کرونا سے 260 نرسیں ہلاک، طبی عملے کے 90 ہزار افراد متاثر: رپورٹ
انٹرنیشنل کونسل فار نرسز (آئی سی این) جنیوا نے اپنی ایک رپورٹ میں کہا ہے کہ دنیا بھر میں کرونا وائرس کے باعث 260 نرسیں ہلاک جب کہ طبی عملے کے 90 ہزار سے زائد اراکین متاثر ہو چکے ہیں۔
رپورٹ میں کہا گیا ہے کہ حکومتوں کی جانب سے درست اعداد و شمار فراہم نہ کرنا، حفاظتی سامان کی کمی اور دیگر وجوہات کے باعث وائرس سے متاثرہ طبی عملے کی تعداد اس سے دگنا بھی ہو سکتی ہے۔
خبر رساں ادارے 'رائٹرز' کے مطابق 'آئی سی این' کے چیف ایگزیکٹو آفیسر ہاورڈ کیٹن کا کہنا ہے کہ حکومتیں وائرس سے متاثر ہونے والے طبی عملے کے مستند اعداد و شمار فراہم نہیں کر رہیں۔
اُن کا کہنا تھا کہ یہ ڈیٹا دنیا کے 30 ملکوں سے جمع کیے جانے والے اعداد و شمار پر مشتمل ہے۔ لہذٰا وائرس کے باعث ہلاک یا متاثر ہونے والے افراد کا جامع ڈیٹا مرتب کرنے کی ضرورت ہے۔
لاک ڈاؤن میں نرمی ہو گی یا نہیں، پاکستان میں قومی رابطہ کمیٹی کا اجلاس
پاکستان میں لاک ڈاؤن جاری رہے گا یا نہیں، لاک ڈاؤن میں نرمی کی جائے گی یا نہیں؟ کس حد تک نرمی ممکن ہے؟ ان تمام معاملات پر بات چیت کے لیے وزیر اعظم کی زیر صدارت قومی رابطہ کمیٹی کا اجلاس جاری ہے۔
قومی رابطہ کمیٹی، نیشنل کمانڈ اینڈ کنٹرول سینٹر (این سی او سی) کی طرف سے دی گئی تجاویز کا جائزہ لے کر فیصلے کرے گی۔
اس اجلاس میں چاروں صوبوں کے وزرائے اعلٰی بھی شریک ہیں۔
قومی رابطہ کمیٹی لاک ڈاؤن میں نرمی کے ساتھ ساتھ اس ضمن میں تیار کردہ ایس او پیز کی منظوری بھی دے گی۔
این سی او سی نے گزشتہ روز وفاقی وزیر اسد عمر کی زیرِ صدارت اجلاس میں لاک ڈاؤن میں نرمی سے متعلق سفارشات مرتب کی تھیں۔
نیشنل کمانڈ اینڈ آپریشن سنٹر نے ملک بھر میں 11 مئی سے لاک ڈاؤن میں نرمی، چھوٹی دکانیں، عید کی خرید و فروخت سے متعلق دکانیں، مقامی ٹرانسپورٹ اور اندرون ملک پروازیں کھولنے کی تجاویز منظور کر لیں۔ تاہم این سی او سی نے تجویز دی کہ اسکولز، شادی ہال، ہوٹل اور بڑے شاپنگ مالز بند رکھے جائیں اور ریلوے سروس بھی فی الحال بحال نہ کی جائے۔
این سی او سی اجلاس میں پائپ ملز، الیکٹریکل کیبلز، اسٹیل، ایلومینیم، برتن سازی کی صنعتیں، سینٹری، پینٹس، ہارڈ وئیر اسٹورز کھولنے کی سفارش بھی کی گئی۔
رمضان کے آخری 15 روز میں مذہبی اجتماعات کے لیے قواعد وضوابط میں تبدیلی نہ کرنے کا بھی فیصلہ کیا گیا۔
وزیر اعظم قومی رابطہ کمیٹی میں ہونے والے فیصلوں سے متعلق قوم کو اعتماد میں لیں گے۔
