- By سہیل انجم
بھارت: تبلیغی جماعت کے ارکان 28 روز گزرنے کے باوجود قرنطینہ میں رہنے پر مجبور
بھارت کے دارالحکومت نئی دہلی کے علاقے نظام الدین میں واقع تبلیغی جماعت کے مرکز سے تعلق رکھنے والے اراکین کو قرنطینہ مراکز میں 28 روز گزارنے کے باوجود جانے کی اجازت نہیں دی جا رہی جب کہ دیگر لوگوں کو 14 دن قرنطینہ میں گزارنے کے بعد جانے دی جا رہا ہے۔
اس سلسلے میں 'دہلی اقلیتی کمیشن' نے دہلی کے وزیر صحت ستیندر جین کے نام ایک خط میں کہا ہے کہ تبلیغی جماعت کے اراکین کو 28 روز بعد بھی جانے کی اجازت نہیں دی جا رہی۔ جس کی وجہ سے مسلم طبقے میں غلط پیغام جا رہا ہے اور اگر انہیں جانے کی اجازت نہیں دی گئی تو اس پر مقدمات بھی قائم ہو سکتے ہیں۔
اقلیتی کمیشن کے چیئرمین ڈاکٹر ظفر الاسلام خان نے وزیر صحت سے اپیل کی ہے کہ تبلیغی جماعت کے جن اراکین کو قرنطینہ مراکز میں رکھا گیا ہے۔ ان میں سے جن کا کرونا ٹیسٹ منفی آیا ہے۔ ان کو وہاں سے جانے کی اجازت دی جائے۔
وزیر صحت یا وزارت صحت کے کسی اہلکار کی جانب سے اس خط کا تاحال کوئی جواب نہیں دیا گیا۔
پاکستان میں صحافی کرونا وائرس کے نشانے پر
اسلام آباد میں پیر کو کرونا وائرس سے پہلے صحافی کی ہلاکت ہوئی ہے۔ پاکستان کے سرکاری خبر رساں ادارے 'اے پی پی' کے سابق صحافی عبدالرشید بھٹی کرونا وائرس میں مبتلا ہو کر انتقال کر گئے ہیں۔
اس کے ساتھ 'اے آر وائے نیوز' کے اسلام آباد بیورو آفس میں آٹھ صحافیوں میں کرونا وائرس کی تصدیق ہوئی ہے جس کے بعد بیورو آفس کو بند کر دیا گیا ہے۔
مختلف ٹی وی پروگراموں میں آنے والے مہمانوں کی وجہ سے بھی خوف و ہراس پیدا ہو رہا ہے۔ حال ہی میں ایدھی فاؤنڈیشن کے سربراہ فیصل ایدھی کرونا وائرس کا شکار ہوئے تھے۔ اس دوران وہ مختلف ٹی وی چینلز کے پروگراموں میں بھی شریک ہوتے رہے تھے اور وزیرِ اعظم عمران خان سے ملاقات بھی کی تھی۔
فیصل ایدھی کی مختلف پروگراموں میں شرکت کے بعد سما ٹی وی میں ایک اسٹوڈیو کیمرہ مین کا کرونا ٹیسٹ مثبت آیا ہے جب کہ پروڈیوسر اور اینکر ندیم ملک سمیت باقی افراد کے ٹیسٹ منفی آئے ہیں۔ ان افراد کو فوری طور پر قرنطینہ کر دیا گیا تھا۔
اے آر وائے کے بیورو آفس میں اب تک 20 افراد کے ٹیسٹ کرائے گئے ہیں جن میں سے آٹھ افراد میں کرونا وائرس کی تصدیق ہوئی ہے۔ ان میں ڈی ایس این جی کے وہ اسٹاف ممبر بھی شامل ہیں جو فیصل ایدھی کی رہائش گاہ پر پروگرام کے لیے گئے تھے۔
اس سے قبل 'اے پی پی' کی ویڈیو سروس میں بھی کرونا وائرس کا ایک ٹیسٹ مثبت آنے کے بعد دفتر کو بند کر دیا گیا تھا اور ملازمین کو گھروں سے کام کرنے کا کہا گیا تھا۔
'جیو نیوز' کے کراچی دفتر میں ایک ٹیکنیشن کا کرونا وائرس ٹیسٹ مثبت آنے کے بعد اسٹاف کو محدود کیا گیا ہے اور ہر فلور کے اسٹاف کو دوسرے کسی فلور پر جانے سے سختی سے منع کیا گیا ہے۔
چینل '24 نیوز' کے پروڈیوسر اور اسٹاف ممبرز میں بھی کرونا وائرس کے کیسز رپورٹ ہوئے ہیں۔ اس کے ساتھ ہی 'جی نیوز' اور 'ہم نیوز' کے اسلام آباد دفتر میں بھی کرونا وائرس کے مریض سامنے آئے ہیں۔
پاکستان کے زیرِ انتظام کشمیر میں دو صحافیوں کا کرونا ٹیسٹ مثبت آیا ہے۔ جس کے بعد دو درجن کے قریب صحافی قرنطنیہ میں چلے گئے ہیں۔ مظفر آباد میں قائم سینٹرل پریس کلب بھی سیل کر دیا گیا ہے۔
سینٹرل پریس کلب مظفر آباد کے صدر سجاد قیوم نے بتایا ہے کہ کرونا کا شکار ہونے والے دونوں صحافی پاکستانی کشمیر کے وزیرِ صحت کا انٹرویو کرنے ان کے دفتر گئے تھے۔ جہاں وہ کرونا وائرس میں مبتلا وزیر صحت کے پرائیویٹ سیکریٹری سے بھی ملے تھے اور ممکنہ طور پر ان ہی سے کرونا وائرس کا شکار ہوئے۔
