فواد چوہدری کا قومی اسمبلی کے اجلاس میں نہ جانے کا فیصلہ
پاکستان کے وفاقی وزیر سائنس و ٹیکنالوجی فواد چوہدری نے کہا ہے کہ وہ آج ہونے والے قومی اسمبلی کے اجلاس میں شرکت نہیں کریں گے۔
اپنے ایک ٹوئٹ میں انہوں نے کہا کہ حزب اختلاف کے دباؤ آکر پارلیمانی کمیٹی نے اجلاس بلانے کا غیر دانش مندانہ فیصلہ کیا ہے۔
نیوزی لینڈ میں جمعرات سے کاروباری سرگرمیوں کی بحالی کا اعلان
نیوزی لینڈ کی وزیرِ اعظم جیسنڈا آرڈرن نے جمعرات سے ملک بھر میں تمام شاپنگ مالز، سنیما، کیفے اور جم کھولنے کا اعلان کر دیا ہے۔
نیوزی لینڈ میں لگ بھگ ایک ماہ کے لاک ڈاؤن کے بعد پابندیوں میں مرحلہ وار نرمی کی جا رہی ہے۔
وزیرِ اعظم جیسنڈا آرڈرن نے اعلان کیا ہے کہ جمعرات سے تمام پبلک پارکس، کھیلوں کے میدان، کیفے، شاپنگ مالز، سنیما اور جم کھول دیے جائیں گے۔
نیوز کانفرنس کے دوران وزیرِ اعظم نے مزید کہا کہ آئندہ ہفتے پیر سے اسکول کھولے جائیں گے جب کہ 21 مئی سے بارز کھولے جائیں گے۔
پشاور میں بازار کھلتے ہی شہریوں کا رش
- By سہیل انجم
بھارت میں 24 گھنٹوں میں 4213 کیسز کی تصدیق، مجموعی تعداد 67 ہزار سے متجاوز
بھارت میں گزشتہ 24 گھنٹوں میں کرونا وائرس کے ریکارڈ 4213 مثبت کیسز سامنے آئے جب کہ مزید 97 افراد کی ہلاکت کی تصدیق کی گئی ہے۔
اس سے قبل سب سے زیادہ کیسز پانچ مئی کو 3900 سامنے آئے تھے۔
بھارت میں کرونا وائرس کے کیسز کی تعداد بڑھ کر 67152 ہو گئی ہے۔ حکام کا دعویٰ ہے کہ 20916 افراد صحت یاب ہو چکے ہیں۔
وزارت صحت نے اب تک 2206 افراد کی ہلاکت کی تصدیق کی ہے۔
دریں اثنا محکمہ ریلوے نے 12 مئی سے بتدریج مسافر گاڑیاں چلانے کا اعلان کیا ہے۔
شروع میں 15 ٹرینیں نئی دہلی ریلوے اسٹیشن سے ملک کے مختلف شہروں کے لیے چلیں گی۔
ذرائع کے مطابق پروازوں کا سلسلہ بھی 17 مئی سے مرحلہ وار شروع کرنے پر غور ہو رہا ہے۔