چیف جسٹس اسلام آباد ہائی کورٹ اطہر من اللہ کے سیکریٹری کا کرونا ٹیسٹ مثبت
اسلام آباد ہائی کورٹ کے چیف جسٹس اطہر من اللہ کے سیکرٹری کا کرونا ٹیسٹ مثبت آ گیا ہے۔ جس کے بعد چیف جسٹس سمیت ہائی کورٹ کے دیگر ملازمین کے ٹیسٹ کرنے کے لیے محکمہ صحت کی ٹیم ہائی کورٹ پہنچ گئی ہے۔
اسلام آباد ہائی کورٹ میں چیف جسٹس کے سیکرٹری نے چار مئی کو سرکاری لیب اور چھ مئی کو نجی لیب سے کرونا ٹیسٹ کرائے تھے۔
سرکاری لیب کی رپورٹ میں بتایا گیا کہ کرونا کی علامات ہیں، نجی لیب کی رپورٹ میں کورونا ٹیسٹ پازیٹو آنے کی واضح نشاندہی کی گئی۔ جس کے بعد چیف جسٹس کے سیکرٹری کا آفس سیل کر دیا گیا ہے اور انہیں رضاکارانہ طور پر گھر میں علیحدگی اختیار کرنے کی ہدایت کی گئی ہے۔
چیف جسٹس کے سیکرٹری، بخار کے باعث چند دنوں سے آفس نہیں آ رہے تھے جس کے بعد ان کا ٹیسٹ کرایا گیا تھا۔
چیف جسٹس کے سیکرٹری میں کرونا وائرس کی اطلاع کے بعد محکمہ صحت کے ڈاکٹرز کی ٹیم ٹیسٹنگ کٹس کے ساتھ اسلام آباد ہائی کورٹ کی ڈسپنسری پہنچ گئی۔ جہاں ملازمین کے کرونا ٹیسٹ کرنے کا عمل جاری ہے۔
محکمہ صحت کے مطابق چیف جسٹس اطہر من اللہ سمیت دیگر ججز کے بھی کرونا ٹیسٹ ہوں گے۔
پنجاب میں ترقیاتی اداروں کو دفاتر کھولنے کی مشروط اجازت
محکمہ صحت پنجاب نے صوبے بھر میں ترقیاتی اداروں کے دفاتر کھولنے کی مشروط اجازت دے دی ہے۔
ترجمان محکمہ صحت حافظ قیصر عباس کے مطابق متعلقہ اداروں کو ایس او پیز پر عمل کرنا ہو گا۔ جس کے تحت دفاتر میں سماجی فاصلہ، صفائی کے انتظامات اور ضرورت کے مطابق ماسک کے استعمال کو یقینی بنانے کی بھی ہدایت کی گئی ہے۔
جن اداروں کو کھولنے کی اجازت دی گئی ہے، ان میں لاہور ڈویلپمنٹ اتھارٹی، فیصل آباد ڈویلپمنٹ اتھارٹی سمیت دیگر اضلاع کے ترقیاتی ادارے شامل ہیں۔
لاہور ڈویلپمنٹ اتھارٹی (ایل ڈی اے) کے ڈائریکٹر جنرل احمد عزیز تارڑ کا کہنا ہے کہ تعمیراتی شعبہ کھولنے کے حکومتی اعلان کے بعد یہ ادارے کھولنا ناگزیر تھا۔
ڈی جی ایل اے کے مطابق ون ونڈو میں نئی عمارتوں کے نقشوں کی منظوری اور پہلے سے تعمیر شدہ عمارتوں میں تبدیلی کرنے کی درخواستیں وصول کی جائیں گی۔ نئی کمرشلائزیشن کی اجازت حاصل کرنے کی درخواستیں بھی جمع کرائی جا سکیں گی۔
وائس آف امریکہ سے گفتگو کرتے ہوئے ڈی جی ایل ڈی اے احمد عزیز تارڑ نے بتایا کہ دفاتر آنے سے پہلے تمام شہریوں کو آن لائن وقت ٹوکن لینا ہوگا۔ جس کے لیے ویب سائٹ www.lda.gop.pk پر خصوصی پورٹل بنا دیا گیا ہے۔
شہریوں کو بذریعہ ایس ایم ایس متعلقہ دفتر آنے کا دن اور وقت بتایا جائے گا۔