عالمی وبا کے خلاف اپنے اختلافات بھلا کر متحد ہو جائیں، ایسڑ پر پوپ فرانسس کا پیغام
پوپ فرانسس نے آج سینٹ پیٹرزبیسیلیکا کے خالی ہال سے اپنے ایسٹر کے خطاب میں کہا کہ پوری دنیا اس وقت عذاب سے گذر رہی ہے اور وقت کا تقاضا ہے ہم سب متحد رہیں۔ لاتعقی، خود غرضی، نفاق اور ایک دوسرے کو معاف کرنا، ایسے الفاظ نہیں جو صرف آج کے لیے ہیں، بلکہ ان پر ہمیشہ عمل کرنا ہو گا۔ اس وقت عالم گیر انسانی خاندان کو اس وبا کی وجہ سے سخت آزمائش کا سامنا ہے۔
پوپ کے خطاب کے وقت سینٹ پیٹرز بیسیلیکا میں چند حاضرین موجود تھے۔پوپ نے کرونا کے مرض میں ہلاک ہونے والوں اور ان کے خاندان والوں کے لیے خصوصی دعا کی۔
پوپ نے ان ڈاکٹروں، نرسوں اور ہیلتھ ورکرز کو خراج تحسین پیش کیا جو اپنی جان جوکھوں میں ڈال کر خدمات سر انجام دے رہے ہیں۔
کرونا وائرس کی وجہ سے ایشیا کی اقتصادی ترقی کی رفتار سست پڑنے کا خدشہ
ایسے میں جب کہ دنیا کے دوسرے حصوں کی طرح جنوب ایشیائی خطے میں بھی لاک ڈاؤن ہے۔ ورلڈ بینک کی ایک رپورٹ میں کہا گیا ہے، وہاں کے ملکوں میں اس سال معاشی شرح نمو چار عشروں کے بعد پہلی بار کمترین سطح پر رہے گی۔
وائس آف امریکہ کی نامہ نگار انجنا پسریچا نے اپنی ایک رپورٹ میں بتایا ہے کہ عالمی ادارے کی ایشیائی ملکوں کی اقتصادی صورت حال پر مرکوز رپورٹ میں تخمینہ لگایا گیا ہے کہ امکان یہ ہے کہ خطے میں شرح نمو گر کر ایک اعشاریہ آٹھ سے لیکر دو اعشاریہ آٹھ فیصد تک رہے گی۔ جب کہ چھ ماہ قبل یعنی کرونا وائرس کی وبا سے قبل تخمینہ تھا کہ شرح نمو چھ اعشاریہ تین فیصد رہے گی۔
یہ خیال ظاہر کیا جا رہا ہے کہ حالیہ برسوں میں لاکھوں لوگوں کو، جہیں غربت کی لکیر سے اوپر لایا گیا تھا، وہ ساری کوششیں اکارت جائیں گی۔
توقع ہے کہ جنوبی ایشیا کے کچھ ممالک کی شرح نمو بہت کم رہے گی جب کہ ماہرین کے مطابق بعض ملکوں میں کساد بازاری بھی ہو سکتی ہے۔
سپریم کورٹ میں سماعت آج ہو گی
سپریم کورٹ میں کرونا وائرس کی روک تھام کے حکومتی اقدامات پر از خود نوٹس کی سماعت آج ہوگی۔ وفاق، پنجاب اور خیبرپختونخوا کی حکومتوں نے اپنے جواب جمع کرا دیے ہیں۔
چیف جسٹس گلزار احمد کی سربراہی میں سپریم کورٹ کا پانچ رکنی بینچ سماعت کرے گا۔ سماعت کے دوران کرونا وبا پر حکومتی اقدامات کا جائزہ لیا جائے گا۔
عدالت نے سماعت کے لیے اٹارنی جنرل، سیکریٹری صحت، سیکریٹری داخلہ، چاروں صوبائی ایڈووکیٹ جنرلز اور چیف سیکریٹریز کو نوٹس جاری کر رکھے ہیں۔
پاکستان میں ہلاکتیں 93 ہو گئیں
