ایران: کرونا پابندیوں کے ہٹنے کے بعد اموات میں اضافہ، 684 افراد ہلاک
ایران میں کرونا وائرس کے پھیلاؤ کو روکنے کے لیے لگائی گئی پابندیوں کے ہٹنے کے بعد ملک میں پہلی مرتبہ 680 سے زائد اموات رپورٹ ہوئی ہیں۔
خبر رساں ادارے 'اے ایف پی' کی رپورٹ کے مطابق ایران کی وزارتِ صحت نے اتوار کو بتایا کہ ملک میں گزشتہ 24 گھنٹوں میں 684 اموات رپورٹ ہوئی ہیں جس کے بعد مجموعی اموات کی تعداد ایک لاکھ دو ہزار 38 ہوگئی ہے۔
ایران میں کرونا وائرس سے مزید 36 ہزار 419 افراد متاثر بھی ہوئے ہیں۔ ملک میں اب تک کرونا کیسز کی مجموعی تعداد 46 لاکھ 77 ہزار 114 ہو چکی ہے۔
آسٹریلیا میں کرونا کیسز کا نیا ریکارڈ، وزیراعظم کا لاک ڈاؤن حکمت عملی کا دفاع
آسٹریلیا میں کرونا وائرس کا پھیلاؤ تیز ہو گیا ہے اور ملک میں ایک روز میں 914 نئے کیسز کی تصدیق ہوئی ہے جو یومیہ کیسز کا نیا ریکارڈ ہے۔
خبر رساں ادارے 'رائٹرز' کے مطابق آسٹریلوی ریاست نیو ساؤتھ ویلز، وکٹوریا اور آسٹریلین کیپیٹل ٹیریٹری میں لاک ڈاؤن نافذ ہے۔ البتہ آسٹریلوی وزیرِاعظم نے اس لاک ڈاؤن حکمتِ عملی کا دفاع کیا ہے۔
وزیرِاعظم اسکاٹ موریسن نے اتوار کو کہا ہے کہ آسٹریلیا کرونا وائرس کے خلاف اپنی لاک ڈاؤن کی حکمتِ عملی تب تک برقرار رکھے گا جب تک اس کی 70 فی صد آبادی کی ویکسی نیشن مکمل نہیں ہو جاتی۔ لیکن اس کے بعد انہیں وائرس کے ساتھ رہنا شروع کرنا ہو گا۔
انہوں نے ایک ٹیلی ویژن انٹرویو میں کہا کہ آپ ہمیشہ لاک ڈاؤن کے ساتھ نہیں رہ سکتے اور کچھ مواقع پر آپ کو حکمتِ عملی تبدیل کرنے کی ضرورت ہو گی۔ اور یہ 70 فی صد ویکسی نیشن پر ہو سکتی ہے۔
بھارت میں کرونا وائرس سے مزید 403 افراد ہلاک
بھارت میں کرونا وائرس سے مزید 30 ہزار سے زائد افراد متاثر ہوئے ہیں۔
بھارت کی وزارتِ صحت کے اعداد و شمار کے مطابق ملک میں گزشتہ 24 گھنٹوں میں کرونا مثبت کیسز کی شرح ایک اعشاریہ 95 فی صد رہی۔
ملک میں گزشتہ 24 گھنٹوں میں 30 ہزار 948 نئے مریض اور 403 اموات رپورٹ ہوئی ہیں۔
بھارت میں کرونا وائرس کے مجموعی کیسز کی تعداد تین کروڑ 24 لاکھ 24 ہزار 234 ہو چکی ہے جب کہ وبا سے اب تک چار لاکھ 34 ہزار 367 افراد ہلاک ہوئے ہیں۔
پاکستان: کرونا وائرس سے مزید 3842 افراد متاثر
پاکستان میں کرونا وائرس کے مثبت کیسز کی شرح سات فی صد سے زائد ریکارڈ کی گئی ہے۔
سرکاری اعداد و شمار کے مطابق ملک میں گزشتہ 24 گھنٹوں میں کرونا وائرس کے 53 ہزار 527 ٹیسٹ کیے گئے جس میں سے تین ہزار 842 میں وائرس کی تشخیص ہوئی ہے۔
ملک میں کرونا مثبت کیسز کی شرح سات اعشاریہ ایک فی صد رہی۔
اعداد و شمار کے مطابق گزشتہ 24 گھنٹوں میں کرونا کے 75 مریض انتقال بھی کرگئے جس کے بعد مجموعی اموات کی تعداد 24 ہزار 932 ہوگئی ہے۔
پاکستان میں کرونا وائرس سے اب تک 11 لاکھ 23 ہزار 812 افراد متاثر ہوئے ہیں جس میں سے 10 لاکھ 9 ہزار 55 صحت یاب بھی ہو چکے ہیں۔