ویکسین تیار کرنے کا کام تیز کیا جائے، صدر ٹرمپ
صدر ڈونلڈ ٹرمپ نے متعلقہ اداروں پر زور دیا ہے کہ وہ ویکسین کی تیزی سے تیاری پر خصوصی توجہ دییں۔ جمعے کے روز وائٹ ہائوس میں 'آپریشن وارپ اسپیڈ' کا اعلان کرتے ہوئے، صدر نے کہا کہ سال کے اواخر تک ویکسین آ جانی چاہیے۔
تاہم، انہوں نے یہ بھی کہا کہ ''ویکسین آئے یا نہ آئے ملک کو بہرحال دوبارہ کھول دیا جائے گا''۔
ان کی انتظامیہ نے اس ہفتے اس بات کو یقینی بنانے کے منصوبے بھی تیار کرنے کے اقدامات کئے ہیں کہ امریکہ میں اہم نوعیت کے طبی ساز و سامان کی کمی نہ ہونے پائے۔
نامہ نگار پیٹسی ودکسارا نے اپنی رہورٹ میں بتایا ہے کہ صدر ٹرمپ کا ارادہ ہے کہ جنوری 2021ء تک کروڑوں کی تعداد میں کرونا وائرس کی ویکسین تیار ہو جائے۔
پبلک ہیلتھ کے بیشتر ماہرین سمجھتے ہیں کہ شاید ویکسین کی تیاری کے لئے دی گئی وقت کی حد میں یہ ممکن نہ ہو۔ لیکن ان کا کہنا ہے کہ یہ ہو سکتا ہے کہ ان لوگوں کے لئے جو زیادہ خطرے میں ہوتے ہیں، جیسا کہ ہیلتھ کیئر ورکرز یا ضعیف العمر افراد؛ ان کے لئے ہنگامی طور ہر استعمال کے واسطے یہ ویکسین تیار کر لی جائے۔
پالیسی سینٹر کے چیف میڈیکل ایڈوائزر، آنند پاریکھ کہتے ہیں کہ ہر کام کو انتہائی مہارت سے کرنا ہو گا۔
بقول ان کے، ''جہاں تک عام پبلک کا تعلق ہے ان کے استعمال کے لئے ویکسین کی تیاری کے واسطے، میرے خیال میں اگر سب کچھ ٹھیک ہو جاتا ہے، تو 18 مہینے کی مدت درکار ہو گی''۔
امریکہ روس کو 200 وینٹی لیٹرز تحفتاً دے گا
امریکہ اگلے ہفتے سے فوجی ٹرانسپورٹ کو ذریعے روس کو 200 وینٹی لیٹر تحفے میں بھجوا رہا ہے۔ یہ وینٹی لیٹرز روس میں کرونا وائرس کے بڑھتے ہوئے مریضوں کے علاج کے لیے بھجوائے جا رہے ہیں۔
وائس آف امریکہ کو سرکاری مراسلوں سے حاصل کردہ اطلاعات کے مطابق 50 وینٹی لیٹر کیلی فورنیا میں تیار ہوئے ہیں اور وہ 20 مئی کو جہاز کے ذریعے ماسکو کے سرجیکل سینٹر بھیجے جا رہے ہیں، بقیہ ایک سو پچاس 26 مئی کو بھیجے جائیں گے۔
امریکی حکومت ان کی کوئی قیمت وصول نہیں کرے گی اور یہ سو فی صد مفت دیے جائیں گے۔ اس میں ان کی ترسیل اور وینٹی لیٹرز سے متعلقہ آلات بھی شامل ہیں۔ اس کی کل لاگت سینتالیس لاکھ ڈالر بنتی ہے۔
امریکی فوجی طیارے اس مقصد کے لیے استعمال ہوں گے، کیوں کہ اس وقت کمرشل فلائیٹس دستیاب نہیں ہیں۔ متعلقہ امریکی حکام کا کہنا ہے کہ یہ وینٹی لیٹر روسی عوام کے لیے ارسال کیے جا رہے ہیں اور ان کا روس اور امریکہ کی فوج کے درمیان کسی شراکت داری سے کوئی تعلق نہیں ہے۔
