پاکستان میں مزید 2028 نئے کیسز رپورٹ
پاکستان میں گزشتہ 24 گھنٹوں کے دوران کرونا وائرس کے دو ہزار 28 نئے کیسز رپورٹ ہوئے ہیں جب کہ وبا کے شکار مزید 92 مریض دم توڑ گئے ہیں۔
سرکاری اعداد و شمار کے مطابق گزشتہ چوبیس گھنٹوں میں 51 ہزار 523 افراد کے کرونا ٹیسٹ کیے گئے اور مثبت کیسز کی شرح تین اعشاریہ نو تین فی صد رہی۔
پاکستان: آج سے 18 سال سے زائد عمر کے افراد کی ویکسی نیشن کا آغاز
پاکستان میں آج سے 18 سال سے زائد عمر کے افراد کو کرونا وائرس کی ویکسین لگانے کے عمل کا آغاز ہو گا۔
ملک میں 18 سال سے زائد عمر کے شہری اب ویکسی نیشن سینٹر سے ٹیکہ لگوا سکتے ہیں۔
سرکاری اعداد و شمار کے مطابق، ملک میں اب تک 37 لاکھ 46 ہزار 786 افراد کو کرونا ویکسین کی کم از کم ایک خوراک جب کہ 21 لاکھ 74 ہزار 169 افراد کو ویکسین کی دو خوراکیں فراہم کی جا چکی ہیں۔
'کرونا پابندیوں سے پولیو کیسز میں بھی نمایاں کمی آئی'
پاکستان میں انسدادِ پولیو پروگرام کے سربراہ ڈاکٹر شہزاد آصف نے دعویٰ کیا ہے کہ کرونا کے باعث لگائے جانے والے لاک ڈاؤن اور دیگر پابندیوں کی وجہ سے ملک میں پولیو کیسز میں بھی نمایاں طور پر کمی آئی ہے۔ اُن کا کہنا تھا کہ اب بھی دو فی صد بچوں کے والدین پولیو کے قطرے پلوانے سے انکاری ہیں۔
بھارت کی معیشت کرونا وائرس کے باعث شدید متاثر
کرونا وائرس نے بھارت کی معیشت کو بھی شدید متاثر کیا ہے۔ مالی سال 21-2020 میں بھارت کی شرح نمو منفی سات اعشاریہ تین فی صد رہی جو گزشتہ چار دہائیوں کی بدترین شرح ہے۔
سرکاری ادارے نیشنل اسٹیٹسٹکل آفس (این ایس او) نے پیر کو اپنی رپورٹ میں بتایا کہ 21-2020 کی چوتھی سہ ماہی (جنوری تا مارچ) کے دوران اقتصادی شرح نمو میں ایک اعشاریہ چھ فی صد کا اضافہ ہوا۔ البتہ پورے مالی سال کے دوران ملک کی مجموعی قومی پیداوار (جی ڈی پی) میں منفی سات اعشاریہ تین فی صد کی کمی ریکارڈ کی گئی۔
جنوری تا مارچ 2021 کے دوران شرح نمو گزشتہ سہ ماہی کے مقابلے میں صفر اعشاریہ پانچ فی صد بہتر رہی ہے۔
ماہرین کے مطابق چوتھی سہ ماہی میں 1.6 فی صد کی شرح نمو سے یہ معلوم ہوتا ہے کہ ملکی معیشت بہتر نہیں ہے اور اگر اسے جلد بہتری کی جانب نہیں لے جایا گیا تو اس میں مزید ابتری آ سکتی ہے۔
بنگلور کی عظیم پریم جی یونیورسٹی کے ایک مطالعے کے مطابق گزشتہ برس کرونا کی پہلی لہر کے دوران 23 کروڑ بھارتی شہری غربت میں چلے گئے تھے۔ مطالعے نے 375 روپے یومیہ سے کم میں زندگی گزارنے والوں کو غریب مانا ہے۔