پاکستان میں کرونا سے مزید 84 ہلاکتیں
پاکستان میں کرونا وائرس کے مزید 4062 کیس رپورٹ ہوئے ہیں جب کہ مہلک وائرس کے باعث 84 افراد انتقال کر گئے ہیں۔
نیشنل کمانڈ اینڈ آپریشن سینٹر (این سی او سی) کی جانب سے جمعرات کو جاری کیے گئے اعداد و شمار کے مطابق پاکستان میں کرونا سے اموات 26 ہزار 497 ہو گئی ہیں جب کہ مجموعی مصدقہ کیسز 11 لاکھ 94 ہزار 198 ہو گئے ہیں۔
ملک میں کرونا مثبت کیسز کی شرح 6.43 فی صد ہے۔
پاکستان میں 5393 مریض اب بھی انتہائی نگہداشت وارڈز میں زیرِ علاج ہیں۔
زمبابوے: ویکسی نیشن نہ کرانے والے سرکاری ملازمین کو مستعفی ہونے کی تجویز
زمبابوے میں حکومت نے تجویز دی ہے کہ وہ سرکاری ملازمین جو ویکسین نہیں لگوانا چاہتے سرکاری ملازمت چھوڑ دیں۔
حکومت نے ان احکامات کی وجہ وبا کا پھیلاؤ روکنے کی کوشش قرار دیا ہے۔
زمبابوے کے وزیرِ انصاف کا ایک انٹرویو میں کہنا تھا کہ اگسر سرکاری ملازمین جانتے ہیں کہ وہ حکومت کے لیے کام کر رہے ہیں تو اب حکومت ان سے کہہ رہی ہے کہ ویکسی نیشن کرا لیں۔
ان کا مزید کہنا تھا کہ کوئی کسی کو مجبور نہیں کر رہا کہ وہ ویکسین کرائے۔ اپنے حقوق کو گلیوں اور اپنے گھر میں ضرور استعمال کیا جا سکتا ہے۔ البتہ اگر کوئی سرکاری ملازم ہے تو اس کے لیے لازم ہے کہ دوسرے لوگوں کے تحفظ کے لیے ویکسین کرائے۔
ان کے بقول جو سرکاری ملازمین ویکسی نیشن نہیں کرانا چاہتے اور اپنا آئینی حق استعمال کرنے چاہتے ہیں تو وہ استعفیٰ دے سکتے ہیں۔
چلی میں چھ برس سے بڑے بچوں کو ویکسین لگانے کی منظوری
چلی کی حکومت نے چین کی بنی ہوئی سائنو ویک ویکسین کی چھ برس سے زائد عمر کے بچوں کو لگانے کی منظوری دے دی ہے۔
جنوبی امریکہ کا ملک پہلے ہی فائرز ویکسین 12 سال سے زائد عمر کے بچوں کو لگانے کی منظوری دے چکا ہے۔
مئی سے اب تک فائرز ویکسین ملک بھر میں چھ لاکھ 54 ہزار بچوں کو لگائی جا چکی ہے۔
چین کی سائنو ویک کو مقامی طور پر کرونا ویک کے نام سے لگایا جا رہا ہے۔ جب کہ یہ چلی میں ویکسی نیشن مہم میں سب سے زیادہ استعمال ہونے والی ویکسین ہے۔
اسرائیل کا غیر ملکی سیاحوں کی آمد پر پابندی جلد ختم کرنے کا عندیہ
اسرائیل نے کہا ہے کہ وہ جلد ہی غیر ملکی سیاحوں اور سیاحتی گروپس ک لیے دروازے کھول دے گا۔
اسرائیل میں کرونا وائرس کے پھیلنے کی شرح دنیا میں بلند ترین شرح والے ممالک میں ہوتے ہے۔
اسرائیل کی وزارتِ سیاحت نے کہا ہے کہ ملک میں منظم گروپس کی آمد کے لیے دو ہفتوں میں نرمی کر دی جائے گی۔
اسرائیل آنے والوں کو پابند کیا جائے گا کہ ان کو ویکسین لگ چکی اور آمد سے قبل کرونا ٹیسٹ کی منفی رپورٹ ان کے پاس ہو۔