کرونا وائرس: چین کا بھارت سے اپنے شہریوں کے انخلا کا اعلان
چین نے کرونا وائرس کے باعث بھارت میں پھنسے اپنے شہریوں کو خصوصی پروازوں کے ذریعے وطن واپس لانے کا فیصلہ کیا ہے۔
یہ فیصلہ ایسے وقت میں کیا گیا ہے جب بھارت میں کرونا وائرس کیسز میں تیزی سے اضافے کے علاوہ چین کے ساتھ سرحدی تنازعات پر کشیدگی میں بھی اضافہ دیکھا گیا ہے۔
بھارتی ذرائع ابلاغ کے مطابق چین نے بھارتی دارالحکومت نئی دہلی، کولکتہ اور ممبئی سے شنگھائی، گوانگژو، جینان، ژینگژو کے لیے خصوصی پروازوں کا انتظام کیا ہے جن کا آغاز دو جون سے ہو گا۔
پیر کو بھارت میں چین کے سفارت خانے کی ویب سائٹ پر خصوصی پروازیں چلانے کا اعلان کیا گیا۔ چینی شہریوں سے کہا گیا ہے کہ وہ مذکورہ فلائٹس میں اپنی ٹکٹس بک کرا سکتے ہیں۔
بھارت کے خبر رساں ادارے 'ٹائمز آف انڈیا' کے مطابق بھارت کے وزارتِ خارجہ کا کہنا ہے کہ وہ چینی شہریوں کی واپسی کے عمل میں چینی حکام سے تعاون کرے گی۔
بھارتی حکام کا کہنا ہے کہ گزشتہ ہفتے تک بھارت سے 60 ہزار کے لگ بھگ غیر ملکی شہریوں کا انخلا ہو چکا ہے۔
بھارت سے جن چینی شہریوں کا انخلا کیا جا رہا ہے ان میں تاجر، طلبہ اور سیاح شامل ہیں جو فلائٹ آپریشن بند ہونے سے بھارت میں پھنس کر رہ گئے تھے۔
چینی سفارت خانے کا کہنا ہے کہ وطن واپس آنے کے خواہش مند افراد کو سفری اخراجات خود برداشت کرنا ہوں گے جب کہ کرونا کی علامات رکھنے والوں کو سفر کی اجازت نہیں ہو گی۔
عالمی ادارہ صحت نے ہائیڈروکسی کلورو کوئن کے ٹرائلز روک دیے
عالمی ادارہ صحت (ڈبلیو ایچ او) نے کرونا کے علاج کے لیے امریکہ کے صدر ڈونلڈ ٹرمپ کی تجویز کردہ دوا ہائیڈروکسی کلورو کوئن کے ٹرائلز فوری روکنے کا فیصلہ کیا ہے۔
ڈبلیو ایچ او کے مطابق دوا کے استعمال سے شرح اموات میں اضافے کے شواہد ملے ہیں۔
وزیر اعظم پاکستان کے معاون خصوصی برائے صحت ڈاکٹر ظفر مرزا نے بھی ایک ٹوئٹ میں دوا کے کلینکل ٹرائلز روکنے کا اعلان کیا ہے۔
اپنی ٹوئٹ میں ڈاکٹر ظفر مرزا کا کہنا ہے کہ دوا استعمال کرنے والے 10 ملکوں کے جائزہ اجلاس میں دوا کا استعمال روکنے ترک کرنے کا فیصلہ ہوا ہے۔
ڈاکٹر ظفر مرزا کے بقول دوا کے استعمال سے شرح اموات میں اضافہ ہوا ہے۔
خیال رہے کہ امریکہ کے صدر ملیریا کے علاج کے لیے استعمال ہونے والی ہائیڈروکسی کلورو کوئن استعمال کرنے کے بڑے حمایتی ہیں۔
پاکستان کے زیرِ انتظام کشمیر میں کرونا سے اموات کی تعداد چار ہو گئی
پاکستان کے زیرِ انتظام کشمیر کے حکام کا کہنا ہے کہ گزشتہ 24 گھنٹوں کے دوران کرونا سے مزید دو افراد کی ہلاکت ہوئی ہے۔
پاکستانی کشمیر میں اب کرونا سے ہلاک ہونے والوں کی تعداد چار ہو گئی ہے۔ مظفر آباد میں آئسولیش وارڈ میں زیرِ علاج ایک خاتون جب کہ میر پور میں ایک شخص کرونا کے باعث ہلاک ہوا ہے۔
گزشتہ روز بھی کرونا کے باعث ایک عمر رسیدہ خاتون انتقال کر گئی تھیں۔ پاکستان کے زیرِ انتظام کشمیر میں کرونا سے ہلاک ہونے والوں میں دو مرد اور دو خواتین شامل ہیں۔
پاکستانی کشمیر میں کرونا سے متاثر ہونے والوں کی تعداد 211 ہو گئی ہے۔ اب تک ایک سو کے قریب افراد صحت یاب ہو چکے ہیں۔
خیبر پختونخوا میں کرونا سے مزید 10 ہلاکتیں، مجموعی تعداد 408 ہو گئی
پاکستان کے صوبے خیبرپختونخوا میں کرونا سے گزشتہ 24 گھنٹوں کے دوران مزید 10 افراد ہلاک ہو گئے ہیں۔
صوبے میں کرونا سے ہونے والی مجموعی ہلاکتیں اب 408 ہو گئی ہیں جو ملک بھر میں سب سے زیادہ ہیں۔
محکمہ صحت کے مطابق صوبہ میں گزشتہ 24 گھنٹوں کے دوران کرونا کے 175 نئے کیسز رپورٹ ہوئے ہیں۔ صوبے میں کرونا سے متاثرہ مریضوں کی مجموعی تعداد آٹھ ہزار 80 ہو گئی ہے۔
گزشتہ 24 گھنٹوں کے دوران 60 مریض صحت یاب جب کہ مجموعی طور پر 2593 مریض صحت یاب ہو چکے ہیں۔ سب سے زیادہ مریضوں کی تعداد پشاور میں ہے جہاں تین ہزار سے زائد مریض وائرس کا شکار ہو چکے ہیں۔
پشاور میں کرونا کے باعث اب تک 235 افراد ہلاک ہو چکے ہیں۔ صوبے میں ڈاکٹرز اور پیرا میڈیکل اسٹاف کے اراکین بھی وائرس کا شکار ہوئے ہیں۔
پشاور کے لیڈی ریڈنگ اسپتال کے کئی سینئر ڈاکٹروں نے ملازمتوں سے استعفی بھی دے دیا ہے جب کہ اسپتال کے چیف ایگزیکٹو آفیسر ڈاکٹر نوشیروان برکی کئی مہینوں سے امریکہ میں ہیں۔