برطانیہ یکم جون سے پرائمری اسکول کھولنے کے لیے تیار
برطانیہ کی حکومت نے اعلان کیا ہے کہ کرونا وائرس کے سبب پیدا ہونے والی صورت حال کے پیش نظر طے شدہ پروگرام کے تحت یکم جون سے پرائمری اسکول کھول دیے جائیں گے۔
خبر رساں ادارے ‘رائٹرز’ کے مطابق وزیر برائے ٹرانسپورٹ گرانٹ شیپس کا اتوار کو کہنا تھا کہ اسکول کھولنے سے متعلق اساتذہ اور مزدوروں کی کچھ یونینز کی طرف سے مخالفت سامنے آرہی ہے۔ تاہم برطانوی حکومت اسکول یکم جون سے کھول دے گی۔
انڈونیشیا میں 21 مزید ہلاکتیں، 526 نئے کیسز رپورٹ
انڈونیشیا میں اتوار کے روز کرونا وائرس کے 526 مزید کیسز سامنے آئے ہیں۔ جس کے بعد انڈونیشیا میں کرونا وائرس سے متاثرہ افراد کی تعداد 22271 تک پہنچ گئی ہے۔
اس مہلک وبا سے انڈونیشیا میں اتوار کے روز ہونے والی 21 ہلاکتوں کے بعد کل ہلاکتوں کی تعداد 1372 ہوگئی ہے۔
بھارت میں ایک دن میں سب سے زیادہ کیس رپورٹ
بھارت میں 24 گھنٹوں کے دوران کرونا وائرس کے 6767 کے مزید کیسز سامنے آئے ہیں جو کہ ایک دن میں سامنے آنے والے کیسز کی سب سے زیادہ تعداد ہے۔
وزارت صحت کے مطابق 24 گھنٹوں کے دوران کرونا وائرس سے 147 ہلاکتیں رپورٹ کی گئی ہیں۔ جس کے بعد اس وبا سے ہلاکتوں کی تعداد 3867 تک پہنچ چکی ہے۔
بھارتی نشریاتی ادارے ‘این ڈی ٹی وی’ کے مطابق اتوار کے روز مسلسل تیسرے دن کرونا وائرس سے چھ ہزار سے زائد کیسز رپورٹ ہوئے ہیں۔
روس میں ایک دن میں سب سے زیادہ اموات
روس میں 24 گھنٹوں کے دوران کرونا وائرس کے سبب 153 اموات واقع ہوئی ہیں۔ جو کہ ایک دن میں اس مہلک وبا سے ہونے والی سب سے زیادہ اموات ہیں۔
کرونا وائرس سے اب تک روس میں 3541 اموات واقع ہوچکی ہیں۔
حکام کے مطابق 24 گھنٹوں کے دوران روس میں 8599 کرونا وائرس کے نئے کیسز سامنے آئے ہیں۔ جس کے بعد کرونا وائرس کے شکار افراد کی تعداد 344481 ہو گئی ہے۔