امریکہ میں جانور ایڈاپٹ کرنے والوں میں غیر معمولی اضافہ
کرونا وائرس کی وبا کے باعث امریکہ بھر میں جانوروں کی پناہ گاہیں خالی ہو رہی ہیں کیوں کہ لوگ بڑی تعداد میں ان شیلٹر ہومز سے جانوروں کو پالنے کے لیے اپنے گھر لے جا رہے ہیں۔
جانوروں کی فلاح کے لیے سرگرم ایک امریکی ادارے کی صدر کِٹی بلاک کہتی ہیں کہ انہوں نے ماضی میں کبھی ایسا نہیں دیکھا کہ لوگ اتنی بڑی تعداد میں جانوروں کو ایڈاپٹ کر رہے ہوں۔
خبر رساں ادارے 'اے ایف پی' سے گفتگو کرتے ہوئے کِٹی کا کہنا تھا کہ شیلٹر ہومز سے جانوروں کو پالنے کے لیے گھر لے جانے والوں کی تعداد یک دم بہت بڑھ گئی ہے۔ ہر شیلٹر ہوم سے ایسی ہی اطلاعات مل رہی ہیں اور یہ بہت خوش آئند ہے۔ اس کے باعث کئی جانوروں کی زندگیاں محفوظ ہو گئی ہیں۔
کِٹی بلاک 'ہیومین سوسائٹی آف دی یونائیٹڈ اسٹیٹس' نامی تنظیم کی سربراہ ہیں جو امریکہ بھر میں پھیلے جانوروں کے 400 سے زائد شیلٹر ہومز کے ساتھ مل کر کام کرتی ہے۔
کِٹی کے بقول امریکہ میں 'کووڈ 19' کی وبا پھیلنے کے بعد بہت سارے شیلٹر ہومز بند کر دیے گئے تھے کیوں کہ لوگوں کو گھروں میں رہنے کے احکامات دیے جا رہے تھے۔ لہذا ان پناہ گاہوں نے لوگوں سے اپیل کی تھی کہ لوگ وہاں موجود جانوروں کو ایڈاپٹ کر لیں۔ اس سلسلے میں لوگوں کا ردِ عمل بہت حوصلہ افزا رہا ہے۔
ان کے بقول لوگ شیلٹر ہومز سے بڑی تعداد میں کتے، بلیاں، خرگوش، سور اور مرغیاں پالنے کے لیے اپنے گھر لے گئے ہیں۔
سندھ حکومت کا عوامی ریلیف پیکیج کا آرڈیننس لانے کا فیصلہ
سندھ کابینہ نے صوبے میں کرونا وائرس کے پھیلاؤ سے پیدا شدہ صورت حال سے نمٹنے کے لئے آرڈیننس تیار کر کے منظوری کے لئے گورنر کو بھیجنے کا فیصلہ کیا ہے۔ آرڈیننس کے تحت صوبے کی حدود میں تمام نجی اسکولز پر بیس فیصد فیس کٹوتی لازم قرار دی گئی ہے۔
اسی طرح وہ صارفین جن کے بجلی کے بلز ساڑھے تین سو سے چار سو یونٹس تک آتے ہیں، انہیں بجلی کا 50 فیصد بل قابل ادائیگی ہو گا جبکہ باقی آئندہ ماہ اقساط میں واجب الادا ہوں گے۔ اسی طرح صوبے میں 80 گز پلاٹ تک کے تمام پانی کے کنکشنز کے بل معاف تصور ہوں گے، جبکہ 81 سے 160 گز کے پلاٹ میں پانی کے کنکشنز پر 25 فیصد بل منہا کیے جائیں گے۔
مسودے کے مطابق کوئی نجی اسکول 80 فیصد سے زائد فیس وصول نہیں کر سکے گا۔
آرڈیننس کی منظوری کے بعد مالک مکان کرایہ اداروں کو ادائیگی میں مکمل یا جزوی رعایت دینے کے پابند ہوں گے، جس کے تحت 50 ہزار روپے سے کم کرایہ رواں ماہ کی بجائے تین ماہ میں اقساط کی صورت میں ادا کیا جائے گا۔ اسی طرح مسودے کے تحت ایک لاکھ تک کا کرایہ پچاس فیصد ادا کیا جائے گا اور باقی تین ماہ میں ادا کیا جا سکے گا۔
بجلی کے علاوہ گیس کے 200 یونٹ تک کے بل پر بھی 25 فیصد کی رعایت دی گئی ہے۔ جب کہ تین سو یونٹس کے گیس بل پر پچاس فیصد رعایت ہو گی۔ تاہم اگر گیس کا بل تین سو یونٹس سے زیادہ ہو گا تو اسے پورا ادا کرنا ہو گا۔
صوبائی حکومت نے اسی طرح محصولات اور مختلف کیٹیگریز کی فیسوں میں بھی رعایت کا اعلان کیا ہے جس کے بارے میں متعلقہ محکمے رعایت کا نوٹیفکیشن جاری کریں گے۔ مسودے کے تحت وزیراعلی کو آرڈیننس میں کسی بھی وقت ترمیم یا تنسیخ کا اختیار ہو گا۔
ریلیف آرڈیننس کی خلاف ورزی پر سزا بھی تجویز کی گئی ہے۔ آرڈیننس کے تحت ریلیف نہ دینے والوں پر دس لاکھ روپے تک جرمانہ بھی عائد کیا جا سکے گا۔