پاکستان میں کیسز 20 ہزار سے بڑھ گئے
ٹرمپ کا رواں برس کے اختتام تک کرونا ویکسین کی تیاری کا وعدہ
امریکہ کے صدر ڈونلڈ ٹرمپ نے رواں برس ہونے والے صدارتی انتخابات کے لیے باقاعدہ طور پر انتخابی مہم کا آغاز کر دیا ہے۔ اس مہم کے آغاز پر انہوں نے عوام سے وعدہ کیا کہ رواں برس کے اختتام تک کرونا وائرس کے علاج کے لیے ویکسین تیار کر لی جائے گی۔
صدر ٹرمپ نے انتخابی مہم کا آغاز اتوار کو 'فاکس نیوز' کو دیے گئے ایک انٹرویو سے کیا۔ انٹرویو کے لیے انہوں نے لنکن میموریل کے اندرونی احاطے کا انتخاب کیا۔
صدر ٹرمپ نے عوام سے وعدہ کیا کہ رواں برس کے اختتام تک کرونا وائرس کی ویکسین تیار کر لی جائے گی۔ انہوں نے عوام پر زور دیا کہ وہ عالمی وبا سے پھیلنے والی مایوسی کو ترک کریں اور شاندار مستقبل کی طرف دیکھیں۔
دو گھنٹے طویل اس انٹرویو کے دوران صدر ٹرمپ نے زیادہ وقت کرونا وائرس اور اس سے نمٹنے کے لیے کیے جانے والے اقدامات پر صرف کیا۔
- By نذر الاسلام
لاک ڈاؤن نے خیبرپختونخوا کے مقامی فن کاروں کو مایوس کر دیا
کرونا وائرس کے باعث پاکستان ميں جاری لاک ڈاؤن نے جہاں ديگر شعبہ ہائے زندگی کو جکڑ کر رکھ ديا ہے وہیں صوبہ خيبر پختونخوا ميں فن و ثقافت کے شعبے سے تعلق رکھنے والے فن کار ان دنوں شديد کسمپرسی کی زندگی گزار رہے ہيں۔
شادی بياہ اور ديگر تقريبات سميت ہر قسم کی سرگرميوں پر پابندی کے باعث فن کاروں کے گھروں ميں تنگ دستی نے ڈيرے ڈال لیے ہيں۔
فياض خان کا تعلق صوبہ خيبر پختونخوا کی خوبصورت وادی سوات سے ہے۔ اُن کا کہنا ہے کہ کرونا وبا کے بعد خوف کی وجہ سے تمام محفليں بند ہيں۔
وائس آف امريکہ سے بات کرتے ہوئے انہوں نے بتايا کہ اکثر لوگ موسيقی سے لطف اندوز ہونے کے لیے ديگر اضلاع سے اس وادی کا رُخ کرتے تھے ليکن لاک ڈاؤن کی وجہ سے اب وہ بھی نہيں آسکتے اور نہ ہم کہيں جا سکتے ہيں۔
دنیا بھر میں کرونا وائرس کے مریضوں کی تعداد 35 لاکھ 67 ہزار سے متجاوز
دنیا بھر میں کرونا وائرس کے مریضوں کی تعداد 35 لاکھ 67 ہزار سے متجاوز ہو گئی جب کہ سب سے زیادہ متاثرہ افراد امریکہ میں 11 لاکھ 88ہزار ہیں۔
وبا سے متعلق اعداد و شمار جمع کرنے والی ویب سائٹ 'ورلڈو میٹرز' کے مطابق امریکہ کے بعد سب سے زیادہ مریضوں کی تعداد اسپین میں 2 لاکھ 47 ہزار، اٹلی میں 2 لاکھ 10ہزار، برطانیہ میں ایک لاکھ 86 ہزار، فرانس میں ایک لاکھ 68ہزار جب کہ جرمنی میں ایک لاکھ 65ہزارافراد میں وائرس کی تصدیق ہوئی ہے۔
روس میں حکام نے ایک لاکھ 34 ہزار، ترکی میں ایک لاکھ 26ہزار، برازیل میں ایک لاکھ ایک ہزار، ایران میں 97ہزار جب کہ چین میں 82 ہزار افراد کے وبا سے متاثر ہونے کی تصدیق کی گئی ہے۔
خیال رہے کہ کرونا وائرس کا آغاز چین سے ہوا تھا۔ جہاں ہوبے صوبے کے شہر ووہان سے یہ وائرس دنیا بھر میں دسمبر 2019 میں پھیلا تھا۔