لاک ڈاؤن کے باعث معاشی مشکلات، پاکستان میں لوگ اثاثے بیچنے پر مجبور :سروے
رائے عامہ کا جائزہ لینے والے بین الاقوامی ادارے 'گیلپ انٹرنیشنل' سے منسلک 'گیلپ پاکستان' کرونا وائرس کی وجہ سے ہونے والے لاک ڈاؤن سے پیدا ہونے والے معاشی بحران پر پاکستان میں سروے کیا ہے جس کے مطابق ایک بڑی تعداد میں پاکستان کے عام شہریوں کے لیے نہ صرف غذائی اور مالی عدم تحفظ میں اضافہ ہوا ہے بلکہ انہیں روز مرہ کی بنیادی ضروریات کے لیے بعض اثاثے فروخت کرنے پڑے ہیں۔
'گیلپ پاکستان' نے فون پر کیے جانے والے سروے کے نتائج جمعرات کو جاری کیے۔ ان اعداد و شمار کے مطابق پاکستان میں تقریبا 69 لاکھ گھرانوں نے دعویٰ کیا کہ انہوں نے بنیادی ضروریاتِ زندگی پوری کرنے کے لیے روز مرہ کی خوراک میں کمی کی ہے۔
سروے کے مطابق لگ بھگ 23 فی صد پاکستانی ایسے ہیں جن کا روز مرہ کی بنیادی ضروریات کے لیے انحصار کم ترجیح کی حامل اور سستی اشیا خور و نوش پر ہے۔
اعداد و شمار کے مطابق پاکستان میں دو کروڑ 40 افراد ایسے ہیں جنہوں اپنی خوراک کے حصول کے لیے قرض یا اپنے کسی دوست کا عزیز کی مدد پر انحصار کرنا پڑا۔
پاکستان میں مریض ساڑھے 24 ہزار، اموات 585 ہوگئیں
پاکستان میں جمعرات کو کرونا وائرس کے مزید 571 کیسز کی تصدیق ہوئی جبکہ 21 مریض چل بسے۔ اس طرح ملک بھر میں اموات کی تعداد 585 تک پہنچ گئی ہے۔
سب سے زیادہ ہلاکتیں خیبر پختونخوا میں ہوئی ہیں جن کی تعداد 203 ہے۔ پنجاب میں 182، سندھ میں 171، بلوچستان میں 22، اسلام آباد میں 4 اور گلگت بلتستان میں 3 مریض جان سے ہاتھ دھو بیٹھے ہیں۔ آزاد کشمیر میں کسی کا انتقال نہیں ہوا۔
جمعرات کو کرونا وائرس کے 12 ہزار سے زیادہ ٹیسٹ کیے گئے۔ اب تک ملک بھر میں 2 لاکھ 44 ہزار سے زیادہ ٹیسٹ کیے جاچکے ہیں جن میں 24644 مثبت آئے ہیں۔
اب تک پنجاب میں 9195، سندھ میں 9093، خیبر پختونخوا میں 3712، بلوچستان میں 1659، اسلام آباد میں 521، گلگت بلتستان میں 388 اور آزاد کشمیر میں 76 مریضوں کی تصدیق ہوئی ہے۔
ملک میں 6464 مریض صحت یاب ہوچکے ہیں۔ ان میں پنجاب کے 3184، سندھ کے 1731، خیبرپختونخوا کے 939، گلگت بلتستان کے 288، بلوچستان کے 209، اسلام آباد کے 56 اور آزاد کشمیر کے 57 شہری شامل ہیں۔
سات ہفتوں میں 3 کروڑ 30 لاکھ امریکی بیروزگار
امریکہ میں گزشتہ ہفتے 32 لاکھ افراد نے محکمہ محنت کو مطلع کیا کہ وہ روزگار سے ہاتھ دھو بیٹھے ہیں اور انھیں مدد کی ضرورت ہے۔ اس طرح سات ہفتوں میں بیروزگار ہوجانے والوں کی تعداد 33 ملین یعنی 3 کروڑ 30 لاکھ تک پہنچ گئی ہے۔
بعض ریاستوں کے حکام نے کہا ہے کہ ان کے ایک چوتھائی سے زیادہ کام کرنے والوں کا ذریعہ آمدن ختم ہوا ہے۔
محکمہ محنت اپنی ماہانہ رپورٹ جمعہ کو جاری کرے گا۔ ماہرین معاشیات کا خیال ہے کہ اس میں اپریل کے مہینے میں بیروزگاری 15 فیصد یا زیادہ بیان کی جائے گی جو کساد بازاری کے زمانے کی شرح ہے۔
صدر ٹرمپ نے مارچ کے وسط میں ملک میں ہنگامی حالت کا اعلان کیا تھا۔ اس کے بعد پہلے ہفتے میں 33 لاکھ، دوسرے میں 69 لاکھ، تیسرے میں 66 لاکھ، چوتھے میں 52 لاکھ، پانچویں میں 44 لاکھ اور چھٹے ہفتے میں 38 لاکھ شہری بیروزگار ہوئے تھے۔
نشہ کرنے والوں کو قرنطینہ میں منشیات کی فراہمی
سان فرانسسکو کی انتظامیہ کو کرونا وائرس کے مقابلے کے دوران ایک نئے مسئلے کا سامنا کرنا پڑ رہا ہے اور وہ ہے قرنطینہ میں رکھے جانے والے کئی افراد کو ان کا نشہ پورا کرنے کے لیے منشیات کی فراہمی۔
ہوا کچھ یوں کہ کرونا وائرس کی بڑے پیمانے پر ٹیسٹنگ کے دوران درجنوں بے گھر افراد کے بارے میں یہ شبہ ہوا کہ وہ کرونا وائرس میں مبتلا ہو سکتے ہیں، جس کے بعد انہیں ٹیسٹ کے نتائج آنے تک کے لیے قرنطینہ کے ایک مرکز میں بھیج دیا گیا۔
سان فرانسسکو کی انتظامیہ نے ایک ہوٹل لیز پر لے کر اس کے کمروں میں متاثرہ افراد کو رکھنے کا بندوبست کیا ہے، جن میں ایسے بے گھر افراد بھی شامل ہیں جو مختلف نشوں کی لت میں مبتلا ہیں۔
قرنطینہ میں جانے کے بعد ان کے لیے اپنا نشہ پورا کرنا مشکل ہو گیا۔ نشہ ٹوٹنے پر ان کی حالت بگڑنے لگی اور نشہ پورا کرنے کے لیے باہر کی جانب لپکنے لگے، جس کے بعد یہ ضروری ہو گیا کہ ان کا نشہ پورا کیا جائے۔ تاہم، انتظامیہ کے پاس ایسا کوئی فنڈ موجود نہیں تھا جس سے منشیات خریدی جا سکیں۔