پاکستان میں اموات کی شرح 2.1 فی صد
پاکستان میں کرونا وائرس سے ہلاک ہونے والے افراد کی تعداد 1101 ہو گئی ہے۔
سرکاری اعداد و شمارے مطابق گزشتہ 24 گھنٹوں میں وبا سے 34 افراد کی موت ہوئی ہے۔
خیال رہے کہ وبا سے اب تک سب سے زیادہ خیبر پختونخوا میں 381 ہلاکتیں ہوئی ہیں جب کہ سندھ میں 340 افراد کی ہلاکت کی تصدیق کی گئی ہے۔
پنجاب میں 324، بلوچستان میں 39، اسلام آباد میں 12، گلگت بلتستان میں 4 اور پاکستان کے زیر انتظام کشمیر میں ایک فرد کرونا وائرس کی وجہ سے ہلاک ہوا ہے۔
حکام کے مطابق پاکستان میں اموات کی شرح 2.1 فی صد ہے۔
امریکی بحری بیڑا روزویلٹ دو ماہ بعد ایک بار پھر گہرے پانیوں میں
امریکہ کا بحری بیڑا یو ایس ایس تھیوڈور روزویلٹ دو ماہ بعد ایک بار پھر گہرے پانیوں میں رواں دواں ہے۔
بحری بیڑے میں گیارہ سو اہلکاروں میں کرونا وائرس کی تصدیق ہوئی تھی۔ وائرس سے بیڑے پر موجود ایک اہلکار کی موت بھی ہوئی تھی۔ جس کے بعد بیڑے کو گوام پر موجود امریکی بیس تک لے جایا گیا جہاں بیڑے پر موجود پانچ ہزار اہلکاروں کے کرونا وائرس کے ٹیسٹ کیے گئے۔
ان میں سے اب بھی پندرہ سو اہلکار گوام میں امریکی بیس پر موجود ہیں۔ ان میں سے سات سو اہلکار ایسے ہیں جن میں وبا کی تصدیق ہو چکی ہے۔