفتہ وار رپورٹ میں بتایا گیا ہے کہ گزشتہ ایک ہفتے کے دوران دنیا میں کرونا کے تقریباً 57 لاکھ کیسز پورٹ ہوئے اور اس عرصے میں 93 ہزار اموات بھی ہوئیں۔
بھارت میں اس ایک ہفتے کے دوران 26 لاکھ نئے کیسز سامنے آئے اور وبا کے پھیلاؤ کی شرح 20 فی صد بڑھی۔ ملک میں گزشتہ ہفتے کرونا وائرس کے 23 ہزار 231 افراد ہلاک بھی ہوئے۔
ادارے کے مطابق مختلف ماہرین کا خیال ہے کہ بھارت میں وبا کے اعداد و شمار سرکاری ذرائع سے جاری کردہ اعداد و شمار سے زیادہ ہیں۔
ان کے مطابق بھارت میں صحتِ عامہ کے نظام پر پڑنے والے دباؤ سے معلوم ہوتا ہے کہ کرونا وائرس سے متاثر ہونے والے مریضوں اور ہلاکتوں کی بڑی تعداد ریکارڈ نہیں ہو رہی ہے۔
خیال رہے کہ بھارت میں دنیا کی کُل آبادی کا 18 فی صد حصہ آباد ہے۔ لہٰذا یہاں سنگین ہونے والے بحران کے پوری دنیا پر ممکنہ اثرات ہوسکتے ہیں۔
سندھ: اتوار سے عید کی چھٹیوں تک مزید سختیاں ہوں گی
پنجاب: عید تعطیلات کے دوران مری سمیت تمام سیاحتی مقامات بند کرنے کا فیصلہ
پاکستان کے صوبے پنجاب کی حکومت نے آٹھ سے 16 مئی تک مری اور صوبے کے دیگر سیاحتی مقامات بند کرنے کا فیصلہ کیا ہے۔
وزیراعلیٰ پنجاب عثمان بزدار کا کہنا ہے فیصلہ کرونا کی موجودہ صورتِ حال کے تناظر میں شہریوں کی زندگیوں کے تحفظ کے لیے کیا گیا ہے۔
انہوں نے شہریوں سے اپیل کی ہے کہ وہ عید کی تعطیلات کے دوران مری یا دیگر سیاحتی مقامات کا رخ نہ کریں۔
انہوں نے کہا کہ شہری ذمہ داری کا مظاہرہ کریں اور حکومت کے فیصلے پر عمل کریں۔
پاکستان میں کرونا سے مزید 108 اموات
پاکستان میں کرونا وائرس سے مزید 108 افراد ہلاک ہو گئے ہیں جس کے بعد اموات کی مجموعی تعداد 18 ہزار 537 ہو گئی ہے۔
سرکاری اعدادوشمار کے مطابق ملک میں 4 ہزار 198 افراد کے کرونا ٹیسٹ مثبت آئے ہیں۔
گزشتہ 24 گھنٹوں کے دوران ملک میں 46 ہزار 467 ٹیسٹ کیے گئے جس میں مثبت کیسز کی شرح نو فی صد سے زائد رہی۔
پاکستان میں کرونا کیسز کی مجموعی تعداد آٹھ لاکھ 45 ہزار 833 تک پہنچ گئی ہے جس میں سے سات لاکھ 43 ہزار سے زائد افراد صحت یاب بھی ہوئے ہیں۔