کینیڈا نے ویکسین لگوانے والے امریکی شہریوں کے لیے سرحد کھول دی
کینیڈا نے ان امریکی شہریوں کے لیے اپنی سرحد دوبارہ کھول دی ہیں جو کرونا ویکسین لگوا چکے ہیں۔
امریکی شہری پیر سے کینیڈا کا سفر کر سکیں گے لیکن اس سے قبل انہیں نہ صرف ویکسین کا مکمل کورس کرنا ہو گا بلکہ سفر سے تین روز قبل کرونا کے منفی ٹیسٹ کی رپورٹ بھی دینا ہو گی۔
کینیڈا آنے والے امریکی شہریوں کو آمد سے قبل آرائیو کین ایپلی کیشن پر ایک فارم بھی پر کرنا ہو گا۔
کینیڈا بارڈر سروس ایجنسی نے یہ نہیں بتایا کہ امریکہ سے کتنے افراد کی کینیڈا آمد متوقع ہے البتہ ادارے کی ترجمان ریبیکا پردے نے ایک بیان میں کہا ہے کہ کینیڈین شہریوں کے تحفظ اور صحت پر کوئی سمجھوتہ نہیں کیا جائے گا۔
ویکسین کی دوسری خوراک لگوانے والے میسج کا انتظار نہ کریں: فیصل سلطان
پاکستان کے وزیرِ اعظم عمران خان کے معاون خصوصی برائے صحت ڈاکٹر فیصل سلطان نے کہا ہے کہ کرونا ویکسین کی پہلی خوراک لگوانے والے افراد دوسری خوراک کے لیے میسج کا انتظار نہ کریں۔
اپنے ایک ٹوئٹ میں ڈاکٹر فیصل سلطان نے کہا کہ سائنو فام لگوانے والے افراد تین ہفتوں بعد دوسری خوراک لگوا سکتے ہیں جب کہ سائنو ویک اور ایسٹرازینیکا لگوانے والے چار ہفتے بعد میسج کا انتظار کیے بغیر ویکسین لگوا لیں۔
پاکستان میں مزید چار ہزار سے زیادہ کیسز رپورٹ
پاکستان میں گزشتہ چوبیس گھنٹوں کے دوران 4040 افراد میں کرونا وائرس کی تشخیص ہوئی ہے۔
سرکاری اعداد و شمار کے مطابق گزشتہ چوبیس گھنٹوں کے دوران 53 ہزار 528 افراد کے ٹیسٹ کیے گئے جب کہ مثبت کیسز کی شرح سات اعشاریہ پانچ چار فی صد رہی۔
عالمی وبا کے شکار مزید 53 مریض دم توڑ گئے جس کے بعد پاکستان میں ہلاکتوں کی مجموعی تعداد 23 ہزار 918 تک پہنچ گئی ہے جب کہ 3805 افراد کی حالت تشویش ناک بتائی جاتی ہے۔
پنجاب کے چار شہروں میں پابندیاں عائد
پاکستان کے صوبے پنجاب کے چار شہروں لاہور، راولپنڈی، ملتان اور فیصل آباد میں پیر سے 31 اگست تک ان ڈور شادی کی تقریبات پر پابندی عائد کر دی گئی ہے۔
صوبائی حکومت کی جانب سے جاری نوٹی فکیشن کے مطابق مذکورہ چاروں شہروں میں آؤٹ ڈور شادی کی تقریبات کی رات 10 بجے تک اجازت ہو گی جس میں صرف 300 افراد کرونا ایس او پیز کا خیال رکھتے ہوئے شرکت کر سکیں گے۔
نوٹی فکیشن میں کہا گیا ہے کہ مذہبی، ثقافتی، موسیقی اور دیگر ان ڈور تقاریب پر بھی پابندی ہوگی البتہ کھلے میدان میں یہ سرگرمیاں 300 افراد کی موجودگی میں کرونا پروٹوکول کا خیال رکھتے ہوئے کی جا سکتی ہیں۔