سرکاری مراسلات کے مطابق، قومی دفاعی اختیاری ایکٹ کے تحت روس کے ساتھ کسی قسم کا فوجی تعاون نہیں کیا جا سکتا۔
روس میں کرونا وائرس کا حال ہی میں زور بڑھا ہے اور اس وقت دنیا میں سب سے زیادہ کرونا وائرس جن ملکوں میں پھیل رہا ہے ان میں روس دوسرے نمبر پر ہے۔
صدر ٹرمپ نے وسط اپریل میں اس مداد کی پیش کش کی تھی جسے روسی صدر پیوٹن نے قبول کر لیا ہے۔ وائٹ ہاوس کے مطابق، دونوں رہنماوں کی فون پر بات چیت ہوئی تھی جس میں کرونا وائرس کی روک تھام اور انسداد کے علاوہ ہتھیاروں پر کنٹرول جیسے معاملات پر تبادلہ خیال کیا گیا تھا۔
امریکہ اور بھی ایسے ملکوں کی امداد کر رہا ہے جو کرونا وائرس کے خلاف جنگ کر رہے ہیں۔
اطلاعات کے مطابق، بدھ کو ماسکو اور سینٹ پیٹرزبرگ کے ہسپتالوں میں نصب وینٹی لیٹرز میں آگ لگنے کے واقعات ہوئے تھے۔ اسی کمپنی کے بنے ہوئے ونیٹی لیٹرز روس نے اپریل کے شروع میں نیویارک اور نیو جرسی کے ہسپتالوں کو بھجوائے تھے۔ اس وقت ان ریاستوں کے ہسپتالوں میں وینٹی لیٹرز کی قلت تھی۔ ان ہسپتالوں نے ان وینٹی لیٹرز کو استعمال نہیں کیا تھا۔
ایئر کینیڈا نے 20 ہزار کارکنوں کی چھانٹی کر دی
ایئر کینیڈا ملک کے فضائی سفر کا سب سے بڑا ادارہ ہے۔ اس نےجمعے کے دن اعلان کیا کہ کرونا وائرس کی وبا کی صورت حال کے پیش نظر کم از کم 20،000 ملازمین کی چھانٹی کی جا رہی ہے۔
ایئر کینیڈا کے ملازمین کی کل تعداد 38،000 ہے۔
ایئرلائن نے بتایا ہے کہ وبا کے نتیجے میں فضائی کمپنی کی 95 فی صد پروازیں بند ہو چکی ہیں جب کہ صورت حال جلد معمول پر آنے کے کوئی آثار دکھائی نہیں دے رہے۔
بیان میں کہا گیا ہے کہ ''اس لیے، ہم نے آج ایک انتہائی مشکل فیصلہ کیا ہے کہ درپیش صورت حال کے پیش نظر ملازمین کی تعداد کم کی جائے۔ ہمیں افسوس ہے کہ ہم 50 سے 60 فی صد ملازمین کو نکالنے پر مجبور ہیں''۔
یہ فیصلہ 7 جون سے نافذالعمل ہو گا۔
ایئر کینیڈا نے مارچ میں اعلان کیا تھا کہ اخراجات میں کمی لانے کی حکمت عملی کے طور پر، ادارہ اپنے ملازمین کی تعداد تقریباً نصف تک کم کر دے گا۔
جب اپریل میں حکومت کینیڈا نے اجرت کے امدادی پیکیج کا اعلان کیا، تو ادارے نے اسی ماہ ان فلائٹ اٹنڈینٹس، مکینکس اور کسٹمر سروس کے ملازمین کو دوبارہ ملازمت میں رکھا۔ تاہم، حکومت چھ جون کے بعد اس پروگرام کو جاری رکھنے کا ارادہ نہیں رکھتی۔
ایئر کینیڈا کے انتظامی سربراہ، کالن رونسکو نے جاری دور کو شہری ہوابازی کی تاریخ کا سیاہ ترین عہد قرار دیا ہے، جو 11 ستمبر 2001ء کے دہشت گرد حملوں اور 2008 کے مالی بحران سے کہیں زیادہ بدتر دور ہے۔
