- By علی فرقان
قومی اسمبلی کا اجلاس: حزب اختلاف کی حکومتی حکمت عملی پر تنقید
پاکستان کی پارلیمنٹ کے ایوان زیریں کے اجلاس میں حزب اختلاف کے رہنماؤں نے کرونا وائرس کے حوالے سے حکومتی حکمت عملی پر تنقید کی ہے جب کہ وفاقی وزرا کہتے ہیں کہ اپوزیشن تنقید کے بجائے تجاویز پیش کرے۔
کرونا وائرس کے حوالے سے حکومتی حکمت عملی کا جائزہ لینے کے لیے بلائے گئے قومی اسمبلی کے اس غیر روایتی اجلاس کی صدارت ڈپٹی اسپیکر قاسم سوری نے کی۔
اپوزیشن رہنماؤں نے کرونا وائرس کے ٹیسٹ کی صلاحیت اور تعداد کے بارے میں حکومتی وزرا کے متضاد بیانات کا معاملہ ایوان میں اٹھایا جب کہ 18ویں ترمیم کے حوالے سے حکومتی رہنماؤں کے بیانات کو قومی یکجہتی کو سبوتاژ کرنے کی کوشش قرار دیا۔
ایوان میں خطاب کرتے ہوئے سابق وزیر اعظم اور مسلم لیگ (ن) کے رہنما شاہد خاقان عباسی نے کہا کہ پاکستان میں کرونا ٹیسٹ مثبت آنے کی شرح 19 فی صد اور اموات 11 فی صد تک پہنچ گئی ہیں جب کہ حکومت کے پاس کوئی حکمت عملی نہیں ہے جس کا نتیجہ عوام کو بھگتنا پڑے گا۔
شاہد خاقان عباسی نے کہا کہ حکومت اجلاس کر رہی ہے۔ وزیر اعظم خطاب کر رہے ہیں لیکن تاحال یہ واضح نہیں کہ اس وبا کے خلاف حکمت عملی پر حکومتی پالیسی کیا ہے۔
انہوں نے حکومت سے سوال کیا کہ کرونا وائرس کے حوالے سے حکمت عملی تحریری صورت میں قومی اسمبلی میں پیش کی جائے۔
حکومت کی جانب سے وفاقی وزیر تعلیم شفقت محمود نے اظہار خیال کرتے ہوئے کہا کہ اجلاس میں کرونا وائرس پر بات کرنے کے بجائے حکومت کو تنقید کا نشانہ بنایا جا رہا ہے۔ جس سے قومی اسمبلی کے بلائے گئے اس اجلاس کے مقاصد پورے نہیں ہوتے۔
ان کا کہنا تھا کہ اپوزیشن اپنی تجاویز سامنے لائے حکومت ان کو کرونا وائرس کے تدارک کی حکمت عملی کا حصہ بنائے گی۔
خیال رہے کہ پاکستان کی حکومت نے کاروباری سرگرمیاں بحال کرتے ہوئے لاک ڈاؤن میں نرمی کی ہے تاہم اسکول اور جامعات تاحال بند ہیں۔
قومی اسمبلی کا اجلاس ہر ایک دن کے وقفے کے ساتھ منعقد ہو رہا ہے جو کہ اب جمعے تک ملتوی کردیا گیا ہے۔
اجلاس میں سماجی فاصلے کو برقرار رکھنے کے انتظامات کیے گئے ہیں تاہم بعض اراکین کی جانب سے حفاظتی ہدایات کی خلاف ورزی پر ڈپٹی اسپیکر مائیک سے تنبیہ کرتے رہے۔
حکومت کی خواہش تھی کہ موجودہ حالات میں قومی اسمبلی کا ورچوئل اجلاس بلایا جائے، تاہم حزب اختلاف نے یہ کہہ کر اتفاق نہیں کیا کہ قواعد میں اس کی اجازت نہیں ہے۔
امریکہ میں ہلاک ہونے والوں کی تعداد اعلان کردہ تعداد سے یقینی طور پر زیادہ ہے: ڈاکٹر فاؤچی
وائٹ ہاؤس میں صحت سے متعلق اعلیٰ ترین مشیر ڈاکٹر انتھونی فاؤچی کا کہنا ہے کہ امریکہ میں کرونا وائرس سے ہلاک ہونے والوں کی تعداد اعلان کردہ 81000 سے یقینی طور پر کہیں زیادہ ہے۔
انہوں نے امریکی ریاستوں کو خبردار کیا کہ کاروبار کھولنے میں عجلت کے سنگین نتائج برآمد ہوں گے۔
