بھارت میں ہلاکتیں 300 سے زیادہ، متاثرہ مریض 9152 ہو گئے
بھارت میں گزشتہ 24 گھنٹوں کے دوران کرونا وائرس سے 35 اموات ہوئی ہیں جس کے بعد ہلاکتوں کی مجموعی تعداد 308 ہو گئی ہے۔
بھارت کی وزارتِ صحت کے مطابق ملک بھر میں کرونا وائرس کے کیسز کی تعداد 9152 ہو گئی ہے۔ عالمی وبا سے بھارت کے 364 اضلاع متاثر ہیں جہاں سے کرونا کے مثبت کیسز سامنے آئے ہیں۔
ملک بھر میں لاک ڈاؤن کے معیشت پر منفی اثرات مرتب ہوئے ہیں۔ وزیرِ اعظم نریندر مودی کی زیرِ صدارت اجلاس کے دوران لاک ڈاؤن میں دو ہفتوں کی توسیع کے اشارے دیے گئے ہیں۔
سپریم کورٹ میں از خود نوٹس کی سماعت
چیف جسٹس آف پاکستان جسٹس گلزار احمد کی سربراہی میں سپریم کورٹ میں کرونا وائرس از خود نوٹس کی سماعت کے دوران عدالت نے حکومتی ٹیم اور اس کی کارکردگی پر سوال اٹھائے۔
چیف جسٹس نے کہا کہ سمجھ نہیں آ رہی کس قسم کی ٹیم کرونا پر کام کر رہی ہے۔ عدالت کو حکومتی ٹیم نے صرف اعداد و شمار بتائے ہیں۔ بریفنگ میں حکومتی ٹیم سے پانچ سوال پوچھے تھے لیکن حکومتی ٹیم ٹیم کسی ایک سوال کا بھی جواب نہیں دے سکی۔
اٹارنی جنرل نے مؤقف اختیار کیا کہ کوئی ملک کرونا سے لڑنے کے لیے پیشگی تیار نہیں تھا۔ چیف جسٹس نے کہا کہ ریاستی مشینری کو اجلاسوں کے علاوہ بھی کام کرنے ہوتے ہیں۔ کیا ملک بند کرنے سے پہلے اس کے اثرات کا جائزہ لیا گیا؟
چیف جسٹس نے ریمارکس دیے کہ وزیرِ اعظم کی کابینہ غیر مؤثر ہو چکی ہے۔ وفاقی و صوبائی حکومتیں اپنے اپنے راستے اختیار کیے ہوئے ہیں۔ ہر سیاست دان اپنا علیحدہ بیان دے رہا ہے۔