امریکہ اور کینیڈا کی سرحد تمام غیر ضروری سفر کے لیے بند ہے۔ ایئرلائن نے 200 سے زائد طیاروں کی پرواز روک دی ہے، جب کہ بین الااقوامی فضائی سفر کے لیے محض پانچ ہوائی اڈے کھلے ہوئے ہیں۔
ایئر کینیڈا نے بتایا ہے کہ رواں سال کی پہلی سہ ماہی کے دوران، 1.05 ارب کینیڈین ڈالر یعنی 748 ملین امریکی ڈالر کا نقصان ہوا، ایسے میں جب دنیا بھر میں کرونا وائرس کی وبا پھیلنے کے بعد حکومت نے سفر پر پابندیاں عائد کرنے کا اعلان کیا۔
سپر سٹار نرس کی پینٹنگ کی دھوم
حال ہی میں پینٹنگ لوگوں کی توجہ اپنی جانب مبذول کر رہی ہے جس میں ایک بچہ اپنے کھلونوں کی ٹوکری میں سے سپر مین اور بیڈ مین کی بجائے کھیلنے کے لیے ایک نرس کو چن لیتا ہے، جس نے اپنے منہ پر ماسک پہنا ہوا ہے۔
اس تصویر کو کرونا وائرس کے خلاف پہلی صف میں کھڑے ہو کر لڑنے والے صحت کے عملے کو خراج کے طور پر دیکھا جا رہا ہے اور برطانیہ کے صحت کے عہدے داروں نے اس آرٹ ورک پر خوشی کا اظہار کیا ہے۔
یہ پینٹنگ ایک ایسے آرٹسٹ نے بنائی ہے جو دیواروں پر اپنا آرٹ پینٹ کرتا ہے۔ نرس کی اس پینٹنگ کو بدھ کے روز جنوبی انگلنیڈ کے ساؤتھ ایمٹن کے یونیورسٹی ہاسپٹل میں آویزاں کیا گیا۔
اس آرٹ ورک کی ایک تصویر انسٹا گرام پر بانکسی کے پیج پر بھی پوسٹ کی گئی ہے جسے'گیم چینجر' کا عنوان دیا گیا ہے۔
اسپتال کی چیف ایکزیکٹو، پاؤلا ہیڈ کا کہنا ہے کہ بانکسی کے تخلیق کردہ اس شاندار آرٹ ورک کو یہاں پیش کرتے ہوئے ہم بہت خوشی اور فخر محسوس کر رہے ہیں۔ اس پینٹنگ میں بانکسی نے نیشنل ہیلتھ سروس اور ہمارے اسپتال میں کام کرنے والوں کا شکریہ ادا کیا ہے۔ یہ پینٹںگ اصل میں مسیحاؤں کی تصویر کشی ہے۔
پاؤلا نے ٹوئٹر پر بھی اس پینٹنگ کو غیر معمولی موجودہ دور کی ایک متاثر کن تصویر کہہ کر سراہا ہے۔
بانکسی کی کرونا وائرس پر یہ پہلی پینٹنگ نہیں ہے۔ اس سے قبل پچھلے مہینے انہوں نے تیزی سے بھاگتے ہوئے ایک چوہےکی پینٹنگ اپنے پیج پر پوسٹ کی تھی جس کا عنوان تھا کہ ''جب میں گھر سے کام کرتا ہوں تو میری بیوی اسے ناپسند کرتی ہے''۔
بانکسی دیواروں پر بھی تصویریں بناتے ہیں جن میں سے ایک پینٹنگ میں ایک لڑکی کا چہرہ دکھایا گیا ہے۔ حال ہی میں اس چہرے پر کرونا سے بچاؤ کے لیے ماسک کا اضافہ کر دیا گیا ہے۔ تاہم، اس اضافے کے متعلق انسٹاگرام پر یہ تصدیق نہیں کی گئی کہ ان کا کام ہے۔
اسپتال کی انتظامیہ کا کہنا ہے کہ نرس کی پینٹنگ کی نمائش کوویڈ 19 کے لاک ڈاؤن کے اختتام کے بعد تک جاری رہے گی اور اس کے بعد اسے نیشنل ہیلتھ سروس کی چیرٹی کے لیے نیلام کر دیا جائے گا۔