بالی وڈ کے مزدوروں کی مدد، فنکاروں نے لاکھوں روپے عطیہ کر دیے
بالی وڈ فلموں کی دنیا میں جہاں فنکار، پروڈیوسرز اور دیگر بڑی بڑی شخصیات اربوں روپے کمانے کی باتیں کرتے نظر آتے ہیں وہیں اس انڈسٹری سے جڑے ایسے افراد کی بھی کمی نہیں جو برسوں سے انڈسٹری سے وابستہ رہنے کے باوجود تنگ دستی کا شکار ہیں۔
کرونا وائرس کی وبا اور طویل لاک ڈاؤنز کے سبب جہاں بڑی بڑی فلموں اور ڈراموں کی شوٹنگز رک گئی ہیں وہیں غریب ورکرز کی مالی حالت بھی خراب کردی ہے اور وہ دو وقت کی روٹی کے لیے بھی پریشان ہوگئے ہیں۔
لیکن فلمی دنیا کی بہت سی شخصیات نے ان کی پریشانی کو محسوس کرتے ہوئے عطیات دینے شروع کر دیے ہیں۔
'کرونا وائرس سے سی پیک کو کوئی خطرہ نہیں'
پاکستان کے دفتر خار جہ کی ترجمان عائشہ فاروقی نے کہا ہے کہ کرونا وائرس کی عالمی وبا کے باوجود پاکستان میں جاری چین پاکستان اقتصادی راہداری ' سی پیک' منصوبوں کو وقت پر مکمل کر لیا جائے گا۔
عائشہ فاروقی نے یہ بات جمعرات کو کرونا وائرس کی وبا کی وجہ سے سی پیک پر ممکنہ اثرات کے بارے میں پوچھے گئے سوال کے تحریری جواب میں کہی۔
ترجمان نے کہا کہ سی پیک طویل المدتی منصوبوں پر مشتمل ہے۔ زیادہ تر منصوبوں کی تکمیل کے لیے کئی سال درکار ہیں۔ ترجمان نے کہا کہ وہ پر اعتماد ہیں کہ یہ منصوبے بروقت مکمل کر لیے جائٰیں گے۔
یادر ہے کہ سی پیک منصوبوں پر ہزاروں چینی شہری کام کر رہے ہیں۔ کرونا وائرس کی وبا پھوٹنے کے بعد ان چینی شہریوں کے پاکستان آنے کی اطلاعات بھی ہیں۔
پاکستان کی دفتر خارجہ کی ترجمان نے کہا کہ کرونا وائرس کی وبا کے بعد پاکستان اور چین کی حکومت ایک دوسرے کے ساتھ قریبی رابطے میں ہیں۔
کرونا وائرس کو کسی مسلک سے جوڑنا مناسب نہیں، اسلامی نظریاتی کونسل
پاکستان میں اسلامی قوانین سے متعلق آئینی ادارے اسلامی نظریاتی کونسل کے چیئرمین نے کہا ہے کہ حکومت کی جانب سے مساجد کی تالا بندی یا بندش کا تاثر نہیں جانا چاہئے اور انتظامیہ عوام کو آگاہی فراہم کرنے کے سلسلے میں مساجد کے آئمہ سے تعاون حاصل کرے نہ کہ ان کے خلاف مقدمات کا اندراج کیا جائے۔
کرونا وائرس کے باعث پیدا شدہ صورت حال اور مذہبی مسائل سے متعلق اسلامی نظریاتی کونسل کے ہنگامی اجلاس کے بعد صحافیوں سے بات کرتے ہوئے چیئرمین ڈاکٹر قبلہ ایاز نے کہا کہ کرونا وائرس کے سبب وفات پانے والے افراد کے لئے لفظ ہلاک استعمال نہ کیا جائے بلکہ انہیں شہید یا جاں بحق لکھا جائے۔
ان کا کہنا تھا کہ کرونا وائرس کے باعث وفات پانے والوں کے غسل اور تدفین کا انتظام کیا جائے اور احتیاتی تدابیر اور سماجی فاصلے کو یقینی بناتے ہوئے قریبی رشتہ داروں کو جنازہ و تدفین میں شرکت کی اجازت دی جائے اور تدفین کرتے ہوئے تکریم و احترامِ انسانیت کا مکمل خیال رکھا جائے۔
تاہم کونسل موجودہ حالات میں نماز جمعہ کی ادائیگی کے حوالے سے کوئی واضح فیصلہ کرنے میں ناکام رہی ہے۔ خیال رہے کہ نماز جمعہ کے حوالے سے گائیڈ لائنز فراہم کرنا کونسل کے اجلاس کے ایجنڈے میں شامل تھا۔
کونسل نے واضح کیا کہ کرونا وائرس کو کسی مسلک یا فرقے کے ساتھ جوڑنا مناسب نہیں ہے اور یہ کہ عمرہ کے مسافر ہوں، مقدس مقامات کے زائرین ہوں یا تبلیغی جماعت کے کارکن، ان کا اس بیماری کے پھیلاؤ کے ساتھ کوئی تعلق نہیں ہے۔
انہوں نے کہا کہ عمرہ و زیارات یا دیگر مذہبی رسومات کی ادائیگی کے لیے مختص رقم کو بھی کرونا وائرس سے معاشی دباؤ کے شکار افراد کی مدد کے لئے استعمال کیا جا سکتا ہے اور اس موقع پر اقلیتی برادری کو بطور خاص یاد رکھا جائے۔
ڈیموکریٹ پارٹی کا کنونشن اگست تک مؤخر
امریکی ڈیموکریٹک پارٹی نے صدارتی امیدوار کی نامزدگی کے لیے مقررہ کنوینشن ایک ماہ آگے بڑھا دیا ہے، جو اب اگست میں منعقد ہو گا۔ جمعرات کو اس بات کا اعلان کرتے ہوئے پارٹی نے اس التوا کا سبب کرونا وائرس کا بحران قرار دیا۔ کرونا انفکشن کے تیزتر پھیلاؤ نے امریکہ بھر میں زندگی کے نظام کو درہم برہم کر دیا ہے۔
نومبر کے صدارتی انتخاب میں صدر ڈونلڈ ٹرمپ کے مقابلے لیے ڈیموکریٹس ملواکی میں منعقد ہونے والے کنوینشن میں اپنے امیدوار کا باضابطہ فیصلہ کریں گے۔
ڈیموکریٹ نیشنل کنوینشن کمیٹی کے سربراہ، جو سلمانیز نے کہا ہے کہ ''موجودہ غیر یقینی ماحول میں، ہم سمجھتے ہیں کہ بہتر انداز یہی ہو گا کہ اس بات کا انتظار کیا جائے کہ صورت حال کیا رخ اختیار کرتی ہے''۔
صدارتی انتخابی مہم زیادہ تر آن لائن چلائی جا رہی ہے اور زیادہ تر ریاستوں نے پارٹی نامزدگی کے لیے رائے شماری میں تاخیر کا اعلان کیا ہے۔
ڈیموکریٹک پارٹی کے سرکردہ مد مقابل امیدوار، جو بائیڈن نے بدھ کے روز کنوینشن کو موئخر کرنے کا مطالبہ کیا تھا۔