ایران کرونا وائرس کے پھیلاؤ کا ذمہ دار ہے: امریکہ
امریکہ کے اعلیٰ عہدیداروں نے ایران پر الزام عائد کیا ہے کہ وہ متعدد ملکوں میں کرونا وائرس پھیلانے کا ذمہ دار ہے۔ امریکی عہدیداروں کے مطابق، اس بارے میں بہت سے شواہد ملے ہیں۔
امریکی حکام کے مطابق یہ خدشات ہیں کہ ایران مشرق وسطیٰ میں اس وائرس کو پھیلانے کا سبب بن سکتا ہے۔
امریکی محکمۂ خارجہ نے پیر کو اپنے ایک بیان میں کہا ہے کہ کم از کم پانچ ایسی مثالیں موجود ہیں جن سے ظاہر ہوتا ہے کہ مشرق وسطیٰ میں کرونا وائرس کا پہلا کیس براہِ راست ایران سے وارد ہوا۔
افغانستان کے حالیہ دورے میں اخباری نمائندوں سے بات کرتے ہوئے وزیر خارجہ مائیک پومپیو نے کہا تھا کہ یہ وائرس جسے انھوں نے ووہان وائرس کا نام دیا، مہلک ہے اور ایران کی حکومت اس میں برابر کی ذمہ دار ہے۔
پومپیو نے اپنے بیان میں الزام لگایا تھا کہ ایرانی حکومت اپنے عوام اور دنیا سے بدستور جھوٹ بول رہی ہے۔ اور اس نے ایرانی عوام اور دنیا بھر کے لوگوں کو بڑے خطرے سے دوچار کر دیا ہے۔
پاکستان کے صوبے خیبرپختونخوا کے وزیر صحت تیمور خان جھگڑا کا کہنا ہے کہ مردان کی یونین کونسل منگا میں 46 افراد کا کرونا ٹیسٹ کیا گیا جن میں سے 39 کا ٹیسٹ مثبت آیا ہے جب کہ چار ٹیسٹ مسترد کیے گئے۔
پاکستان میں کرونا متاثرین کی تعداد 1000 تک پہنچ گئی
پاکستان میں کرونا وائرس کے کیسز کی تعداد 1000 تک پہنچ گئی ہے جب کہ ملک بھر میں اس وبا سے اب تک سات اموات ہو چکی ہیں۔
پاکستان کے سرکاری اعداد و شمار کے مطابق صوبہ سندھ میں سب سے زیادہ کیسز رپورٹ ہوئے ہیں جن کی تعداد 413 ہے۔ اسی طرح پنجاب میں 296، خیبر پختونخوا میں 78، بلوچستان میں 115، وفاقی دارالحکومت اسلام آباد میں 16، پاکستان کے زیر انتظام کشمیر میں ایک اور گلگت بلتستان میں 81 کیسز رپورٹ ہو چکے ہیں۔
