کاروبار کھولنے میں جلدی کی تو زیادہ نقصان ہوگا، عالمی ادارہ صحت
عالمی ادارہ صحت کے ایک اہلکار نے خبردار کیا ہے کہ جو ممالک جلد لاک ڈاؤن میں نرمی کریں گے، وہ کرونا وائرس کے دوبارہ بڑھنے کا خطرہ مول لیں گے۔
مغربی بحر الکاہل کے لیے ڈبلیو ایچ او کے ڈائریکٹر ڈاکٹر تاکیشی کاسائی نے آن لائن نیوز کانفرنس میں کہا کہ یہ لاک ڈاؤن میں نرمی کرنے کا وقت نہیں ہے۔ اس کے بجائے ہمیں کچھ عرصے تک خود کو نئے طرز زندگی کے لیے تیار رہنے کی ضرورت ہے۔
انھوں نے یہ مشورہ ایک ایسے موقع پر دیا ہے جب امریکہ کی کئی ریاستوں میں کاروبار کھولنے کے لیے مظاہرے کیے جا رہے ہیں، جبکہ ایشیا اور یورپ کی کئی حکومتیں لاک ڈاؤن میں نرمی کرنے پر غور کر رہی ہیں۔
عالمی ادارہ صحت نے اپنے ایک وفد کو یورپی ملک بیلارس بھی بھیجا تاکہ وہ اس کے صدر الیگزینڈر لوکاشینکو پر زور دے کہ وہ اپنے ملک میں لاک ڈاؤن کریں۔ بیلارس کی حکومت نے اپنے شہریوں کو سماجی فاصلے کی ہدایت تک نہیں کی۔ صدر لوکاشینکو نے ماننے کے بجائے کہا ہے کہ ڈبلیو ایچ او والے ہم سے محبت نہیں کرتے۔ یہ بین الاقوامی ادارہ ہے جس میں بہت سی سیاست ہوتی ہے۔
امریکہ کرونا وائرس کے خلاف جنگ میں یمن کی مدد کرے گا
ابھی تک یمن میں کرونا کا ایک کیس سامنے آیا ہے۔ لیکن، اس جنگ زدہ ملک کے کمزور طبی نظام کو دیکھتے ہوئے یہ اندیشہ ظاہر کیا جا رہا ہے کہ اگر یہاں اس وبا نے زور پکڑا تو پھر بے حد خطرناک صورت حال پیدا ہو جائے گی۔ پانچ سالہ خانہ جنگی نے اس ملک کے بنیادی ڈھانچے کو تباہ و برباد کر دیا ہے۔
اس وقت یمن کی اسی فی صد آبادی کو انسانی ہمدردی کی بنیاد پر امداد کی ضرورت ہے۔
امریکی محکمہ خارجہ کے ایک سینئر اہل کار نے اپنا نام ظاہر نہ کرنے کی شرط پر بتایا ہے کہ ''ہم یمن میں کرونا وائرس کے سلسلے میں انسدادی اقدامات کے لیے فنڈ کی فراہمی کے لیے راستہ تلاش کر رہے ہیں؛ اور امید ہے کہ اس کے لیے ہمیں متبادل ذرائع مل جائیں گے''۔
اہل کار نے یہ نہیں بتایا کہ امریکہ کتنی فنڈنگ کرے گا۔ تاہم، انہوں نے کہا کہ ہم با اعتماد صحت کے اداروں کی تلاش میں ہیں، جن کے ذریعے یہ امداد یمن تک پہنچائی جا سکے۔
جمعرات کو اقوام متحدہ کے امدادی شعبے کے سربراہ مارک لوکاک نے سلامتی کونسل کو بتایا تھا کہ وبائی امراض کے ماہرین نے انتباہ کیا ہے کہ یمن میں کرونا وائرس تیزی سے پھیل سکتا ہے۔
ہالینڈ میں وائرس کا غصہ، سیلولر ریڈیو ٹاور کا کھمبا نذر آتش
ہالینڈ کے ایک بزنس پارک کی ایک سی سی ٹی وی فٹیج میں کالی ٹوپی پہنے ہوئے ایک شخص کو ایک سیلولر ریڈیو ٹاور کی بنیاد میں ایک سفید ڈبے سے کوئی مواد گراتے ہوئے دیکھا جا سکتا ہے۔ اس کے بعد، اُس کھمبے سےشعلے بھڑکتے دکھائی دے رہے ہیں اور وہ شخص اپنی کار کی جانب جاتے اور رات کے تاریکی میں گم ہوتا دیکھا جا سکتا ہے۔
یہ وہ منظر ہے جسے حالیہ ہفتوں میں یورپ میں درجنوں بار دہرایا گیا ہے۔ شبہات پر مبنی سوچ کے حامی فائیو جی موبائل نیٹ ورک کو کرونا وائرس کی عالمی وبا سے جوڑتے ہیں، جس کی وجہ سے اِن ٹاوروں پر حملے ہو رہے ہیں۔
کرونا وائرس اور فائیو جی ٹیکنالوجی کے بارے میں غلط سوچ کو لاکھوں مرتبہ سوشل میڈیا پر شیئر کیا جا چکا ہے۔ ان میں عام تاثر یہ ہے کہ کرونا وائرس فائیو جی ٹاوروں کی وجہ سے پھیل رہا ہے۔
صرف برطانیہ میں اس ماہ مواصلاتی ٹاوروں کو پچاس مرتبہ آگ لگائی گئی ہے۔ مواصلاتی انجینئروں کو کام کرتے ہوئے اَسی مرتبہ زد و کوب کیا گیا ہے۔ تقریباً سولہ ٹاوروں کو ہالینڈ میں آگ لگائی گئی ہے۔ آئرلینڈ، قبرص اور بیلجئم سے بھی حملوں کی اطلاعات موصول ہوئی ہیں۔
امریکہ میں مریضوں کی تعداد 8 لاکھ، اموات 45 ہزار
ریاست ہائے متحدہ امریکہ پر کرونا وائرس کے حملے بدستور جاری ہیں جن سے مریضوں کی تعداد 8 لاکھ اور اموات کی تعداد 45 ہزار تک پہنچ گئی ہے۔ برطانیہ اور سویڈن میں ایک بار پھر ہلاکتوں کی تعداد میں اضافہ ہوگیا ہے۔
جانز ہاپکنز یونیورسٹی اور ورڈومیٹرز کے مطابق 210 ممالک اور خود مختار علاقوں میں کرونا وائرس کے مصدقہ کیسز ڈھائی ملین یعنی 25 لاکھ اور اموات ایک لاکھ 77 ہزار سے بھی زیادہ ہوگئی ہیں۔ ان میں سے ڈیڑھ لاکھ ہلاکتوں اور 20 لاکھ مریضوں کا تعلق شمالی امریکہ اور یورپ سے ہے۔
24 گھنٹوں کے دوران برطانیہ میں 828، اٹلی میں 534، فرانس میں 531، اسپین میں 430، سویڈن میں 185، جرمنی میں 171، بیلجیم میں 170، نیدرلینڈز میں 165، برازیل میں 154، کینیڈا میں 141 اور ترکی میں 119 افراد ہلاک ہوئے۔ ایران میں 88، بھارت میں 53 اور روس میں 51 مریض دم توڑ گئے۔