بھارت کے زیرِ انتظام کشمیر میں رات کے کرفیو میں 17 مئی تک توسیع
بھارت کے زیرِ انتظام کشمیر کی انتظامیہ نے جموں و کشمیر میں کرونا کے بڑھتے ہوئے کیسز کے پیشِ نظر کرفیو میں 17 مئی تک توسیع کر دی ہے۔
حکام کا کہنا ہے کہ تمام 20 اضلاع میں سخت پابندیاں نافذ کی جائیں گی جب کہ صرف ضروری اشیا کی دکانیں کھولنے کی اجازت ہو گی۔
جموں و کشمیر میں وائرس کے فعال کیسز کی تعداد 46 ہزار تک جا پہنچی ہے۔
پابندیوں کے دوران شادی کی تقریبات میں 25 افراد ہی شریک ہو سکیں گے۔
بھارت میں پھر چار ہزار سے زائد یومیہ اموات، نئی دہلی میں مزید ایک ہفتے کا لاک ڈاؤن
بھارت میں کرونا وائرس کی دوسری لہر کی شدت برقرار ہے جب کہ اتوار کو ملک میں مزید چار ہزار سے زائد اموات رپورٹ ہوئی ہیں۔
بھارت میں مہلک وائرس کے ہاتھوں ہلاک ہونے والوں کی مجموعی تعداد دو لاکھ 42 ہزار سے بڑھ گئی ہے جب کہ مزید چار لاکھ تین ہزار 738 نئے کیس رپورٹ ہوئے ہیں۔
وائرس کا پھیلاؤ روکنے کے لیے نئی دہلی کے وزیرِ اعلٰی اروند کیجری وال نے لاک ڈاؤن میں مزید ایک ہفتے کی توسیع کر دی ہے۔
لاک ڈاؤن کے نئے احکامات کے تحت نئی دہلی میں میٹرو سروسز بھی معطل رہیں گی اب دہلی میں 17 مئی تک لاک ڈاؤن نافذ رہے گا۔
نئی دہلی میں وائرس کے مثبت کیسز کی شرح 35 فی صد سے کم ہو کر 23 فی صد ہو گئی ہے۔ تاہم ماہرین کا کہنا ہے کہ اب بھی یہ بہت زیادہ ہے۔
البتہ، ملگ گیر لاک ڈاؤن کے لیے وفاقی حکومت پر اپوزیشن جماعتوں اور طبی ماہرین کا دباؤ بڑھتا جا رہا ہے۔
عوام عید کے موقع پر ایس او پیز پر عمل درآمد یقینی بنائیں، صدر علوی
پاکستان کے صدر ڈاکٹر عارف علوی نے ملک میں آٹھ روزہ جزوی لاک ڈاؤن کے دوران لوگوں کو گھروں میں رہنے کی اپیل کی ہے۔
اپنی ایک ٹوئٹ میں صدرِ پاکستان کا کہنا تھا کہ پاکستان میں کیسز اس طرح نہیں بڑھ رہے جیسا کے ہمارے ہمسایہ ممالک میں صورتِ حال ہے۔
اُن کا کہنا تھا کہ پاکستان میں اوسطً اب چار ہزار یومیہ کیس رپورٹ ہو رہے ہیں۔ لہذٰا ہمیں اب بھی احتیاط کا دامن ہاتھ سے نہیں چھوڑنا چاہیے۔
صدر علوی کا کہنا تھا کہ رمضان اور عید کے موقع پر احتیاط کریں اور حکومت کی جانب سے جاری کردہ ایس پی او ایز پر سختی سے عمل کریں۔
پاکستان میں کرونا سے مزید 118 اموات
پاکستان میں کرونا وائرس کی تیسری لہر کے دوران مزید 118 اموات رپورٹ ہوئی ہیں جب کہ 3785 نئے کیس سامنے آئے ہیں۔
نیشنل کمانڈ اینڈ آپریشن سینٹر (این سی او سی) کے اعداد و شمار کے مطابق پاکستان میں ہفتے کو کرونا کی تشخیص کے لیے 40 ہزار 736 ٹیسٹس کیے گئے جن کے مثبت آنے کی شرح نو فی صد سے زائد رہی۔
پاکستان کے اسپتالوں میں انتہائی نگہداشت کے وارڈز میں داخل مریضوں کی تعداد میں کمی آ رہی ہے اور 4903 مریض ان وارڈز میں زیرِ علاج ہیں۔
پاکستان میں کرونا کیسز کی مجموعی تعداد آٹھ لاکھ 58 ہزار سے زائد ہے جب کہ مجموعی اموات 18 ہزار 915 ہو گئی ہیں۔