سندھ میں لاک ڈاؤن ختم، بازار رات آٹھ بجے تک کھلیں گے
سندھ میں کرونا کیسز میں اضافے کے باعث صوبے بھر میں لگائے جانے والے لاک ڈاؤن کی مدت ختم ہو گئی ہے جس کے بعد اب بازار اور شاپنگ مال رات 8 بجے تک کھلے رہیں گے۔
لاک ڈاؤن کے خاتمے کے بعد پیر سے آؤٹ ڈور ڈائننگ رات 10 بجے تک ہوگی جب کہ اِن ڈور ڈائننگ کی اجازت فی الحال نہیں ہے۔ اِن ڈور جم میں صرف ویکسین لگوانے والے افراد ہی جاسکیں گے۔
سندھ میں شادی بیاہ کی تقریبات کھلے مقامات پر ہو سکیں گی۔ البتہ مزارات بند رہیں گے۔
صوبائی حکومت نے اسکول 19 اگست تک بند رکھنے کا اعلان کیا ہے لیکن 10 اگست سے انٹر کے رہ جانے والے پرچے شروع کرنے کا فیصلہ بھی کیا ہے۔
سعودی عرب: ویکسین لگوانے والے غیر ملکی مسلمانوں کو عمرے کی اجازت
سعودی عرب نے ویکسین لگوانے والے غیر ملکی زائرین کو ڈیڑھ سال بعد عمرے کی اجازت دینے کا اعلان کیا ہے۔
سعودی پریس ایجنسی (ایس پی اے) کے مطابق وزارتِ حج اور عمرہ کی جانب سے اعلان کیا گیا ہے کہ نو اگست سے دنیا کے مختلف ممالک سے بتدریج عمرے کی درخواستیں وصول کی جائیں گی۔
سعودی عرب نے چین کی تیار کردہ ویکسین لگوانے والے زائرین کو بھی ملک میں داخلے کی اجازت دی ہے۔ تاہم اُن کے لیے شرط رکھی گئی ہے کہ وہ سعودی حکومت کی منظور کردہ ویکسینز ایسٹرازینیکا، فائزر، موڈرنا اور جانسن اینڈ جانسن میں سے کسی ایک کی بوسٹر ڈوز لگوائیں۔
خیال رہے کہ سعودی عرب نے چین کی ویکسینز سائنو فارم اور سائنو ویک کی تاحال منظوری نہیں دی۔
کرونا وائرس کی عالمی وبا کے بعد سعودی عرب نے بیرون ملک سے عمرہ کے لیے آنے والوں پر اپنی سرحدیں بند کر دی تھیں۔ البتہ اب صرف ویکسین لگوانے والے افراد ہی عمرہ کی درخواست دے سکیں گے۔
بھارت میں 39 ہزار سے زائد افراد میں کرونا کی تشخیص
بھارت میں کرونا وائرس سے مزید 491 افراد ہلاک ہوگئے ہیں۔
بھارت کی وزارتِ صحت کے اعداد و شمار کے مطابق گزشتہ 24 گھنٹوں میں ملک میں کرونا وائرس کے 39 ہزار 70 مریض رپورٹ ہوئے ہیں۔
کرونا کی عالمی وبا سے بھارت میں گزشتہ 24 گھنٹوں میں 491 افراد ہلاک بھی ہوئے ہیں، جس کے بعد مجموعی اموات چار لاکھ 27 ہزار 862 ہوگئی ہیں۔
امریکہ میں اوسطاً ایک لاکھ سات ہزار یومیہ کرونا کیسز
امریکہ میں کرونا وائرس کے پھیلاؤ ایک مرتبہ پھر بڑھ رہا ہے اور یومیہ اوسطاً ایک لاکھ سے زائد کیسز سامنے آرہے ہیں۔
امریکہ کے جان ہاپکنز کرونا وائرس ری سورس سینٹر نے ہفتے کو بتایا کہ اگست کے پہلے ہفتے میں امریکہ میں یومیہ اوسطاً ایک لاکھ سات ہزار سے زائد کرونا کیسز ریکارڈ کیے گئے۔
ملک میں بیماریوں کے کنٹرول اور روک تھام کے ادارے (سی ڈی سی) کے مطابق اس تعداد کے مقابلے میں سات جون کو امریکہ میں 10 ہزار سے زائد کرونا کیسز رپورٹ ہوئے تھے۔
امریکہ میں کرونا وائرس کے مریضوں میں اضافہ ملک میں انتہائی متعدی ڈیلٹا ویریئنٹ کے تیزی سے پھیلاؤ کے باعث ہو رہا ہے۔
خبر رساں ادارے ایسوسی ایٹڈ پریس کی رپورٹ کے مطابق جنوری میں لگ بھگ ڈھائی لاکھ یومیہ کیسز رپورٹ ہونے کے بعد جون میں وائرس کے کیسز کم ہوگئے تھے، جو اب دوبارہ بڑھ رہے ہیں۔
اے پی کے مطابق امریکہ میں ویکسی نیشن کا عمل بھی جاری ہے اور بالغ امریکیوں میں سے 70 فی صد سے زائد ایسے ہیں جو کم از کم ویکسین کی ایک خوراک لگوا چکے ہیں۔