پاکستان: 30 سال سے زائد عمر کے افراد کے لیے ہفتے سے ویکسی نیشن کا آغاز
پاکستان میں کرونا وبا کے پھیلاؤ پر قابو پانے کے لیے متحرک ادارے نیشنل کمانڈ اینڈ آپریشن سینٹر (این سی او سی) کے سربراہ وفاقی وزیر اسد عمر نے کہا ہے کہ پاکستان میں 30 اور اس سے زائد عمر کے افراد کی ویکسی نیشن کا آغاز کیا جائے گا۔
اسد عمر نے جمعے کو ٹوئٹر پر جاری بیان میں کہا ہے کہ 30 اور اس سے زائد عمر کے افراد کی ویکسی نیشن کا آغاز کل یعنی ہفتے سے کیا جائے گا۔
حکومت نے پیشہ وارانہ امتحانات اور ٹیسٹ کی مشروط اجازت دے دی
وفاقی وزیر تعلیم شفقت محمود نے جمعرات کو ٹوئٹر پر جاری بیان میں کہا کہ نیشنل کمانڈ اینڈ آپریشن (این سی او سی) نے پیشہ وارانہ امتحانات اور ٹیسٹ کی مشروط اجازت دے دی ہے۔
شفقت محمود نے کہا کہ امتحانی مراکز، طلبا کی تعداد اور امتحانات کے لیے ایس او پیز کے انتظامات کی تفصیلات وفاقی وزارت تعلیم کی سیکریٹری کو جمع کرائیں۔
انہوں نے مزید کہا کہ اگر انتظامات تسلی بخش ہوئے تو فوری طور پر امتحانات کی اجازت دے دی جائے گی۔
یاد رہے کہ بدھ کو یشنل کمانڈ اینڈ آپریشن (این سی او سی) کے اجلاس میں پانچ فی صد سے کم مثبت کیسز والے علاقوں میں 24 مئی سے مرحلہ وار اسکول کھولنے کا فیصلہ کیا گیا تھا۔
بھارت میں کرونا سے تین ہزار 874 افراد ہلاک
بھارت میں کرونا وائرس کی دوسری لہر جاری ہے اور گزشتہ 24 گھنٹوں میں تین ہزار 874 افراد کرونا سے ہلاک ہوئے ہیں۔
وزارتِ صحت کے اعداد و شمار کے مطابق بھارت میں بدھ کو مزید دو لاکھ 76 ہزار 110 افراد میں وائرس کی تشخیص ہوئی ہے۔
بھارت میں اس وائرس سے متاثرہ افراد کی مجموعی تعداد دو کروڑ 57 لاکھ 72 ہزار 440 ہے اور اب تک عالمی وبا سے دو لاکھ 87 ہزار 122 افراد ہلاک ہو چکے ہیں۔
سندھ میں پابندیاں برقرار رکھنے کا فیصلہ
وزیراعلیٰ سندھ مراد علی شاہ کی زیرِ صدارت بدھ کو کرونا کے صوبائی ٹاسک فورس کا اجلاس ہوا جس میں صوبے میں موجودہ پابندیوں کو برقرار رکھنے کا فیصلہ کیا گیا ہے۔
مراد علی شاہ کا کہنا ہے کہ صوبے میں عائد پابندیوں میں نرمی کرنا مشکل دکھائی دیتا ہے۔
اجلاس میں ٹاسک فورس کے ممبران اور ماہرین نے موجودہ بندشوں کو جاری رکھنے کا مشورہ دیا ہے۔
یاد رہے کہ سندھ میں ہفتہ اور اتوار کاروبار بند جب کہ ان ڈور اور آؤٹ ڈور ڈائننگ سمیت سنیما گھر، بیوٹی پارلرز، شادی ہال، مزارات اور پارکس پر پابندی عائد ہے۔