بھارت میں کرونا کے 39 ہزار سے زائد نئے مریض
بھارت میں گزشتہ 24 گھنٹوں کے دوران 39 ہزار 742 افراد میں کرونا وائرس کی تشخیص ہوئی ہے۔
وزارتِ صحت کے اعداد و شمارکے مطابق گزشتہ 24 گھنٹوں میں عالمی وبا سے متاثرہ 535 مریض انتقال بھی کرگئے ہیں۔
ملک میں کرونا وائرس سے ہلاکتوں کی تعداد چار لاکھ 20 ہزار 551 ہو چکی ہے۔ وائرس سے اب تک مجموعی طور پر تین کروڑ پانچ لاکھ 43 ہزار 138 لوگ متاثر ہوئے ہیں۔
پاکستان میں مزید پانچ لاکھ سے زائد افراد کی ویکسی نیشن
پاکستان میں کرونا وائرس سے بچاؤ کے لیے ویکسی نیشن کا عمل جاری ہے۔
ملک میں کرونا کے نگران ادارے نیشنل کمانڈ اینڈ آپریشن سینٹر (این سی او سی) کے اعداد و شمار کے مطابق 24 جولائی کو ملک میں پانچ لاکھ 17 ہزار 255 افراد کو ویکسین لگائی گئی۔
این سی او سی کے مطابق پاکستان میں اب تک دو کروڑ 54 لاکھ 32 ہزار 173 افراد کو ویکسین لگائی جا چکی ہے۔
امریکہ: بے گھر افراد کو کرونا ویکسی نیشن پر آمادہ کرنے کی مہم
امریکی صحتِ عامہ کے اداروں کے مطابق بے گھر افراد کو وسائل کی کمی اور ایک جگہ مستقل طور پر نہ رہنے کے باعث کرونا وائرس سے زیادہ خطرہ ہے۔ 'لائف 360' میں صبا شاہ خان امریکی شہر کینساس سٹی کی ایک غیر منافع بخش تنظیم کے بارے میں بتا رہی ہیں جو بے گھر افراد کو ویکسین لگوانے کے لیے مدد فراہم کر رہی ہے۔
سنگاپور: ویکسین لگوانے والے 44 فی صد افراد وبا سے متاثر
سنگاپور کے سرکاری اعداد و شمار کے مطابق گزشتہ چار ہفتوں کے دوران رپورٹ کیے جانے والے تین چوتھائی کیسز میں وبا، ویکسین لگوائے ہوئے افراد کی وجہ سے پھیلی۔ تاہم ویکسین شدہ یہ افراد وبا سے شدید متاثر نہیں ہوئے۔
اعداد و شمار کے مطابق ویکسین کرونا سے متاثرہ افراد کو شدید علالت میں مبتلا ہونے سے محفوظ رکھتی ہے تاہم اس سے یہ بھی ثابت ہوتا ہے کہ ویکسین لگوانے والے افراد بھی غیر ویکسین شدہ افراد کے لیے مہلک ثابت ہو سکتے ہیں اور ویکسین بھی وبا کے پھیلاؤ کو نہیں روک سکتی۔
سنگا پور میں گزشتہ 28 روز میں وبا سے متاثرہ رپورٹ کیے جانے والے 1096 افراد میں سے 484 یا 44 فی صد افراد مکمل طور پر ویکسین لگوا چکے تھے۔ جب کہ 30 فی صد افراد نے ویکسین کی ایک خوراک لگوائی تھی۔
اعداد و شمار کے مطابق ان افراد میں 25 فی صد افراد نے ویکسین نہیں لگوائی تھی۔
وزارتِ صحت کے مطابق وبا سے متاثرہ افراد میں سے سات متاثرہ افراد کو آکسیجن کی ضرورت پڑی اور انتہائی نگہداشت وارڈ میں ایک فرد تشویشناک حالت میں داخل تھا۔ جب کہ ان آٹھ افراد نے مکمل طور پر ویکسین نہیں لگوائی ہوئی تھی۔
خیال رہے کہ ماہرین کا ماننا ہے کہ اگر ویکسین لگوانے والے افراد بھی وبا سے متاثر ہوتے ہیں تو اس کا ہرگز مطلب یہ نہیں کہ ویکسین غیر مؤثر ہے۔