سعودی عرب: 17 ماہ بعد ویکسی نیشن مکمل کرنے والے سیاحوں کو آنے کی اجازت
سعودی عرب نے جمعے کو ویکسی نیشن مکمل کرنے والے غیر ملکی سیاحوں کے لیے اپنی سرحدیں کھولنے کا اعلان کیا ہے۔
سعودی پریس ایجنسی کی رپورٹ کے مطابق سیاحتی ویزا رکھنے والے غیر ملکی سیاحوں کے داخلے پر عائد پابندی یکم اگست سے اٹھا لی جائے گی۔
سعودی وزارتِ سیاحت کے مطابق سرکاری طور پر منظور شدہ ویکسین فائزر، ایسٹرازینیکا، موڈرنا اور جانسن اینڈ جانسن کی مکمل خوراکیں حاصل کرنے والے سیاحوں کو قرنطینہ کے بغیر ملک میں داخلے کی اجازت ہو گی۔ بشرطیکہ ان کے پاس 72 گھنٹوں کے دوران لیا جانے والا کرونا کا منفی پی سی آر ٹیسٹ ہو۔
وزارتِ سیاحت کا کہنا ہے کہ سیاحوں کو صحت کے حکام کے پاس اپنی تفصیلات بھی درج کرانا ہوں گی۔
مکران ڈویژن میں کرونا کی چوتھی لہر میں شدت، شہری علاقوں میں مکمل لاک ڈاؤن
بلوچستان کے مکران ڈویژن میں کرونا وائرس کی چوتھی لہر می شدت آگئی ہے۔ سرکاری اعداد و شمار کے مطابق ضلع گوادر میں گزشتہ ایک ہفتے کے دوران کرونا وائرس کی شرح 28 فی صد رہی ہے۔
مکران میں کرونا میں اضافے کے پیشِ نظر 25 جولائی سے 15 دن کے لیے مکمل لاک ڈاؤن نافذ کیا گیا ہے۔ اس دوران تمام دکانیں، ہوٹل اور ریستوران بند رہیں گے۔ تمام مچھلی مارکیٹس میں کاروبار کے علاوہ پارکس میں آمد، میدانوں میں کھیل اور مذہبی اجتماعات پر مکمل پابندی عائد کی گئی ہے۔
دوسری جانب وبا سے بچاؤ کے لیے مکران ڈویژن میں گوادر اور تربت میں اسپرے مہم کا بھی آغاز کیا گیا ہے۔ مہم کے دوران عوامی مقامات کے علاوہ پبلک ٹرانسپورٹ اور بس اڈوں میں اسپرے کیا جا رہا ہے۔
ضلع گوادر کی تحصیل پسنی سے تعلق رکھنے والے مقامی صحافی ساجد نور کے مطابق پسنی میں کرونا کے 100 ٹیسٹ میں سے 25 کے نتائج مثبت آئے ہیں جس سے اس بات کا اندازہ لگایا جا سکتا ہے کہ صورتِ حال کس قدر خراب ہے۔
امریکہ: معیشت کی شرح نمو میں ساڑھے چھ فی صد اضافہ، معیشت پر کرونا کے دباؤ میں کمی
امریکی معیشت کی شرح نمو پچھلے تین ماہ کے دوران کرونا سے بچاؤ کی ویکسین مہم اور حکومتی امداد کی بدولت بڑھ کر ساڑھے چھ فی صد ہو گئی ہے جب کہ ملکی معیشت کا سائز عالمی وبا سے پہلے کے دور سے بھی زیادہ ہو گیا ہے۔
ماہرین کا کہنا ہے کہ معاشی ترقی کے تازہ ترین اعداد و شمار یہ ظاہر کرتے ہیں کہ امریکہ عالمی وبا کی باعث ہونے والی کساد بازاری سے باہر نکل آیا ہے۔
امریکہ کے محکمہ تجارت کے مطابق اپریل اور جون کے دوران امریکہ کی جی ڈی پی میں اضافے کی شرح 6.3 فی صد کی سالانہ سطح سے بھی تیز تر رہی۔
بعض مبصرین کا کہنا ہے کہ اقتصادی کارکردگی مزید بہتر ہوسکتی تھی۔ لیکن کمپنیوں کو پھر سے اسٹاک جمع کرنے اور رسد کے کچھ مسائل کے باعث معاشی شرح نمو میں ایک فی فیصد کے لگ بھگ کمی واقع ہوئی۔
وہی ملازم دفتر میں داخل ہوسکیں گے، جو ویکسین لگوا چکے ہوں: گوگل اور فیس بک کا اعلان
کورونا وائرس کی انتہائی متعدی قسم ’ڈیلٹا‘ کے پھیلاؤ کے پیش نظر امریکہ کی سب سے بڑی ٹیکنالوجی کمپنوں گوگل اور فیس بک نے بدھ کے روز یہ اعلان کیا ہے کہ ان کمپنیوں کے امریکہ میں موجود ملازمین کو دفاتر میں داخل ہونے کے لیے کووڈ ویکسین لگوانا لازم ہوگا۔
آئندہ مہینوں کے دوران گوگل اپنی ویکسی نیشن مہم کو دوسرے ممالک میں بڑھانے کا بھی منصوبہ بنا رہا ہے۔
ایک رپورٹ کے مطابق اسٹریمنگ پلیٹ فارم نیٹ فلکس نے بھی اپنی تمام پروڈکشنز کے امریکی اداکاروں اور عملے کے لیے ویکسین لگانے کی پالیسی پر عمل درآمد کیا ہے۔
بلومبرگ نیوز نے خبر دی ہے کہ ایپل کمپنی اپنے امریکی اسٹورز پر خریداروں اور عملے کے لیے ماسک پہننے کی پالیسی کو بحال کرنے کا ارادہ رکھتی ہے، چاہے وہ کورونا وائرس کی ویکسین لگا چکے ہوں یا نہیں۔