پاکستان میں کرونا کے مزید چار ہزار 207 کیسز
پاکستان میں بدھ کو 51 ہزار 130 افراد کے کرونا ٹیسٹ کیے گئے جس میں سے چار ہزار 207 افراد کے نتائج مثبت آئے ہیں۔
سرکاری اعداد و شمار کے مطابق ملک میں کرونا مثبت کیسز کی شرح آٹھ اعشاریہ دو دو فی صد رہی۔ گزشتہ 24 گھنٹوں میں مزید 131 افراد کرونا کے باعث انتقال کر گئے ہیں۔
پاکستان میں اب تک آٹھ لاکھ 90 ہزار 390 افراد کرونا سے متاثر ہوئے ہیں جب کہ وائرس سے ہلاک افراد کی تعداد 19 ہزار 987 ہے۔
تائیوان میں کرونا کے پھیلاؤ کے باعث پابندیاں
کرونا وبا سے کافی حد تک محفوط رہنے والے ملک تائیوان میں وائرس کے پھیلاؤ کے باعث حکام نے پابندیاں عائد کر دی ہیں۔
حکام کے مطابق جمعے سے لے کر بدھ تک ملک بھر میں 1200 سے زائد کیسز رپورٹ ہو چکے ہیں جب کہ بدھ کو یومیہ ریکارڈ 333 کیسز رپورٹ ہوئے ہیں۔
ہفتے کو حکام نے سنیما گھر، بارز، تفریحی پارکس بند کر دیے تھے جب کہ منگل سے بیشتر اسکول بند اور کلاسز آن لائن کرنے کا اعلان کیا گیا تھا۔
حکام کا کہنا ہے کہ اگر مزید کچھ دن تک یومیہ کیسز کی تعداد 100 سے زائد رہی تو سخت لاک ڈاؤن کیا جا سکتا ہے۔
خیال رہے کہ تائیوان میں گزشتہ برس مسلسل 200 روز تک کرونا کا کوئی کیس رپورٹ نہیں ہوا تھا۔
پاکستان میں کرونا پابندیوں میں مزید نرمی کا اعلان
پاکستان میں کرونا وائرس کیسز میں کمی کے پیشِ نظر حکومت نے پابندیاں مزید نرم کرنے کا اعلان کر دیا ہے۔
بدھ کو نیشنل کمانڈ اینڈ آپریشن (این سی او سی) کے اجلاس میں کیے گئے فیصلوں کے مطابق پانچ فی صد سے کم مثبت کیسز والے علاقوں میں 24 مئی سے مرحلہ وار اسکول کھول دیے جائیں گے۔
مزارات، سنیما گھر، پارکس اور ان ڈور جم بدستور بند رہیں گے۔
حکام نے ریستورانوں میں رات 12 بجے تک آؤٹ ڈور ڈائننگ کی اجازت دی ہے جب کہ ہوٹلز اور ریستوران 24 گھنٹے ٹیک اوے کی سہولت فراہم کر سکیں گے۔
یکم جون سے 150 افراد کے لیے آؤٹ ڈور یا کھلے مقامات پر شادی کی تقریبات کی بھی اجازت ہو گی۔
امریکہ کرونا ویکسین کی 2 کروڑ خوراکیں عطیہ کرے گا
صدر جو بائیڈن نے پیر کے روز اعلان کیا ہے کہ امریکہ آئندہ چھ ہفتوں کے دوران ویکسین کی دو کروڑ اضافی خوراکیں بیرون ملک ویکسین کی ضرورت پوری کرنے کے لئے عطیہ کرے گا۔یہ اعلان ایک ایسے وقت میں کیا گیا ہے، جب امریکہ میں اندرون ملک ویکسین کی طلب کم ہو رہی ہے اور دنیا بھر میں ویکسین کی تقسیم اور دستیابی کے درمیان فاصلہ بڑھ رہا ہے۔
ایسوسی ایٹڈ پریس کے مطابق، ویکسین کی فراہمی میں مدد کے اس نئے وعدے کے بعد امریکہ نے مجموعی طور پر ویکسن کی آٹھ کروڑ خوراکیں فراہم کرنے کا وعدہ کر لیا ہے۔ اس سے قبل امریکی انتظامیہ نے جون کے آخر تک ایسٹرا زینیکا ویکیسن کی چھ کروڑ خوراکیں مہیا کرنے کا وعدہ کیا تھا۔
صدر بائیڈن نے وائٹ ہاؤس سے کووڈ 19 رسپانس اور ویکسی نیشن پروگرام کے سلسلے میں خطاب کرتے ہوئے کہا ہے کہ امریکہ کرونا ویکسین کی مہم کے لیے ایک اور قدم بڑھا رہا ہے، کیونکہ ہم جانتے ہیں کہ جب تک یہ وبا دنیا بھر میں قابو نہیں آ جاتی تب تک امریکہ بھی محفوظ نہیں رہے گا۔
صدر نے اعلان کیا کہ آج سے امریکہ فائزر، موڈرنا اور جانسن اینڈ جانسن کی ویکسین کی خوراکیں باقی دنیا کو امداد میں دے گا۔
اس سے پہلے رپورٹرز سے بات کرتے ہوئے وائٹ ہاؤس کی ترجمان جین ساکی نے بتایا تھا کہ امریکہ اگلے چھ ہفتے کے دوران ویکسین کی دو کروڑ خوراکیں باقی دنیا کو امداد میں دے گا۔