کرونا وائرس پاکستان کے کن علاقوں میں تیزی سے پھیل رہا ہے؟
پاکستان میں کرونا وائرس کے مریضوں کی تعداد میں مسلسل اضافہ ہو رہا ہے۔ بعض شہروں میں کرونا وائرس کے تیزی سے پھیلاؤ کے باعث کچھ علاقوں کو 'ہاٹ اسپاٹ' قرار دیا جا رہا ہے۔ یعنی وہ علاقے کرونا وائرس کا مرکز بنتے جا رہے ہیں۔
منگل کی صبح تک ملک بھر میں کرونا وائرس کے مریضوں کی تعداد 9200 سے زائد ہو چکی ہے جب کہ 192 ہلاکتیں بھی ہوئی ہیں۔ کرونا وائرس کے سب سے زیادہ مریض پنجاب میں ہیں جہاں 4195 افراد میں وائرس کی تصدیق ہوئی ہے۔
اس کے علاوہ سندھ میں 2764، خیبر پختونخوا میں 1276، بلوچستان میں 465، اسلام آباد میں 185، پاکستان کے زیرِ انتظام کشمیر میں 50 اور گلگت بلتستان کے علاقوں میں 281 افراد کرونا وائرس کے مریض پائے گئے ہیں۔
کرونا وائرس کا شکار ہونے والے دو ہزار سے زائد افراد اس وبا کو شکست دے کر صحت یاب ہو چکے ہیں۔
دارالحکومت اسلام آباد کے علاوہ لاہور، راولپنڈی، گجرات، کراچی، حیدرآباد، لاڑکانہ، کوئٹہ اور پشاور سمیت ملک کے کئی بڑے شہروں کو کرونا وائرس کے 'ہاٹ اسپاٹس' قرار دیا جا رہا ہے۔
عالمی بینک نے افغانستان کو دو کروڑ ڈالر کی رقم فراہم کر دی
عالمی بینک نے کرونا وائرس کی وبا سے نمٹنے کے ہنگامی اقدامات کے لیے افغانستان کو دو کروڑ ڈالر کی رقم فراہم کر دی ہے۔
عالمی بینک نے پیر کو جاری ایک بیان میں کہا ہے کہ یہ فنڈ افغانستان کے 34 اضلاع میں کرونا وائرس سے بچاؤ کے لیے اقدامات پر خرچ ہوں گے۔
عالمی بینک کے مطابق یہ رقم 10 کروڑ ڈالرز سے زائد کی اُس اعانت کا پہلا حصہ ہے جس کی منظوری عالمی بینک نے دو اپریل کو دی تھی۔
پاکستان کے وزیر خارجہ سے افغان ہم منصب کا رابطہ، امن عمل پر تبادلہ خیال
افغانستان میں قیام امن، بین الافغان مذاکرات اور قیدیوں کی رہائی کے معاملے پر اسلام آباد اور کابل نے مل کر کام کرنے پر اتفاق کیا ہے۔
افغانستان کے قائم مقام وزیر خارجہ حنیف اتمر نے قیام امن کے لیے پاکستان کی حمایت کو سراہتے ہوئے کہا ہے کہ اسلام آباد اور کابل اقتصادی تعاون کے مشترکہ فریم ورک پر بھی کام کر رہے ہیں۔
حنیف اتمر نے یہ بات پیر کو پاکستان کے وزیرخارجہ شاہ محمود قریشی سے ٹیلی فون پر رابطے کے بعد اپنی ٹوئٹس میں کہی۔
پاکستان کے دفتر خارجہ کے بیان کے مطابق وزیرخارجہ شاہ محمود قریشی اور ان کے افغان ہم منصب کے درمیان ہونے والی گفتگو میں کرونا وائرس سے نمٹنے کی مشترکہ کوششوں، امن و سلامتی اور اقتصادی تعاون پر بھی تبادلہ خیال کیا گیا۔
افغان صدر اشرف غنی اور اہلیہ کا کرونا ٹیسٹ منفی
افغان صدارتی دفتر کے ترجمان کے مطابق صدر اشرف غنی اور ان کی اہلیہ کا کرونا وائرس ٹیسٹ کیا گیا ہے جس کے نتائج منفی آئے ہیں۔
ترجمان صادق صدیقی کے مطابق صدر اشرف غنی کی صحت ٹھیک ہے اور وہ حکومتی معاملات دیکھ رہے ہیں۔