- By سارہ حسن
کرونا وائرس: چین سے مزید امدادی سامان پاکستان پہنچ گیا
کرونا وائرس کے پاکستان میں بڑھتے ہوئے کیسز اور سہولیات میں کمی کے پیش نظر ہمسایہ ملک چین نے پاکستان کو امدادی سامان بھیجا ہے۔
پاکستان کی فضائیہ کے ترجمان کے مطابق چین سے امدادی سامان سے لیس پی اے ایف کا طیارہ پی اے ایف بیس نور خان پہنچا۔
چینی حکومت نے یہ امدادی سامان مہلک وبا سے مؤثر طریقے سے نمٹنے کے لیے پاکستان کو بطور عطیہ بھیجا ہے۔
پاکستان کی فضائی فوج کے مطابق 14ٹن امدادی سامان میں وینٹی لیٹر، این-95 ماسک اور حفاظتی لباس شامل ہیں۔
بلوچستان میں چار ڈاکٹر کرونا سے متاثر
بلوچستان میں چار ڈاکٹر کرونا وائرس سے متاثر ہو گئے ہیں۔ دوسری جانب مریضوں کی تعداد بھی 138 ہوچکی ہے۔
محکمہ صحت نے صوبے کے دو اضلاع کو کرونا سے متاثر قرار دیا ہے۔
بلوچستان میں محکمہ صحت کے ترجمان نے چار ڈاکٹرز میں کرونا وائرس کی تصدیق کی ہے جن کو کوئٹہ کے شیخ زید اسپتال منتقل کیا گیا ہے جب کہ ایک ڈاکٹر کو گھر میں آئیسولیشن میں رکھا گیا ہے۔
ینگ ڈاکٹرز ایسوسی ایشن کے ترجمان ڈاکٹر رحیم بابر نے ڈاکٹروں میں وائرس کی تصدیق کرتے ہوئے بتایا ہے کہ ڈاکٹر بصیر، ڈاکٹر جہانزیب، ڈاکٹر ضیا ءالحق ناصر اور ڈاکٹر فضل الرحمٰن بابر میں کرونا وائرس کی تصدیق ہوئی ہے۔
ان کے بقول یہ تمام ڈاکٹرز کوئٹہ اور گردونواح میں فرائض انجام دے رہے تھے۔
دوسری جانب صوبائی حکومت نے کرونا وائرس کے بڑھتے ہوئے کیسز کے بعد قیدیوں کی سزاؤں میں چار ماہ کی کمی کا نو ٹیفیکیشن جاری کر دیا ہے۔
حکومت نے صوبے میں 1500 کنٹینرز پر مشتمل ایک اسپتال قائم کرنے کا فیصلہ بھی کیا ہے۔
اسپتال پی ڈی ایم اے تعمیر کرے گی جس میں تمام سہولیات ہوں گی۔ اس کے ساتھ ساتھ اسے ایک جگہ سے دوسری جگہ باآسانی منتقل کیا جا سکے گا۔
- By روشن مغل
پاکستانی کشمیر میں کرونا وائرس کے چھ مریض
پاکستان کے زیر انتظام کشمیر کے وزیر برائے بہبود آبادی ڈاکٹر مصطفیٰ بشیر نے بتایا ہے کہ کشمیر کرونا وائرس کے کیسز چھ ہو گئے ہیں۔
ان کے بقول نئے چار کرونا مریضوں میں بھمبر کی دو خواتین یورپی ملک اسپین سے آنے والی ایک خاتون کی موت کے بعد آخری رسومات میں شرکت کے دوران وائرس کا شکار ہوئی۔
انہوں نے کہا کہ دو افراد کا تعلق برطانیہ سے آنے والے ایک شخص کے اہل خانہ میں سے ہے۔ یہ شخص کرونا وائرس کے میر پور قرطنیہ سینٹر میں زیرعلاج ہے۔
پاکستان میں 24 گھنٹوں میں کوئی نیا کیس سامنے نہیں آیا
پاکستان میں سرکاری طور پر جاری اعداد وشمار کے مطابق 24 گھنٹوں میں کرونا وائرس کا کوئی بھی کیس سامنے نہیں آیا۔
اعداد وشمار کے حوالے سے بنائی گئی ویب سائٹ نمبرز کےمطابق پاکستان میں مجموعی طور پر 1526 افراد میں کرونا وائرس کی تصدیق ہوئی ہے جب کہ 28 افراد اس وبا سے صحت یاب ہو چکے ہیں۔
اعداد و شمار کے مطابق ہلاک ہونے والے افراد کی تعداد 13 ہو گئی ہے تاہم گزشتہ 24 گھنٹوں میں کوئی شخص اس وبا سے ہلاک نہیں ہوا۔
مقامی میڈیا میں مزید تین افراد کی ہلاکت کی خبریں چل رہی ہیں تاہم سرکاری طور پر اس کو ویب سائٹ پر اپڈیٹ نہیں کیا گیا۔
پاکستان کے ابادی کے لحاظ سے سب سے بڑے صوبے پنجاب میں 558 افراد میں کرونا کی تصدیق ہوئی ہے۔ سندھ میں 481، خیبر پختونخوا میں 188، بلوچستان میں 138، گلگت بلتستان میں 116، کشمیر میں 2 جب کہ وفاقی دارالحکومت اسلام آباد میں 43 کیسز کی تصدیق کی گئی ہے۔