لاک ڈاؤن میں جزوی نرمی، پنجاب اور سندھ میں محدود پیمانے پر کاروباری سرگرمیاں بحال
پاکستان میں کرونا وائرس کے جائزہ اور اقدامات کے لیے قائم قومی رابطہ کمیٹی کی جانب سے لاک ڈاؤن میں جزوی نرمی کے فیصلے کے بعد پنجاب، سندھ اور اسلام آباد میں محدود پیمانے پر کاروباری سرگرمیاں بحال ہونا شروع ہو گئی ہیں۔
وزیر اعظم عمران خان کی صدارت میں منگل کو قومی رابطہ کمیٹی کے اجلاس میں لاک ڈاؤن کو مزید دو ہفتوں کے لیے بڑھانے کی منظوری دی گئی تھی البتہ بعض صنعتوں اور کاروبار کو حفاظتی اقدامات کے ساتھ کھلنے کی اجازت دی گئی تھی۔
پاکستان میں کرونا وائرس کے پھیلاؤ کو روکنے کے لیے گزشتہ تین ہفتوں سے لاک ڈاؤن جاری ہے۔ ملک بھر میں اشیا ضروریہ اور ادویات کے علاوہ تمام کاروباری سرگرمیاں معطل تھیں۔
قومی رابطہ کمیٹی کے فیصلے کی روشنی میں پنجاب، سندھ اور وفاقی دارالحکومت اسلام آباد میں محدود پیمانے پر کاروباری سرگرمیاں بحال ہونا شروع ہو گئی ہیں جب کہ خیبر پختونخوا حکومت اس حوالے سے بدھ کو کابینہ اجلاس میں فیصلہ کرے گی۔
بلوچستان کی حکومت نے جمعرات سے بعض کاروبار کھلنے کی اجازت کا حکم نامہ جاری کیا ہے۔
قومی رابطہ کمیٹی کے فیصلے کے تحت ملک بھر میں مارکیٹیں اور بازار لاک ڈاؤن کے تیسرے مرحلے میں بھی بند رہیں گے۔
اس سے قبل مختلف تاجر تنظیموں نے حکومت سے احتیاطی تدابیر کے ساتھ کاروبار کھولنے کا مطالبہ کیا تھا۔
ترکی میں قانون سازی، ہزاروں قیدی عارضی طور پر رہا کیے جائیں گے
ترکی نے کرونا وائرس کے باعث جیلوں میں قید ایک تہائی افراد کو رہا کرنے کے لیے قانون سازی کر لی ہے۔
ترکی کے نشریاتی ادارے 'ٹی آر ٹی' کی رپورٹ کے مطابق پارلیمنٹ نے پینل ریفارمز بل کی منظوری دے دی ہے۔ اس بل کے تحت ہزاروں قیدوں کی سزاؤں میں کمی یا نرمی کی جا رہی ہے۔
پارلیمنٹ کے 600 میں سے 279 ارکان نے بل کے حق میں ووٹ دیا جب کہ 51 نے اس کی مخالفت کی۔
برطانوی خبر رساں ادارے ' رائٹرز' کے مطابق قیدیوں کی رہائی کے بل کی حمایت صدر رجب طیب ایردوان کی جماعت جسٹس اینڈ ڈیولپمنٹ پارٹی (اے کے پارٹی) اور ان کی اتحادی قوم پرست جماعتوں نے کی۔
اس بل کی منظوری کے بعد عارضی طور پر 45 ہزار کے قریب قیدی رہا ہونے کا امکان ہے۔ نئے قانون کے مطابق عارضی طور پر رہا ہونے والے قیدیوں کو مئی کے آخر تک رہا کیا جائے گا۔
وائرس سے بچاؤ کے لیے بھارت میں نیا ہدایت نامہ
بھارت کی حکومت نے لاک ڈاؤن کے دوسرے مرحلے کے لیے ایک نیا ہدایت نامہ جاری کیا ہے۔ جس کے مطابق عوامی اور کام کے مقامات پر فیس ماسک لگانا لازمی قرار دیا گیا ہے۔ عوامی مقامات پر تھوکنا جرم قرار دیا گیا ہے۔ تھوکنے پر جرمانہ ہو گا۔
حکومت نے 20 اپریل کے بعد معاشی سرگرمیوں کے لیے ایک فہرست جاری کی ہے جس کے مطابق دیہی علاقوں میں عمارتوں کی تعمیر کی اجازت ہو گی۔ البتہ شہری علاقوں میں یہ اجازت اسی صورت میں ہو گی اگر مزدور وہیں قیام کریں گے۔
دیہی علاقوں میں مینوفیکچرنگ یونٹس اور صنعتوں کو کام کرنے کی اجازت ہو گی۔ جو علاقے کرونا کے مراکز نہیں ہیں وہاں خودروزگار کی اجازت ہوگی۔ اس چھوٹ کے دائرے میں زراعت، باغبانی اور منڈیاں بھی شامل ہیں۔
لیکن سوئمنگ پولز، اسپورٹس کمپلیکس، بارز، سنیما ہالز، شاپنگ مالز، تعلیمی ادارے، کوچنگ سینٹر، ڈومیسٹک اور بین الاقوامی پروازیں اور ٹرین و بس سروسز تین مئی تک بند رہیں گی۔
بھارت کی ریاستوں کے درمیان آمدورفت اور میٹرو سروسز بھی بند رہیں گی۔ تمام مذہبی مقامات اور عبادت گاہیں بھی عوام کے لیے بند رہیں گی۔ مذہبی اجتماعات پر سختی سے پابندی رہے گی۔ بدھ کو بھارت میں کرونا کے مثبت کیسز کی تعداد بڑھ کر 11439 اور ہلاکتوں کی تعداد 377 ہو گئی ہے۔