ڈاکٹر فاؤچی نے سینیٹ میں اس وبا سے نمٹنے کے بارے میں امریکی حکومت کی حکمت عملی کی تحقیقات کرنے والے پینل کے روبرو بیان دیتے ہوئے کہا کہ امریکہ بھر میں اور خاص طور پر نیویارک میں بہت سے افراد اپنے گھروں میں چل بسے تام ان کی ہلاکتوں کو مجموعی تعداد میں شامل نہیں کیا گیا۔
انہوں نے ایسے کیسز کے بارے میں کوئی واضح تعداد نہیں بتائی۔
ڈاکٹر فاؤچی نے خبردار کیا کہ ستمبر سے نومبر کے دوران کرونا وائرس کی وبا شدید تر ہوسکتی ہے۔
انہوں نے امید ظاہر کی کہ اس وقت تک حکومت اس وبا سے نمٹنے میں زیادہ مہارت حاصل کر لے گی۔
امریکہ کی بیشتر ریاستوں کے گورنر اسٹورز، ریستوران اور دفاتر کو سماجی فاصلے کی پابندیوں کے ساتھ کھولنے کی اجازت دینے کا اعلان کر چکے ہیں۔
تاہم ڈاکر فاؤچی کا کہنا تھا کہ اگر ایسا کرتے وقت حکومت کی طرف سے جاری کردہ ہدایات پر عمل نہ کیا گیا تو اس بات کا حقیقی خطرہ موجود ہے کہ یہ وبا کنٹرول سے باہر ہو سکتی ہے۔
انہوں نے کہا کہ اس کے نتائج انتہائی خطرناک ہوں گے۔
انہوں نے کہا کہ امریکہ میں کرونا وائرس سے بچنے کے لیے آٹھ مختلف اقسام کی ویکسینز کی تیاری کا کام جاری ہے جب کہ یہ بات اس سال موسم خزاں یا سردیوں کے دوران ہی معلوم ہو سکی گی کہ ویکسین کی تیاری میں کامیابی حاصل ہوتی ہے یا نہیں۔
'افغانستان میں کرونا وائرس ابھی اپنی انتہا کی طرف بڑھ رہا ہے'
افغانستان کی وزارت صحت کے مطابق ملک میں گزشتہ 24 گھنٹوں میں کرونا وائرس کے 259 نئے کیسز سامنے آئے ہیں جس کے بعد مریضوں کی کل تعداد 5226 ہو گئی ہے۔
صحت کے نائب وزیر ڈاکٹر واحد اللہ مجروح نے کرونا وائرس کی وجہ سے ہونے والی اموات کی تعداد 132 بتائی ہے۔
انہوں نے ایک بار پھر خبردار کیا کہ لاک ڈاؤن کو جلد ختم کرنا مناسب نہ ہوگا کیوں کہ کرونا وائرس ابھی اپنی انتہا کی طرف بڑھ رہا ہے۔
پاکستان میں کرونا وائرس کے 35 ہزار مریض، 761 اموات
پاکستان میں بدھ کو کرونا وائرس کے مزید 962 مریضوں کی تصدیق ہوئی جبکہ اس میں مبتلا 24 افراد دم توڑ گئے ہیں۔
سرکاری اعدادوشمار کے مطابق ملک بھر میں ہلاک ہونے والوں کی تعداد 761 ہوگئی ہے جن میں خیبرپختونخوا کے 275، سندھ کے 234، پنجاب کے 214، بلوچستان کے 27، اسلام آباد کے 6، گلگت بلتستان کے 4 اور آزاد کشمیر کا ایک مریض شامل ہے۔
بدھ کو کرونا وائرس کے لگ بھگ 12 ہزار ٹیسٹ کیے گئے۔ اب تک ملک بھر میں 3 لاکھ 17 ہزار سے زیادہ ٹیسٹ کیے جاچکے ہیں جن میں 35298 مثبت آئے ہیں۔
سندھ میں کیسز کی تعداد 13341، پنجاب میں 13225، خیبرپختونخوا میں 5252، بلوچستان میں 2158، اسلام آباد میں 759، گلگت بلتستان میں 475 اور آزاد کشمیر میں 88 ہے۔
اب تک ملک میں 8899 مریض صحت یاب ہوچکے ہیں۔ ان میں پنجاب کے 4531، سندھ کے 2229، خیبرپختونخوا کے 1392، گلگت بلتستان کے 331، بلوچستان کے 256، اسلام آباد کے 92 اور آزاد کشمیر کے 68 شہری شامل ہیں۔