کوئٹہ میں مری آباد اور ہزارہ ٹاؤن کے مکمل لاک ڈاؤن کا فیصلہ
بلوچستان کے چیف سیکریٹری کیپٹن ریٹائرڈ فضیل اصغر نے کہا ہے کہ صوبائی حکومت نے کرونا وائرس سے بچاؤ کے لیے کوئٹہ کے علاقوں مری آباد اور ہزارہ ٹاؤن کے مکمل لاک ڈاؤن کا فیصلہ کیا ہے۔
چیف سیکریٹری نے ایپکس کمیٹی کے اجلاس کے بعد مری آباد اور ہزارہ ٹاؤن کے لاک ڈاؤن کا اعلان پریس کانفرنس میں کیا۔
یاد رہے کہ بلوچستانسے ایران جانے والے زائرین میں سے 90 فی صد افراد کی تعداد انہی علاقوں سے ہے۔
صوبائی حکومت کے فیصلے کے بعد ہزارہ ٹاؤن اور مری سے کوئی بھی شخص شہر میں داخل نہیں ہو سکے گا۔
علاوہ ازیں حکومت نے کوئٹہ سے بین الاضلاع لاک ڈاؤن کا بھی فیصلہ کیا ہے۔
- By سارہ حسن
پاکستان کی آئی ایم ایف سے مزید ایک ارب 40 کروڑ ڈالرز قرض لینے کی کوشش
پاکستان کے وزیر اعظم عمران خان کے مشیر برائے خزانہ ڈاکٹر عبدالحفیظ شیخ نے کہا ہے کہ دنیا بھر کی طرح کرونا وائرس کے سبب پاکستان کی معیشت بھی متاثر ہو رہی ہے۔ اقتصادی چیلنجز کے سبب حکومت عالمی مالیاتی فنڈ (آئی ایم ایف) سے مزید ایک ارب 40 کروڑ ڈالرز کے قرض کے لیے بات کر رہی ہے۔
اسلام آباد میں پریس کانفرنس سے خطاب میں مشیر خزانہ حفیظ شیخ نے کہا کہ دنیا بھر میں طلب و رسد کی کمی سے پاکستان کی معیشت پر بھی منفی اثرات پڑیں گے اور خدشہ ہے کہ بیرون ملک مقیم پاکستانیوں کی جانب سے بھیجے جانے والے زرمبادلہ کے ساتھ ساتھ برآمدت میں بھی کمی آئے گی۔
انہوں نے کہا کہ حکومت فاسٹ ٹریک پر آئی ایم ایف سے مزید قرض لے رہی ہے۔
مشیر خزانہ نے بتایا کہ حکومت نے موجودہ صورت حال کے سبب 1200 ارب روپے سے زائد مالیت کا اقتصادی ریلیف پیکج دیا ہے۔
ان کے بقول پیکج کے تحت مستحق افراد کو آئندہ چار ماہ تک ماہانہ 3000 روپے کا وظیفہ دیا جائے گا جب کہ بے روزگار ہونے والے افراد کو رقم فراہم کرنے کے لیے 200 ارب روپے مختص کیے جائیں۔
حفیظ شیخ کا کہنا تھا کہ حکومت اشیائے خور و نوش اور زراعت کے شعبے میں لاگت کو کم کرنے کے لیے سبسڈی دے رہی ہے۔
- By یوسف جمیل
بھارتی کشمیر میں کرونا وائرس کے مریضوں میں اضافہ، پابندیاں مزید سخت
بھارت کے زیرِ انتظام کشمیر میں مزید چار افراد میں کرونا وائرس یا کووڈ -19 کی تصدیق کے بعد پابندیوں کو مزید سخت کر دیا گیا ہے۔
جن چار افراد کے ٹیسٹ مثبت آئے ہیں اُن کا ایک ایسے شخص سے میل ملاپ تھا جو حال ہی میں ایک تبلیغی جماعت میں شامل ہونے کے لیے کشمیر سے باہر گیا تھا۔
رپورٹس کے مطابق یہ شخص پہلے ہی سرینگر کے ایک اسپتال میں زیرِ علاج ہے۔
اسی طرح لداخ سمیت جموں و کشمیر میں کووڈ-19 سے متاثرہ افراد کی تعداد 24 تک پہنچ گئی ہے۔
ڈاکٹروں کا کہنا ہے کہ اب تک اس وائرس کے تین مریض صحت یاب ہو چکے ہیں۔
سرینگر سمیت چھوٹے بڑے شہروں اور قصبوں میں پولیس اور نیم فوجی دستے کرفیو جیسی پابندیاں نافذ کر رہے ہیں۔
دفعہ 144 اور ڈزاسٹر منیجمنٹ ایکٹ 2005 کے تحت نافذ کی جانے والی پابندیوں کی خلاف ورزی کرنے پر 200 سے زائد افراد کو حراست میں لیا گیا ہے یا ان کے خلاف مقدمات درج کیے گئے ہیں۔
مقامی سطح سے سامنے آنے والی رپورٹس کے مطابق درجنوں دکانوں اور ہوٹلوں کو مبینہ طور پر قانون توڑنے پر سیل کیا گیا ہے۔
'کرونا وائرس کے مریضوں کی تیمار داری کرنے والا عملہ مساجد نہ آئے'
پاکستان کے مختلف مسالک کے جید علما نے کہا ہے کہ وہ طبی عملہ اور نوجوان جو کرونا وائرس کے مریضوں کی تیمار داری کر رہے ہیں مساجد نہ آئیں۔ وہ گھر پر بھی جماعت سے نماز پڑھ سکتے ہیں۔
کراچی میں گورنر ہاؤس سندھ میں اجلاس کے بعد مفتی تقی عثمانی، مفتی منیب الرحمٰن، شہنشاہ نقوی سمیت دیگر مسالک کے جید علما نے مشترکہ پریس کانفرنس کی۔
پریس کانفرنس سے خطاب کرتے ہوئے علما کا کہنا تھا کہ نابالغ بچوں کو بھی مساجد نہ لایا جائے تاکہ ان کو مرض سے محفوظ رکھا جا سکے۔
جماعت کے ساتھ نماز کی ادائیگی کے حوالے سے انہوں نے کہا کہ باجماعت نماز گھر کی خواتین اور اہل خانہ کے ہمراہ بھی ادا ہو سکتی ہے۔
ان کا مزید کہنا تھا کہ وہ طبی عملہ اور نوجوان جو کرونا وائرس کے مریضوں کا علاج اور تیمارداری کر رہے ہیں۔ ان کے باجماعت نماز کے لیے مسجد نہ آنے پر گناہ نہیں ہوگا۔ وہ گھر میں جماعت کروا سکتے ہیں۔
علما نے مساجد صاف رکھنے، پردے اور قالین ہٹانے جب کہ مرکزی دروازوں پر سیناٹائزر لگانے پر بھی زور دیا۔
شہریوں پر زور دیتے ہوئے انہوں نے کہا کہ یہ وقت توبہ اور استغفار کا ہے۔ عوام اپنے گناہوں پر توبہ کریں۔
علما نے مساجد کے آئمہ کو جمعے کے دن خطبہ بھی مختصر کرنے کی تاکید کی۔